ادام ميىن مودەلدەۋ الگوريتمى جاسالدى

Адам миы
Фото: Фото: EPA/SALVATORE DI NOLFI

تەل- اۆيۆ ۋنيۆەرسيتەتىنىڭ پروفەسسورى ەميليا فريدماننىڭ جەتەكشىلىگىندەگى رەسەي عىلىم اكادەمياسى ماشيناتانۋ ماسەلەلەرى ينستيتۋتىنىڭ «كۇردەلى مەحانيكالىق جۇيەلەردى، جەلىلەردى جانە ورتالاردى سيفرلاندىرۋ، تالداۋ جانە سينتەزدەۋ» حالىقارالىق زەرتحاناسىنىڭ عالىمدارى ادام ميىنىڭ جۇمىسىن ءارتۇرلى جاعدايلاردا مودەلدەۋگە مۇمكىندىك بەرەتىن بىرەگەي ماتەماتيكالىق الگوريتمدى جاسادى.

Kazinform اگەنتتىگى بۇل تۋرالى تاسس اقپارات اگەنتتىگىنە سىلتەمە جاساپ حابارلايدى.

بۇل الگوريتمدى قولدانۋ ءارتۇرلى پسيحيكالىق اۋرۋلاردى زەرتتەۋگە، سونداي- اق يمپلانتتاردى باسقارۋعا ارنالعان «مي- كومپيۋتەر» ينتەرفەيسىن جاساۋعا مۇمكىندىك بەرەدى، دەپ حابارلادى رعا ماشينا تانۋ ينستيتۋتىنىڭ باسپا ءسوز قىزمەتىنەن.

«بولاشاقتا ءبىز ءوز ناتيجەمىزدى قويانشىق اۋرۋ جانە زەيىن تاپشىلىعى گيپەراكتيۆتىلىگىنىڭ بۇزىلۋى سياقتى اۋرۋلاردى زەرتتەۋ ءۇشىن، سونداي- اق روبوتتاردى «وي كۇشىمەن» باسقارۋعا مۇمكىندىك بەرەتىن جانە نەيروپروتەزدەۋ سالاسىندا بەلسەندى قولدانىلىپ جۇرگەن «مي- كومپيۋتەر» ينتەرفەيسىن جاساۋ ءۇشىن دە قولدانۋعا بولاتىن مي بەلسەندىلىگى رەجيمدەرىن جىكتەۋ ماسەلەلەرىن شەشۋگە قولدانۋدى جوسپارلاپ وتىرمىز»، - دەپ قوسىپ ءوتتى ينستيتۋتتىڭ باسپا ءسوز قىزمەتىنەن.

ادامنىڭ ميى 80 ميللياردتان استام نەيروندىق جاسۋشادان تۇرادى. الەمدىك عىلىمدا مۇنداي كۇردەلى ورگاننىڭ تولىق جانە جان- جاقتى ۇلگىلەرىن جاساۋ ءالى كۇنگە دەيىن شەشىلمەگەن ماسەلە بولىپ قالا بەرەدى. دەگەنمەن، سانكت- پەتەربۋرگتەگى حالىقارالىق زەرتحانانىڭ ءبىر توپ عالىمدارى وسى ماقساتقا جاقىنداۋدىڭ جانە ءارتۇرلى جاعداي، سونىڭ ىشىندە ەكسترەمالدى جاعدايدا مي جۇمىسىنىڭ بەلگىلى ءبىر رەجيمدەرىنىڭ ۇلگىلەرىن جاساۋدىڭ جولىن تاپتى.

عالىمداردىڭ شەشىمى جەكە مي جاسۋشالارىن نەمەسە ولاردىڭ پوپۋلياتسيالارىن زەرتتەۋ ءۇشىن قازىردىڭ وزىندە قولدانىلاتىن فيتسحيۋ- ناگۋمو ماتەماتيكالىق مودەلىنە نەگىزدەلگەن. دەگەنمەن، بۇل مودەلدە ميللياردتاعان نەيرونداردى ءبىر ۋاقىتتا مودەلدەۋگە كەدەرگى كەلتىرەتىن قۇرىلىمدىق شەكتەۋلەر بار.

ر ع ا ماشينا تانۋ ينستيتۋتى زەرتحاناسىنىڭ ماماندارى نەيرونداردىڭ مەمبرانالىق پوتەنتسيالىن - ياعني ءارتۇرلى جاعدايلاردا مي جاسۋشالارىنىڭ قابىرعالارىنىڭ كەرنەۋىن ولشەۋگە نازار اۋداردى. بۇل دەرەكتەرگە جىلدامدىق گراديەنتىنىڭ ماتەماتيكالىق ادىستەرى مەن ديففەرەنتسياليزاتور سۇزگىلەرى قولدانىلادى، ولار بۇرىننان تانىلعان فيتسحيۋ- ناگۋمو مودەلىمەن بىرگە ادام ميىن مودەلدەۋ مۇمكىندىكتەرىنىڭ جاڭا دەڭگەيىنە جەتۋگە مۇمكىندىك بەرمەك.

اۆتور

زارينا تۋعانبايەۆا

سوڭعى جاڭالىقتار