اباي وبلىسىنىڭ اكىمى ەلدەن شىققان ازاماتتاردى تۋعان ولكەنى كوركەيتۋگە اتسالىسۋعا شاقىردى
سەمەي. KAZINFORM - سەمەيدە 19-20 -ماۋسىم كۇندەرى «تۋعان جەرگە تۋىڭدى تىك» اتتى ينۆەستيتسيالىق فورۋم وتەدى.
وبلىس اكىمى بەرىك ءۋالي ءوڭىر ءۇشىن ماڭىزدى شارا قارساڭىندا ايماقتان شىققان ءىرى كاسىپكەرلەر مەن ىسكەر ازاماتتارعا ۇندەۋ جولداپ، تۋعان ولكەنى كوركەيتۋگە اتسالىسۋعا شاقىردى.
- بۇل - ءار ازاماتتىڭ تۋعان توپىراعىنا تاعزىم جاساپ، كىندىك قانى تامعان قاسيەتتى مەكەنگە قۇرمەتىن بىلدىرۋگە تاماشا مۇمكىندىك. فورۋم - الىستا جۇرسە دە، جۇرەگى تۋعان ەل دەپ سوققان جەرلەستەرىمىزدىڭ باسىن قوساتىن، ورتاق ماقساتتار مەن ىزگى نيەتتەر توعىساتىن ماڭىزدى الاڭ. الدىمىزدا تۇرعان ماڭىزدى مىندەتتەرىمىزدىڭ ءبىرى - ءوڭىرىمىزدىڭ الەۋمەتتىك-ەكونوميكالىق الەۋەتىن ارتتىرۋ، جاڭا جۇمىس ورىندارىن اشۋ. مەن سىزدەردى تۋعان جەردىڭ دامۋىنا ءوز ۇلەستەرىڭىزدى قوسۋعا شاقىرامىن. بۇل - تەك قانا ازاماتتىق بورىش ەمەس، ۇرپاق الدىنداعى امانات، ەل بولاشاعىنا باعىتتالعان ىرگەلى قادام، - دەدى ايماق باسشىسى.
وبلىس اكىمى جاقىندا ءوڭىردىڭ الداعى دامۋ جوسپارىن جاريالادى. سوعان سايكەس سەمەيدە 75 مىڭ تۇرعىنعا ارنالعان جاڭا ىقشاماۋدان سالىنادى.
- مۇندا تۇرعىن ءۇي كەشەندەرى، 40-تان استام اكىمشىلىك، كوممەرتسيالىق جانە الەۋمەتتىك نىساندار، ساياباقتار بوي كوتەرەدى. جوبا اياسىندا بولاشاقتا جاستار سارايى، جەكپە-جەك سارايى، عالىمدار ءۇيى، مەديا ورتالىق، كورمە ورتالىعى، دوستىق ءۇيى، ينۆەستورلار ورتالىعى، مۋزىكالىق مەكتەپ، فيلارمونيا، ەتنوساياباق، ستاديون، كوللەدج، مۋزەي، بالاباقشالار، قوناقۇيلەر مەن ساۋدا كەشەندەرىن سالۋ جوسپارلانىپ وتىر. ءوڭىرىمىزدىڭ وركەندەۋى جولىندا كوپ بولىپ جۇمىلىپ، بىرلىك پەن سەنىمدى سەرىك ەتسەك، كەز كەلگەن كۇردەلى ماسەلەنىڭ ءتۇيىنىن تارقاتۋعا بولادى. وبلىستى دامىتۋدىڭ كەشەندى جوسپارىنا شەتەل ينۆەستورلارىن تارتۋ باعىتى دا قارقىن الا باستادى. سىزدەردى دە ايماقتىڭ العا باسۋىنا بىرگە اتسالىسۋعا شاقىرامىن، - دەدى ايماق باسشىسى.
وسىعان دەيىن بەرىك ءۋالي اباي وبلىسىنىڭ دامۋ جوسپارىن تانىستىرعان بولاتىن.
