ۋاحابيزمنىڭ ناسيحاتتالۋىن قولدايتىن جوعارى لاۋازىمدى مەملەكەتتىك قىزمەتكەرلەر بار - دەپۋتات
تەرىس ءدىني اعىمداردى قولداۋشىلار بيلىكتىڭ جوعارى ساتىلارىندا دا وتىر. قازاقپارات ءتىلشىسىنىڭ ساۋالىنا جاۋاپ بەرگەن ءماجىلىس دەپۋتاتى ەرمۇرات باپي وسىلاي دەيدى.

«ءسىز دەپۋتاتتىق ساۋالىڭىزدا ۋاحابيزم مەن جات اعىمداردى ناسيحاتتاۋدى قولدايتىن جوعارى لاۋازىمدى مەملەكەتتىك قىزمەتكەرلەر بار ەكەنىن ايتتىڭىز. ولار قانداي قۇرىلىمداردا قىزمەت ەتەدى، ايتقان سوزىڭىزگە ناقتى دالەلى بار ما؟» - دەپ سۇرادىق ەرمۇرات باپيدەن ءماجىلىستىڭ جالپى وتىرىسىنان كەيىن.
بۇعان جاۋاپ قاتقان ماجىلىسمەن تەرىس ءدىني اعىم قولداۋشىلارى ماڭىزدى مەملەكەتتىك ورگانداردا وتىرعانىن ايتتى.
«تەرىس ءدىني اعىمداردى، ۋاحابيزم اعىمىن قولداۋشى جەكەلەگەن ادامدار بيلىكتە، ۇكىمەتتە دە بار، وكىنىشكە قاراي پارلامەنتتىڭ ءوز ىشىندە دە بار دەپ ويلايمىن. بۇل تەرىس اعىم ءبىزدىڭ قوعامدى جانە مەملەكەتتىك بيلىكتى بىرتىندەپ جايلاپ بارا جاتىر. ول ۇلتتىق دىنىمىزگە قاۋىپ توندىرەتىن ءۇردىس دەپ ايتۋعا بولادى»، - دەپ جاۋاپ بەردى ەرمۇرات باپي.
- ءبىزدىڭ مىڭ جىلدىق ءدىني ءداستۇرىمىز بار. سول نەگىزدە ءجۇرۋىمىز كەرەك. ەگەر ءبىز ءدىن ارقىلى مەملەكەتتىك نەگىزىمىزگە سوققى بەرگىزەتىن بولساق، وندا ءبىزدىڭ بولاشاعىمىزدىڭ كۇڭگىرت بولعانى».
توقتالا كەتەيىك، بۇگىن ءماجىلىستىڭ جالپى وتىرىسىندا ەرمۇرات باپي ءدىن توڭىرەگىندەگى تۇيتكىلدەردى رەتتەۋدى سۇراپ، دەپۋتاتتىق ساۋال جولدادى. ماجىلىسمەن ماسەلەنى شەشۋ جولى رەتىندە ءدىن ماسەلەسىن قاتاڭ رەتتەۋ كەرەكتىگىن ۇسىندى.
«جاسىراتىنى جوق، مەملەكەتتىك بيلىكتىڭ ءوز ىشىندە دە ۋاحابيزم مەن جات اعىمداردى ناسيحاتتاۋدى قولدايتىن جوعارى لاۋازىمدى مەملەكەتتىك قىزمەتكەرلەر بار دەگەن دەرەك مەنىڭ قۇلاعىما جەتتى. ەگەر وسى ءسوز قاڭقۋ ەمەس، ناقتى جاعداي وسىلاي بولسا، وندا ءبىزدىڭ تاۋەلسىز مەملەكەتتىگىمىزگە شىنىندا دا قاتەر تونگەنى. ءبىر وكىنىشتىسى - بۇل يسلامدىق سەكتا قازاقستاننىڭ ءبىراز ايماعىندا: اتىراۋ، اقتوبە، ماڭعىستاۋ، ۇلىتاۋ، الماتى وڭىرىندە ەتەك جايىپ بارادى. بۇل وڭىرلەردىڭ شاعىن بيزنەسىن، اسىرەسە بازار ساۋداسى توڭىرەگىن ۋاحابشىلار، سالافيزم يدەياسىنا تابىنۋشىلار باسىپ بارادى، ياعني تەرىس سەكتانىڭ دامۋىنا كەڭىنەن مۇمكىندىك بەرىپ، جان-جاقتى جاعداي جاساپ وتىرعان جەرگىلىكتى بيلىك وكىلدەرى بار دەگەن ءسوز»، - دەدى ەرمۇرات باپي پرەمەر-مينيستر ءاليحان سمايىلوۆقا جولداعان دەپۋتاتتىق ساۋالىندا.