ابايدىڭ ازەربايجان تىلىنە اۋدارىلعان شىعارمالار جيناعى جارىق كوردى

ق ر پرەزيدەنتتىك ورتالىعى حالىقارالىق تۇركى مادەنيەتى مەن مۇراسى قورىمەن بىرلەسىپ، «اباي ازەربايجاندا جانە الەمدە» جيناعىن تانىستىردى.

Фото: ҚР Президенттік орталығы
Фото: из открытых источников

وعان ابايدىڭ ازەربايجان تىلىنە اۋدارىلعان ولەڭدەرى، اندەرى، قارا سوزدەرى، «اباي جولى» رومانىنان ۇزىندىلەر ەنگەن، دەپ حابارلايدى قازاقپارات ءتىلشىسى.

اۋدارما جۇمىسىمەن ازەربايجاننىڭ كورنەكتى ادەبيەت وكىلدەرى پ. حاليلوۆ، م. يبراحيموۆ، ك. پاشايەۆا، ف. اگايەۆا، ە. كۋليەۆ، ف. ۆاليەۆا اينالىسقان.

«جيناققا قازاقستانداعى اباي قۇنانبايەۆ مەموريالدىق كەشەنى ۇسىنعان ارحيۆتىك ماتەريالدار، سونداي-اق ازەربايجانداعى مۋزەي ماتەريالدارى ەنگىزىلدى. وعان قوسا، جيناقتا ماقالالار تۇرىندە پۋبليتسيستيكا ۇسىنىلعان. جيناققا سالىنعان سۋرەتتەر دە ۇلى ويشىل ءومىر سۇرگەن ءداۋىر مەن ۋاقىتتى بەينەلەيدى»، - دەدى ق ر پرەزيدەنتتىك ورتالىعى ديرەكتورىنىڭ ورىنباسارى بوتاگوز قايىپوۆا.

كىتاپتىڭ تۇساۋكەسەرىنە قوعام جانە ساياسات قايراتكەرلەرى، ونىڭ ىشىندە حالىقارالىق تۇركى مادەنيەتى مەن مۇراسى قورىنىڭ پرەزيدەنتى گۇلناي ەفەنديەۆا، تۇركى اكادەمياسىنىڭ پرەزيدەنتى شاھين مۇستافايەۆ، ق ر پارلامەنتى سەناتىنىڭ دەپۋتاتى رۋسلان رۇستەموۆ، «ەگەمەن قازاقستان» رەسپۋبليكالىق گازەتىنىڭ باس ديرەكتورى ديحان قامزابەك ۇلى كەلدى.

«بۇگىنگى جيناق ارقىلى اباي شىعارمالارى ازەربايجان، سول ارقىلى تۇرىك، تۇرىكمەن سەكىلدى وعىز ءتىلى توبىنا تاراپ، دۇنيەنىڭ ءبىراز بولىگىندە ابايدى جاڭاشا تانۋدىڭ مۇمكىندىگى تۋدى. جالپى ابايدىڭ ءاربىر مەرەيتويى كەزىندە ازەربايجان دوستارىمىز اباي تانۋعا كوپ ەڭبەك سىڭىرگەن. ابايدىڭ دۇنيەدەن وزعانىنا 50 جىل تولعاندا، 1954-جىلدان باستاپ ولار ابايدى تۇراقتى تۇردە ناسيحاتتاپ كەلە جاتىر. اسىرەسە 175 جىلدىق مەرەيتويعا بايلانىستى ابايدىڭ بۇرىن اۋدارىلماعان شىعارمالارىن اۋداردى. اباي شىعارمالارى قاي زاماندا دا جاساي بەرەدى. سوندىقتان، ابايدىڭ تۇركى دۇنيەسىنە، ونىڭ ىشىندە ازەربايجان حالقىنا اسەرى از بولمايدى دەپ ويلايمىن»، - دەدى ديحان قامزابەك ۇلى.

قوناقتار بۇل جيناقتىڭ قازاقستان مەن ازەربايجان اراسىنداعى قارىم-قاتىناستى نىعايتاتىن تاعى ءبىر كەزەڭ ەكەنىن اتاپ ءوتتى.

«اباي قۇنانبايەۆ قازاقستاندا جانە بۇكىل الەمدە كلاسسيك، اقىن، ويشىل، كومپوزيتور رەتىندە تانىمال. قازاق حالقىنا سىڭىرگەن زور ەڭبەگىنىڭ ءبىرى - ىبىراي التىنسارينمەن قاتار قازىرگى ادەبي قازاق ءتىلىنىڭ نەگىزىن قالاعانى. ول ءىس جۇزىندە قازاق جانە ورىس ادەبيەتى، قازاق اقىن پوەزياسى مەن شىعىستىڭ كلاسسيكالىق پوەزياسى اراسىندا مادەني كوپىر قۇرا الدى. اباي - قازاق تىلىندە كلاسسيكالىق شىعارمالاردى جازا باستاعان العاشقى ادام، ول قازاق زيالىلارىنىڭ بۋىنىنا اسەر ەتتى. اباي قۇنانبايەۆتىڭ شىعارمالارى مەن يدەيالارىندا تاربيەلەنگەن ءدال وسى زيالى قاۋىم وتارشىلدىققا قارسى قوزعالىستاردى باسقاردى»، - دەدى تۇركى اكادەمياسىنىڭ پرەزيدەنتى شاھين مۇستافايەۆ.

سوڭعى جاڭالىقتار