ابايدىڭ 170 ولەڭىن جاتقا بىلەتىن وقۋشى ايتىسقا قاتىسىپ، توپ جارىپ ءجۇر
وسكەمەن. KAZINFORM - شىعىس قازاقستان وبلىسى زايسان اۋدانىندا تۇراتىن ايعانىم بالعابايەۆا حاكىم ابايدىڭ 170 ولەڭىن جاتقا ايتىپ، رەسپۋبليكالىق سايىستاردا جەڭىس تۇعىرىنان كورىنىپ ءجۇر.
16 جاستاعى وقۋشىنىڭ ءوزى دە ولەڭ جازىپ، ايتىسقا دا قاتىسادى. 10-تامىز - اباي كۇنىنە وراي تالابى تاۋداي ايعانىمدى اڭگىمەگە تارتىپ كورگەن ەدىك.
- اڭگىمەمىزدى تۋىپ-وسكەن جەرىڭىزدەن باستاساق…
- شىعىس قازاقستان وبلىسى زايسان اۋدانى شالقار اۋىلىنىڭ تۋماسىمىن. كوگەداي ورتا مەكتەبىنىڭ 11-سىنىبىندا ءبىلىم الىپ جاتىرمىن. زايسان اۋداندىق «اقبەرەن» اقىندار سىنىبىنىڭ جاس ايتىسكەر- اقىنىمىن. اۋداننىڭ باس اقىنى، ايتىسكەر سەيىلحانوۆ قازبەك قابدراشيت ۇلىنىڭ شاكىرتىمىن.
- اباي شىعارماشىلىعىنا دەگەن قىزىعۋشىلىعىڭىز قالاي باستالدى؟
- قازاق ادەبيەتىنىڭ ۇلى تۇلعاسى اباي قۇنانباي ۇلى مەن ءۇشىن پوەزيا پايعامبارى. اباي اتامىزدىڭ شىعارماشىلىعىن وقۋعا دەگەن قۇلشىنىسىم العاش 5-سىنىپتا باستالعان ەدى. اناشىم اباي ولەڭدەرىن جاتتاتقىزىپ باستاۋ بەرسە، قازاق ءتىلى جانە ادەبيەت ءپانىنىڭ ۇستازى، جەتەكشىم مانشۇك قاقارمان قىزى بويىمداعى وجەتتىلىگىمدى جانە ەستە ساقتاۋ قابىلەتىمنىڭ جاقسى ەكەنىن بايقاپ، العاش اباي وقۋلارىنا قاتىستىرعان بولاتىن.
سول 5-سىنىپتا اباي-شاكارىم وقۋلارىنا 80 ولەڭ جاتتاپ قاتىستىم. قانجىعاما جۇلدەلى 2-ورىندى بايلادىم. ودان كەيىن ونلاين رەسپۋبليكالىق اباي وقۋلارىنا قاتىسىپ 1-ورىن الدىم. اباي اتامىزدىڭ 175 -جىلدىق مەرەيتويىنا ارنالعان توسبەلگىمەن ماراپاتتالعانىم بار. جىلدار بويى تاجىريبەمدى ارتتىرىپ 9-سىنىپتا اباي قۇنانباي ۇلىنىڭ 170 ولەڭىن جانە 1 پوەماسىن جاتتاپ، رەسپۋبليكالىق اباي وقۋلارىنىڭ 1-ورىن يەگەرى اتاندىم.
- ۇلى اقىن شىعارماشىلىعىنداعى وزىڭىزگە ەرەكشە ۇنايتىن ولەڭدەر قانداي؟
- «سەنبە جۇرتقا تۇرسا دا قانشا ماقتاپ»، «ولسەم ورنىم قارا جەر سىز بولماي ما؟»، «مەن جازبايمىن ولەڭدى ەرمەك ءۇشىن» ولەڭدەرى مەن «ەسكەندىر» پوەماسى. اباي اتامىزدىڭ ءار قارا ءسوزى مەن ولەڭىندە ۇرپاققا وي سالار تەڭىزدەي تەرەڭ ءتالىم-تاربيە جاتىر. اكەم كىشكەنتاي كۇنىمنەن ۇلى اقىننىڭ:
«سەنبە جۇرتقا، تۇرسا دا قانشا ماقتاپ،
اۋرە ەتەدى ىشىنە قۋلىق ساقتاپ.
وزىڭە سەن، ءوزىڭدى الىپ شىعار،
ەڭبەگىڭ مەن اقىلىڭ ەكى جاقتاپ» - دەگەن ولەڭ جولدارىن ساناما ءسىڭىرىپ، تاربيە بەردى. حاكىمنىڭ وسى ءبىر اسىل سوزدەرىن كوكەيىمە ءتۇيىپ، كوكجيەگىمدى كەڭەيتىپ، تەك اقىلىم مەن ەڭبەگىمدى ۇشتاستىرىپ العا قاراي جىلجىپ كەلەمىن.
- ابايدىڭ ولەڭدەرىنىڭ ىشىندە جاتتاۋعا قيىن سوققانى قايسىسى؟
- مارقۇم اجەم ءبۇلدىرشىن كۇنىمنەن ولەڭ جاتتاتقاننان كەيىن ماعان اسا اۋىر سوقپادى. ولەڭ جاتتاعان سوڭ مانەرلەپ وقۋ، قازىلاردىڭ الدىندا سىنعا ءتۇسۋ، ساحنادا ونەر كورسەتۋ ارينە وڭاي ەمەس. دەگەنمەن بويىندا باتىلدىعى مەن دارىندىلىعى ۇشتاسقان ادامعا بۇل ءىس قيىن سوقپاق ەمەس.
- ال ءوزىڭىزدىڭ اقىندىق قابىلەتىڭىز قالاي بايقالدى؟
- اقىندىق - جاراتقاننىڭ ادام بويىنا دارىتقان ونەرى، اسىل قاسيەتى. اۋلەتىمىزدە بىرنەشە اقىن بار. اقىندىق قانمەن تارايتىن قابىلەت ەمەس، قاسيەت. قالام ۇشتاۋدان قالام ۇستاۋ قيىن. ولەڭىم تەك ءبىر باعىتتا جازىلمايدى. «ايعا سىر» اتتى جىر جيناعىمدا ءارتۇرلى تاقىرىپتارداعى ولەڭدەر قامتىلعان. شابىت كوبىنەسە تىنىشتىقتا، ءتۇن ورتاسىندا كەلەدى. الدىمەن، ويىما ولەڭنىڭ تەك تارماقتارى كەلىپ، ارى قاراي قيالدىڭ ۇشتاۋىمەن جىرلارىمدى قاعاز بەتىنە تۇسىرەمىن. بۇگىندە زايسان اۋدانىنداعى «اقبەرەن» اقىندار سىنىبىنىڭ جاس قالامگەرىمىن. وبلىستىق، رەسپۋبليكالىق ءمۇشايرالاردىڭ جۇلدەگەرىمىن.
- ايتىسقا دا قاتىسادى ەكەنسىز. سول جايلى ايتا كەتسەڭىز…
- 3-سىنىپتان باستاپ دومبىرا ۇيىرمەسىنە قاتىسىپ، 5 جىلدان سوڭ اتتەستات الدىم. ايتىسقا 8 -سىنىپتان باستاپ قاتىسىپ كەلەمىن. وسى جىلى قاڭتار ايىندا ءوڭىر بويىنشا وتكەن «جىر الىبى - جامبىل» اتتى وقۋشىلار ايتىسىندا 1 -ورىندى يەلەندىم. قازىرگى ۋاقىتتا وسى ايتىستىڭ رەسپۋبليكالىق كەزەڭىنە دايىندىق ۇستىندەمىن. وبلىستىڭ، اۋداننىڭ، مەكتەبىمنىڭ جانە اقىندار سىنىبىنىڭ نامىسىن قورعاپ، ۇمىتتەرىن اقتاپ، ابىرويىن اسقاقتاتىپ، قانجىعالى قايتۋعا تىرىسامىن. ماعان ەڭ ماڭىزدىسى - حالىقتىڭ ىقىلاسى. ەلدىڭ اق پەيىلى مەن ۇلكەندەردىڭ بەرگەن باتاسىنان ارتىق سىي جوق.
- الداعى جوسپارلارىڭىز قانداي؟ مەكتەپ بىتىرگەن سوڭ قانداي ماماندىققا تۇسكىڭىز كەلەدى؟
- مەكتەپ بىتىرگەننەن كەيىن ەلىمىزدىڭ بەدەلدى ۋنيۆەرسيتەتتەرىنىڭ بىرىنەن ءبىلىم الىپ، ونەر جولىن جالعاستارىمىن. اقىن، ايتىسكەر اتىمدى تانىتىپ، سوڭىمنان شاكىرت قالدىرعىم كەلەدى. بار ارمان-ماقساتىم - قازاق ءتىلىنىڭ تۇعىرىن بيىكتەتىپ، ءتول ونەرىمىز ايتىستى اسقاقتاتۋ!
- اڭگىمەڭىزگە كوپ راحمەت!
اۆتور
تالعاتجان مۇحامەتبەك ۇلى
