اۋدان اكىمى قىزمەتكەردى ۇردى: شىمكەنت اكىمدىگى جەلىدە تاراعان ۆيدەوعا تۇسىنىك بەردى
شىمكەنت. KAZINFORM - قازىرگى ۋاقىتتا وقيعانىڭ بارلىق ءمان-جايىن انىقتاۋ ءۇشىن قىزمەتتىك تەكسەرۋ جۇرگىزىلىپ جاتىر.
الەۋمەتتىك جەلىدە شىمكەنت قالاسىنا قاراستى قاراتاۋ اۋدانى اكىمىنىڭ قىزمەتكەرگە كۇش قولدانعانى كورسەتىلگەن ۆيدەو تارادى. وسىعان بايلانىستى شىمكەنت قالاسى اكىمدىگى رەسمي تۇسىنىك بەردى.
- الەۋمەتتىك جەلىدە قالاداعى اۋدان اكىمدەرىنىڭ ءبىرى قاتىسقان بولۋى مۇمكىن وقيعا بەينەلەنگەن ۆيدەو تارالىپ جاتىر. اتالعان دەرەك بويىنشا وقيعانىڭ بارلىق ءمان-جايىن جان-جاقتى ءارى وبەكتيۆتى انىقتاۋ ماقساتىندا قىزمەتتىك تەكسەرۋ جۇرگىزىلەتىنىن حابارلايمىز، - دەلىنگەن اكىمدىك تاراتقان اقپاراتتا.
سونداي-اق قالا اكىمدىگى زاڭدىلىقتى ساقتاۋ، قىزمەتتىك ادەپ قاعيداتتارىن ۇستانۋ جانە كەز كەلگەن قۇقىققا قايشى ارەكەتتەرگە جول بەرمەۋ ۇستانىمىن باسشىلىققا الاتىنىن مالىمدەدى.
- ەگەر تارالعان بەينەجازبادا كورسەتىلگەن جايتتار راستالسا، قازاقستان رەسپۋبليكاسىنىڭ قولدانىستاعى زاڭناماسىنا سايكەس ءتيىستى شارالار قابىلدانادى. تەكسەرۋ اياقتالعانعا دەيىن اسىعىس قورىتىندى جاساماۋدى سۇرايمىز. ناتيجەلەرى تۋرالى قوسىمشا حابارلانادى، - دەپ جاۋاپ بەردى ۆەدومستۆو.
بۇدان بۇرىن پاۆلودار وبلىسىندا ماس كۇيىندە كولىك جۇرگىزگەن شەنەۋنىك جۇمىستان شىعارىلاتىنىن جازعان ەدىك.
اۆتور
ءسابيت تاستانبەك
