اباي وبلىسىنىڭ پوليتسەيلەرى جازعى كيىم ۇلگىسىنە كوشتى
استانا. KAZINFORM - اباي وبلىسى پوليتسيا دەپارتامەنتىندە جەكە قۇرام جازعى كيىم ۇلگىسىنە كوشكەنىنە وراي قىزمەتكەرلەردىڭ سىرتقى كەلبەتى مەن ءتارتىبىن تەكسەرۋ ماقساتىندا كەڭ اۋقىمدى ساپتىق تەكسەرىس ۇيىمداستىرىلدى.
ۆەدومستۆو باسپا ءسوز قىزمەتىنىڭ ءمالىم ەتكەنىندەي، دەپارتامەنت باستىعى پوليتسيا پولكوۆنيگى ەلدار دانياروۆ تەكسەرىس بارىسىندا قىزمەتكەرلەردىڭ سىرتقى كەلبەتى مەن مىنەز-قۇلقىنىڭ ىشكى ىستەر ورگاندارى مەن قوعامعا اسەرىن ەرەكشە اتاپ ءوتتى. ونىڭ سوزىنشە، ءاربىر قىزمەتكەر - قوعامدىق ءتارتىپ پەن زاڭدىلىقتىڭ تىرەگى، ال ولاردىڭ كاسىبيلىگى، جاۋاپكەرشىلىگى مەن ۇقىپتىلىعى - قۇقىق قورعاۋ سالاسىنداعى بەدەلدىڭ كەپىلى.
- ءبىزدىڭ باستى مىندەتىمىز - ازاماتتاردىڭ قۇقىقتارى مەن بوستاندىقتارىن قورعاۋ، زاڭدىلىق پەن ءتارتىپتى ساقتاۋ. ءاربىر قىزمەتكەر ءوز سىرتقى كەلبەتى مەن مىنەز-قۇلقى ارقىلى مادەنيەتتىڭ جانە ءتارتىپتىڭ ۇلگىسىن كورسەتۋى ءتيىس، - دەدى پوليتسيا پولكوۆنيگى.
ساپتىق تەكسەرىس بارىسىندا قىزمەتكەرلەردىڭ جازعى كيىم ۇلگىسىنە سايكەستىگى، جەكە تازالىعى جانە سىرتقى كەلبەتىنىڭ مادەني نورمالارعا ۇيلەسىمدىلىگى باعالاندى. سونداي-اق، ءبىرتۇتاس ۇجىمدىق ۇيلەسىم مەن كاسىبي دايىندىققا دا نازار اۋدارىلدى.
بۇل ءىس-شارانىڭ ماقساتى - ءتارتىپ پەن سىرتقى كەلبەت ستاندارتتارىن ساقتاۋ، سونداي-اق ازاماتتارمەن جۇمىس بارىسىندا پوليتسيا قىزمەتكەرلەرىنىڭ كاسىبيلىگى مەن سەنىمدىلىگىن ارتتىرۋ بولىپ تابىلادى. اباي وبلىسى پوليتسيا دەپارتامەنتى ءاربىر قىزمەتكەردىڭ قوعام الدىنداعى مىندەتىن جوعارى دەڭگەيدە ورىنداۋىنا ەرەكشە ءمان بەرەدى.
وسىعان دەيىن «تازا قازاقستان» اكتسياسى اياسىندا اباي وبلىسىندا 4105 قۇقىقبۇزۋشىلىقتىڭ جولى كەسىلگەنى بەلگىلى بولدى.
