ادام كوزى جەتپەيدى: ايدىڭ ارعى جاعىندا نە جاسىرىلعان

استانا. KAZINFORM - ادامزاتتىڭ عارىشقا دەگەن قىزىعۋشىلىعى ەشقاشان باسەڭدەگەن ەمەس. سويتە تۇرا سوڭعى جارتى عاسىردا ايعا جاسالعان ساپارلار تاريح بەتىندە عانا قالىپ قويىپ ەدى.

ەندى سول ءۇزىلىس اياقتالىپ، «ارتەميدا II» ميسسياسى ادامزاتتى قايتادان جەر سەرىگىنە جاقىنداتىپ وتىر.

بۇل كۇندەرى «ارتەميدا II» ميسسياسىنىڭ ەكيپاجى ايدى اينالىپ ءوتىپ، ادامزات تاريحىنداعى ەڭ الىس قاشىقتىققا جەتۋگە دايىندالىپ جاتىر. ەگەر ءبارى جوسپارعا ساي وتسە، استروناۆتار بۇرىن-سوڭدى ەشبىر ادام بارماعان دەڭگەيگە جەتۋى مۇمكىن.

سەنبى كۇنى ەكيپاج مۇشەلەرى الداعى ۇشۋدىڭ ماڭىزدى كەزەڭىنە دايىندىق جۇرگىزىپ، اي بەتىنىڭ ەرەكشەلىكتەرىن زەرتتەۋمەن اينالىستى. ولار ساپار بارىسىندا تۇسىرىلەتىن نىسانداردى الدىن الا زەردەلەپ، عىلىمي باقىلاۋلارعا دايىندالدى.

ۇشۋ بارىسىندا تۇسىرىلگەن ەڭ اسەرلى ساتتەردىڭ ءبىرى - ايدىڭ ارعى بەتىنىڭ سۋرەتى. بۇل كادر 7-ءساۋىر كۇنى NASA- نىڭ رەسمي پاراقشاسىندا جاريالاندى.

سۋرەتتە ايدىڭ ەكى بولىگى - بىزگە تانىس جاق بەتى مەن كوزگە كورىنبەيتىن ارعى جاعى قاتار بەينەلەنگەن. عالىمداردىڭ ايتۋىنشا، بىزگە جاقىن بەتىندەگى قارا داقتار جانارتاۋلار بەلسەندىلىگىنىڭ ىزدەرى بولسا، ال باتىس بولىگىندە الىپ وريەنتالە كراتەرى ورنالاسقان. ونىڭ ديامەترى شامامەن 600 ميلگە جەتەدى جانە ول ايدىڭ ەكى جاعىن دا قامتيدى.

ەڭ قىزىعى، «ارتەميدا II» ەكيپاجى ءدال وسى كراتەردى تولىق كۇيىندە كورگەن العاشقى ادامدار اتاندى. بۇل جاي ستاتيستيكا ەمەس، بۇل - ادامزاتتىڭ مۇمكىندىگى شەكسىز ەكەنىن دالەلدەيتىن ناقتى فاكت.

ەكيپاج مۇشەلەرىنىڭ سوزىنشە، بۇل ساپار ەرەكشە اسەر بەرگەن.

ءدال قازىر عارىشتامىز، جەردەن وتە الىس قاشىقتىقتامىز. وتباسىممەن ءبىر ساتكە بايلانىسقا شىقتىم، بۇل ومىرىمدەگى ەڭ كەرەمەت ءسات بولدى، - دەدى ميسسيا كومانديرى ريد ۋايزمان.

ونىڭ ايتۋىنشا، بورتتاعى كوڭىل كۇي جاقسى. استروناۆتار كۇندى قاراپايىم تاڭعى اسپەن باستاپ، سونان سوڭ عىلىمي جۇمىستارعا كىرىسەدى.

كەشە ءبىز ايدىڭ ارعى بەتىن العاش رەت كوردىك. العان اسەرىمدە سوزبەن جەتكىزۋ مۇمكىن ەمەس، - دەدى ميسسيا مامانى كريستينا كوح.

ال كانادالىق استروناۆت دجەرەمي حانسەن بالالىق شاقتاعى ارمانى ورىندالعانىن ايتادى:

ءوزىمدى كىشكەنتاي بالا سياقتى سەزىنىپ تۇرمىن.

ميسسيانىڭ تاعى ءبىر ەرەكشەلىگى - باقىلاۋ بيىكتىگى. «اپوللون» باعدارلاماسى كەزىندە استروناۆتار ايدان نەبارى 70 ميل بيىكتىكتە ۇشسا، «وريون» ەكيپاجى 4 مىڭ ميلدەن استام قاشىقتىقتا ورنالاسقان. بۇل ولارعا ايدى تولىق كورۋگە، سونىڭ ىشىندە پوليۋستەرگە جاقىن ايماقتاردى زەرتتەۋگە مۇمكىندىك بەرەدى.

نەگىزى ايدىڭ ارعى بەتى جەردەن ەشقاشان كورىنبەيدى. سەبەبى ول ءوز وسىنەن ءدال جەردى اينالعان ۋاقىتپەن بىردەي جىلدامدىقتا اينالادى. سوڭعى رەت بۇل ايماقتى ادام كوزى 1972-جىلى «اپوللون-17» ميسسياسى كەزىندە كورگەن.

بۇگىندە تەحنولوگيا دا وزگەردى. استروناۆتار كاسىبي كامەرالارمەن قاتار، سمارتفونداردى دا پايدالانىپ جاتىر. بۇل - عارىش ميسسيالارىنداعى جاڭا كەزەڭنىڭ بەلگىسى.

بۇعان دەيىن NASA كەمەسى جەر وربيتاسىنان شىققانى تۋرالى جازعانبىز. سونىمەن قاتار «وريون» ەكيپاجىنىڭ باستى ماقساتىنا جانە بۇل ميسسيا ا ق ش- تى قالاي بايىتاتىنىنا توقتالعانبىز.