ادامدار 30 جاستان كەيىن عانا ەسەيەدى - زەرتتەۋ
عالىمدار جۇرگىزگەن زەرتتەۋ ادامدار 30 جاستان اسقان سوڭ عانا ەسەيەتىنىن كورسەتتى، دەپ حابارلايدى قازاقپارات Ladbible باسىلىمىنا سىلتەمە جاساپ.
نەيروبيولوگ مامانداردىڭ پىكىرىنشە، 18 جاستاعى ادام تولىققاندى ەرەسەك ادام ەمەس، ويتكەنى ونىڭ ميى وسى جاستان كەيىن دە ايتارلىقتاي وزگەرىستەرگە ۇشىرايدى.
كەمبريدج ۋنيۆەرسيتەتىنىڭ پروفەسسورى پيتەر دجونستىڭ BBC- گە بايانداۋىنشا، بالالىق شاقتان ەرەسەك ومىرگە ءوتۋ ءبىز ويلاعاننان الدەقايدا كۇردەلى.
دجونس جانە ونىڭ ارىپتەستەرى ءوز زەرتتەۋلەرىندە 14 پەن 24 جاس ارالىعىنداعى 297 ەرىكتىنىڭ ميىن باقىلاۋ ءۇشىن م ر ت قولدانىپ، سول ارقىلى 18 جاستان كەيىن ميدىڭ ءالى دە دامىپ جەتىلەتىنىن انىقتادى.
دجونستىڭ شامالاۋىنشا، جاس وسپىرىمدەرگە «ەرەسەك» رەتىندە قاراۋ الەۋمەتتىك سەبەپتەرمەن عانا «ىڭعايلى». دەگەنمەن، ول تاجىريبەلى قىلمىستىق سۋديالار 19 جاستاعى سوتتالۋشى مەن 30 جاستان اسقان قىلمىسكەر اراسىنداعى ايىرماشىلىقتى تۇسىنەتىنىن ايتتى.
«بالالىق شاق، ودان كەيىن بىردەن ەرەسەكتىك دەگەن ۇعىم جوق. ادامدار قوزعالىستا، ولار تراەكتوريادا»، - دەدى ول.
