ادام پاپيللوما ۆيرۋسىنا قارسى ۆاكسينانى ۇلدارعا دا سالۋ ۇسىنىلدى

استانا. KAZINFORM - ءماجىلىس دەپۋتاتى اسحات ايماعامبەتوۆ تەگىن ءارى ەرىكتى تۇردە ەر بالالارعا ادام پاپيللوما ۆيرۋسىنا قارسى ۆاكسينا سالۋدى ۇسىندى.

- وتكەن اپتادا ءبىز دەنساۋلىق ساقتاۋ مينيسترىنە اتا-انالار كەزدەسۋلەردە كوتەرگەن ءبىر سۇراقپەن جۇگىندىك. اتاپ ايتقاندا - ەر بالالاردى ادام پاپيللوماسى ۆيرۋسىنا (ا پ ۆ) قارسى ەرىكتى ۆاكسيناتسيالاۋ باعدارلاماسىنا قوسۋ ماسەلەسى. قازىر قازاقستاندا قىز بالالار ادام پاپيللوما ۆيرۋسىنا قارسى ەكپەنى تەگىن الىپ جاتىر. بۇل - مىڭداعان ادامنىڭ ءومىرىن ساقتاپ قالاتىن ماڭىزدى شەشىم جانە ۇلكەن جەتىستىك، - دەپ جازدى اسحات ايماعامبەتوۆ Telegram پاراقشاسىندا.

حالىق قالاۋلىسى اتالعان ۆيرۋسقا قارسى ەكپە ەگۋ تاجىريبەسىن كەڭەيتۋ قاجەت دەپ سانايدى.

- ادام پاپيللوما ۆيرۋسى - تەك «ايەلدەرگە ءتان ۆيرۋس» ەمەس. بۇل ۆيرۋس جاتىر موينى وبىرىنان بولەك، كومەي، اۋىز قۋىسى، تىك ىشەك وبىرى سياقتى باسقا دا ونكولوگيالىق اۋرۋلارعا ەرلەر اراسىندا دا سەبەپ بولۋى مۇمكىن. بۇگىندە كوپتەگەن ەلدە ەر بالالار دا قىزدارمەن قاتار ۆاكسينا الادى. سوندىقتان ءبىز بۇل ەكپەنى ەرىكتى نەگىزدە الۋعا مۇمكىندىك بەرۋدى ۇسىندىق. ۆاكسينانى ءدارىحانالاردان تابۋ قيىن، سوندىقتان مەملەكەت تاراپىنان وعان قولجەتىمدىلىكتى قامتاماسىز ەتۋ ماڭىزدى. دەنساۋلىق ساقتاۋ مينيسترلىگى بۇل باستامانى قولدايدى دەپ ۇمىتتەنەمىز. سەبەبى ەر بالالار دا قاۋىپ توبىنا جاتادى. ولاردىڭ دەنساۋلىعى نازاردان تىس قالماۋى ءتيىس، - دەپ تولىقتىردى دەپۋتات.

ايتا كەتەيىك، ساۋىردە ەلىمىزدە ەر بالالارعا ادام پاپيللوما ۆيرۋسىنا قارسى ۆاكسينا ەگىلۋى مۇمكىن ەكەندىگى تۋرالى حابارلاعان ەدىك.

ەسكە سالايىق، بىلتىر قىركۇيەكتە ەلىمىزدە جاتىر موينى وبىرىنىڭ نەگىزگى قوزدىرعىشى - ادام پاپيللوما ۆيرۋسىنا (ا پ ۆ) قارسى قىزداردى جالپى ۆاكسينالاۋ باستالدى. وسى ورايدا Kazinform اگەنتتىگىنىڭ ءتىلشىسى قازاقستاندا اتالعان ينفەكسيانىڭ تارالۋ ستاتيستيكاسى قانداي، بۇل ۆيرۋس نە ءۇشىن قاۋىپتى جانە نەگە ەكپە الۋ قاجەت ەكەنىنە شولۋ جاساعان ەدى.

وتكەن جىلى ۇكىمەت ادام پاپيللوماسى ۆيرۋسىنا قارسى ۆاكسينا ساتىپ الۋعا 9,7 ميلليارد تەڭگەدەن استام قارجى ءبولدى.

اۆتور

داۋلەت ىزتىلەۋ