اۋعانستاندا ينتەرنەت تولىق ءوشىرىلدى

استانا. قازاقپارات - NetBlocks حالىقارالىق ينتەرنەتتى باقىلاۋ قىزمەتى اۋعانستان اۋماعىندا ينتەرنەتتىڭ تولىق وشىرىلگەنىن تىركەدى، دەپ حابارلايدى DW.

باقىلاۋ قىزمەتىنىڭ مالىمەتىنشە، بۇل تالىپتەر جۇرگىزىپ وتىرعان «ادامگەرشىلىك ساقتاۋ» ساياساتىنا بايلانىستى.

2025 -جىلعى 29-قىركۇيەكتە، دۇيسەنبى كۇنى، اۋعانستان اۋماعىندا ينتەرنەت بايلانىسى تولىق ۇزىلگەنى حابارلاندى.

- اۋعانستان قازىر ينتەرنەتتەن تولىقتاي اجىراتىلدى، سەبەبى «تاليبان» بيلىگى ادامگەرشىلىك قاعيدالارىن ساقتاۋ ماقساتىندا ءتيىستى شارالار قابىلداپ جاتىر، - دەلىنگەن NetBlocks قىزمەتىنىڭ Telegram-ارناسىنداعى حابارلامادا.

سونىمەن قاتار ەلدە تەلەفون بايلانىسى دا بۇزىلعان.

AP اگەنتتىگىنىڭ مالىمەتىنشە، بۇل - «تاليبان» 2021 -جىلعى تامىزدا بيلىككە كەلگەننەن بەرگى العاشقى تولىق اجىراتۋ جاعدايى.

قىركۇيەك ايىنىڭ ورتاسىندا تالىپتەر «ادامگەرشىلىكتى ساقتاۋ» ماقساتىندا اۋعانستاننىڭ سولتۇستىگىندەگى وڭىرلەردە تالشىقتى ينتەرنەتتى (وپتيكالىق جەلىنى) وشىرگەن بولاتىن.

- بۇل شارا بەيادەپ ارەكەتتەردىڭ الدىن الۋ ءۇشىن قابىلداندى. ەلدە حالىقتىڭ قاجەتتىلىكتەرىن وتەۋ ءۇشىن بالاما جەلى قۇرىلاتىن بولادى، - دەدى اۋعان ۇكىمەتىنىڭ وكىلى جۋرناليستەرگە.

AP اگەنتتىگىنىڭ دەرەگىنشە، ول كەزدە تەك بالح پروۆينتسياسىندا عانا ينتەرنەت اجىراتىلعان. الايدا Reuters اگەنتتىگى كابەلدىك ينتەرنەت سولتۇستىكتەگى بەس پروۆينتسيادا دا جۇمىس ىستەمەگەنىن حابارلادى: بالح، كۋندۋز، باداحشان، باگلان جانە تاحار.

ينتەرنەتتىڭ تولىق اجىراتىلۋى سالدارىنان ەلدىڭ كوپتەگەن وڭىرىندەگى ۇيلەر، مەملەكەتتىك ورگاندار مەن بيزنەس نىساندار Wi-Fi جەلىسىنەن تىس قالدى. الايدا رەسمي دەرەكتەرگە سايكەس، سول ۋاقىتتا موبيلدى ينتەرنەت قىزمەتى توقتاتىلماعان.

بۇدان بۇرىن «تاليبان» قوزعالىسى اقش پرەزيدەنتى دونالد ترامپتىڭ قوقان- لوققىسىن ەلەمەدى جانە ونىڭ اۋعانستانداعى 20 جىلعا سوزىلعان سوعىس كەزىندە ۆاشينگتون باقىلاۋىندا بولعان باگرام اۋە بازاسىن بەرۋ تۋرالى تالابىن قابىلدامادى.