ابايدىڭ يەلىگىندە قانشا باس مال بولعان
سەمەي. KAZINFORM - اباي قۇنانباي ۇلىنىڭ يەلىگىندەگى مال سانى جايلى تىڭ اقپارات جاريالاندى.
ۇلى اقىن اباي قۇنانباي ۇلىن ەل كوبىنە ويشىل، اعارتۋشى رەتىندە عانا تانىپ، ونىڭ ءوز داۋىرىندە اۋقاتتى، ءىرى شارۋاشىلىق يەسى بولعانىنا نازار اۋدارا بەرمەيدى. وسى رەتتە اباي وبلىسى مادەنيەت، تىلدەردى دامىتۋ جانە ارحيۆ ءىسى باسقارماسى حاكىمنىڭ بولمىسىن تولىق تانۋعا مۇمكىندىك بەرەتىن تاريحي دەرەكتەردى ۇسىندى.
- اباي قۇنانباي ۇلىنىڭ ارعى اتالارى دا، اكەسى قۇنانباي وسكەنباي ۇلى دا - ءبي، بولىس بولىپ، ەل باسقارعان، ءسوزى دە، ءوزى دە سالماقتى ادامدار بولعانى تاريحتان ءمالىم. وسىنداي وتباسىندا دۇنيەگە كەلگەن ابايدىڭ دا جاستايىنان ەل ىسىنە ارالاسىپ، باسقارۋشىلىق قابىلەتى ەرتە تانىلدى. 1915 -جىلى جاريالانعان تاريحي دەرەكتەرگە سۇيەنسەك، ابايدىڭ يەلىگىندە 593 جىلقى (ونىڭ ىشىندە 108 جاباعى مەن 167 قۇلىن)، 51 سيىر، 51 تۇيە، 1417 قوي بولعان، - دەلىنگەن اقپاراتتا.
1878 -جىلى اباي سەمەيدە قۇرىلعان وبلىستىق ستاتيستيكا كوميتەتىنىڭ تولىق مۇشەسى رەتىندە تىركەلىپ، ءوز ءوڭىرىنىڭ الەۋمەتتىك- ەكونوميكالىق، ەتنوگرافيالىق، مادەني جاعدايىن زەرتتەۋگە بەلسەنە قاتىسقان.
- بۇل كوميتەتكە مۇشە بولۋ - تەك اتاق ەمەس، ول ادامنان بەلگىلى ءبىر دارەجەدە ساۋاتتىلىقتى، قوعامنىڭ دامۋىنا بەيجاي قارامايتىن كوزقاراستى تالاپ ەتتى. اباي بۇل مىندەتتى ابىرويمەن اتقارىپ، ولكەنىڭ دامۋىنا ۇلەس قوستى. ۇلى اقىننىڭ مال-مۇلكى تۋرالى مالىمەتتەر - جاي عانا ساندىق دەرەك ەمەس. بۇل - ونىڭ تۇلعاسىنىڭ جان-جاقتىلىعىن، ءومىر سۇرگەن ورتاسىن، سول داۋىردەگى قازاق قوعامىنىڭ قۇرىلىمىن تانۋعا مۇمكىندىك بەرەتىن تاريحي ايعاق، - دەلىنگەن حابارلامادا.
