ادام ولتىرەتىن ءازىل- ءسوز سويىل

استانا. قازاقپارات- تورەعالي تاشەنوۆ، جومارت ساپار، سەيسەن امىربەك - ءبارى «ايقىن» گازەتىنىڭ قالجىڭقۇمار قىزمەتكەرلەرى. ولار ءبىر-بىرىمەن ىلعي دا قاتتى ازىلدەسىپ جۇرەدى.

ءبىرى اعا، ءبىرى ءىنى بولعانىمەن، زامان قۇرداس ەمەس پە؟! كەيدە ولاردىڭ ازىلدەرى ادام ولتىرەدى. بىردە ەلگە بەلگىلى ءبىر قالامگەر قايتىس بولىپ، ونى ماڭگىلىك ساپارعا شىعارىپ سالىپ كەلە جاتقان ولار ءبىر-ءبىرىن تۇرتكىلەپ، ازىلگە ەرىك بەرەدى.

- توكە، - دەيدى سەيسەن جومارتقا كوزىن قىسىپ قويىپ، - ءبىر كۇنى ءسىزدى دە وسىلاي شىعارىپ سالامىز-اۋ.

جومارت تا سەيسەندى قوستاپ قويادى. ەكەۋىنە ەسەسىن جىبەرىپ قوياتىن توكەڭ بە؟

- الدىمدا جاسى ۇلكەن جومارت بار عوي، - دەپ قويىپ قالادى. اجالدىڭ اياق استىنان كەلە قالعانىن كىم ۇناتا قويسىن؟! جومارت شوشىپ كەتىپ:

- جاس ولە مە، كارى ولە مە، كىم بىلەدى؟ «جاقسى ءسوز - جارىم ىرىس» دەگەن، جاقسى ءسوز ايتىڭدار، - دەيدى اڭگىمە ارناسىن باسقا تاقىرىپقا بۇرماق بولىپ.

سوندا توكەڭ:

- جاراتقانعا جاس كەرەك بولسا - سەيسەن، كارى كەرەك بولسا - جومارت بار عوي، - دەپتى.

اندا-ساندا

توكەڭ ءبىر كەزدەرى يماندىلىققا بەت بۇرىپ، قۇبىلاعا قاراپ ناماز وقىپ، بەس ۋاقىت جاينامازعا جىعىلىپ ءجۇردى. ورازا ايتتى اسىعا كۇتىپ، ەل قاتارلى اۋىز بەكىتىپ، جۇما نامازدان دا قالمايتىن. ءبىر كۇنى ارىپتەستەرىمىزدىڭ ءبىرى توي جاساپ، ۇجىمداعىلاردىڭ ءبارىن قۋانىشىنا ورتاقتاسۋعا شاقىردى. تويدىڭ بەل ورتاسىندا توكەڭ «وتە كوڭىلدى» بوپ شىعا كەلدى. سىرتتاي قاراعان ادامعا باس قۇدانىڭ ناق ءوزى سەكىلدى. «ىشتەگى ميكروبتاردى «ولتىرەيىن» دەگەنى شىعار» دەپ قويا سالدىق. قاس قىلعانداي ۇجىمدا توي دا، سالتانات تا كوبەيدى. توكەڭ دە «بايگەگە» ءجيى-ءجيى قوسىلىپ، اتتىڭ باسىن ەركىن جىبەرەتىن بولدى. گايكىسى بوساپ، جاينامازعا ەمەس، جەرگە جىعىلا بەرەتىن بولعان سوڭ:

- توكە، كۇنى كەشە ناماز وقىپ ءجۇر ەدىڭىز. مۇنىڭىز نە؟ يسلامعا قايشى ەمەس پە؟ سىزدىكى قاي يسلام؟ - دەيدى «ايقىن» گازەتى باس رەداكتورىنىڭ ورىنباسارى بەرىك بەيسەن ۇلى. سوندا توكەڭ:

- بىزدىكى «مياگكي (جۇمساق) يسلام» عوي. اندا-ساندا ۇرتتاپ تۇرۋعا بولادى، - دەپ ءبارىمىزدى قىران-توپان كۇلدىرگەن ەدى.

جولداس بەك ۇلى، «ەگەمەن قازاقستان» گازەتى. 2013