اداي جانە قوستاناي جىلقىلارىنا جىل سايىن 140 ميلليون تەڭگە سۋبسيديا تولەنۋى مۇمكىن
ءماجىلىس دەپۋتاتى ايداربەك قوجانازاروۆ سپورت باعىتىنداعى قازاقى جىلقى سانىن كوبەيتۋ تۋرالى زاڭ جوباسى كىمدەرگە سۋبسيديا تولەۋدى كوزدەيتىنىن ايتتى، دەپ حابارلايدى Kazinform.
«سۋبسيديا تولەۋدىڭ ەرەجەلەرىن اۋىل شارۋاشىلىعى مينيسترلىگى زاڭ قابىلدانعاننان كەيىن ازىرلەيدى. ءبىز زاڭ جوباسى اياسىندا 701 ميلليون تەڭگە بەس جىلعا ءبولۋ كەرەك دەپ وتىرمىز. كەيبىر ارىپتەستەرىمىز جەتكىلىكسىز دەپ جاتىر. بيۋدجەت كوميسسياسىنا شىعىپ، مۇنى قايتادان قاراستىرۋعا بولادى. قازىرگى تاڭدا ءبىز ۇسىنىپ وتىرعان زاڭ دۇرىس قولدانىلاتىنى جانە ناتيجەسى بولاتىنىن دالەلدەۋىمىز كەرەك»، - دەدى دەپۋتات ب ا ق وكىلدەرىنىڭ ساۋالىنا بەرگەن جاۋابىندا.
ونىڭ سوزىنشە، بۇل سۋبسيديا اداي جانە قوستاناي تۇقىمدى جىلقى ۇستايتىندارعا بەرىلمەك.
«701 ميلليون تەڭگەدەن جىل سايىن 140 ميلليون تەڭگە ءبولىنىپ وتىرادى. اداي جانە قوستاناي تۇقىمدى جىلقىنىڭ قازىرگى سانى 1000 باستان اسپايدى. وسى 1000 باسقا جىل سايىن 140 ميلليون تەڭگە سۋبسيديا تولەۋدى ۇسىنىپ وتىرمىز»، - دەدى ايداربەك قوجانازاروۆ.
