ادامنىڭ سىرت كەلبەتىندەگى جۇرەك اۋرۋىن كورسەتەتىن 8 بەلگى

денсаулық
فوتو: pexels

ادەتتە كوپ ادام جۇرەك اۋرۋىنىڭ باستى بەلگىسى - كەۋدە تۇسىنىڭ اۋىرۋى دەپ ويلايدى. الايدا ادامنىڭ سىرت كەلبەتىندە دە جۇرەك پاتولوگياسىن كورسەتەتىن بەلگىلەر بار. كارديولوگ گرانت شەحيان جۇرەك اۋرۋىن ادامنىڭ تەرىسىنە، بەتىنە جانە ارەكەتىنە قاراپ قالاي بىلۋگە بولاتىنىن ايتتى، - دەپ حابارلايدى «Doctorpiter».

ىشكى اۋرۋلاردىڭ سىرتقى بەلگىلەرىن زەرتتەيتىن سەميوتيكا دەگەن عىلىم بار. مىسالى، ادامنىڭ سىرت كەلبەتىنە قاراپ جۇرەك اۋرۋىن انىقتاۋعا بولادى.

تەرى ءتۇسى

«جۇرەك پروبلەماسىن ءبىرىنشى كەزەكتە تەرى ءتۇسى كورسەتەدى، - دەيدى گرانت شەحيان. - ەرىن، بەت، مويىن، قول جانە اياقتىڭ قارقىندى كوگەرۋى. بۇل ءتۇرلى جۇرەك پروبلەمالارى كەزىندە پايدا بولادى، ءبىراق ولاردىڭ بارلىعى قاندى وتتەكپەن قامتاماسىز ەتۋدىڭ بۇزىلۋىمەن بايلانىستى».

كەي جاعدايدا جۇرەك اۋرۋىن تەرىنىڭ سارعايۋى كورسەتەدى.

ءىسىنۋ

دارىگەرلەر ءجيى ءمان بەرەتىن كەلەسى بەلگى - ءىسىنۋ.

«كوز استىنىڭ ءىسىپ تۇرۋى، ءىشتىڭ ۇلكەيىپ كەتۋى، اياقتىڭ ءىسىنۋى. ادەتتە، ولار كەشكە تامان ءىسىنىپ باستاپ، تاڭەرتەڭ كەتەدى»، - دەيدى كارديولوگ.

ءجيى ەسىنەۋ

كەيدە ەسىنەۋ پايدالى بولادى. الايدا ەسىنەي بەرۋ قاۋىپتى بەلگى بولۋى مۇمكىن.

«ەسىنەۋ - قوسىمشا تىنىس الۋ ارقىلى قاندى وتتەكپەن قانىقتىرۋعا باعىتتالعان رەفلەكس، - دەپ ءتۇسىندىردى مامان. - ءجيى ەسىنەۋ جۇرەك پروبلەماسىن كورسەتۋى مۇمكىن».

ىسىنگەن كوكتامىرلار

«ەگەر مويىنداعى كوكتامىر ءىسىنىپ جانە سوعىپ تۇرعانى كورىنىپ تۇرسا، سونداي-اق ول سويلەگەندە ودان سايىن كۇشەيسە، بۇل جۇرەك اۋرۋىن كورسەتۋى مۇمكىن»، - دەيدى كارديولوگ.

دەمىكپە

بۇل جۇرەك اۋرۋىنىڭ تاعى ءبىر ءجيى كەزدەسەتىن سىرتقى بەلگىسى.

«باستاپقىدا دەمىكپە ايتارلىقتاي فيزيكالىق جۇكتەمە كەزىندە پايدا بولادى. سودان سوڭ ول ازداپ كۇش سالساڭىز دا پايدا بولۋى مۇمكىن. مىسالى، اياق كيىمىڭىزدىڭ باۋىن بايلاۋعا تىرىسقان كەزدە دەمىكپە پايدا بولادى. كەيىن دەمىكپە تىنىشتىق جاعدايىندا دا مازالاۋى مۇمكىن»، - دەيدى گرانت شەحيان.

بيىك جاستىققا جاتقاندى جاقسى كورۋ

ەگەر بيىك ەمەس جاستىققا ۇيىقتاي المايتىن بولساڭىز، ونىڭ سەبەبى جۇرەك پروبلەمالارىندا بولۋى مۇمكىن.

«ادام باسىنا ءبىر جاستىق قويسا، ءوزىن ىڭعايسىز سەزىنەدى دە، ەكى نەمەسە ءۇش جاستىق قويىپ الادى. بۇل كۇي كىشى قاناينالىم، ياعني جۇرەك پروبلەماسىمەن بايلانىستى بولۋى مۇمكىن»، - دەيدى دارىگەر.

جايباسارلىق

«اسقىنىپ كەتكەن جۇرەك اۋرۋى كەزىندە قانمەن قامتاماسىز ەتۋ ناشارلاپ، مي وتتەكتى اشىعۋعا ۇشىراسا، قايدا باعىتتالىپ تۇرعانى بەلگىسىز كوزقاراس پەن اقىل-وي قابىلەتىنىڭ ناشارلاۋى اۋرۋدىڭ سىرتقى بەلگىسى بولۋى مۇمكىن. مۇنداي جاعدايداعى ادام جىلدام شارشاپ قالادى. ول الاڭعاسار، جايباسار جانە ۇيقىشىل بولىپ جۇرەدى»، - دەيدى مامان.

جۇرەك بۇكىرى

جۇرەك اۋرۋى بار ادامدار ادەتتە ارىق كەلەدى. سونداي-اق ولاردا تۋا پايدا بولعان جۇرەك بۇكىرى بولادى.

سوڭعى جاڭالىقتار