اباي وبلىسىندا ورتەنگەن اعاشتى وڭدەۋ زاۋىتى سالىنادى - مينيستر

استانا. KAZINFORM - «سەمەي ورمانى» رەزەرۆاتىندا ورتەنگەن ورمان اعاشتارىن تازارتۋ جۇمىستارى باستالدى. بۇل تۋرالى پارلامەنت ماجىلىسىندە ورماندى قورعاۋ تاقىرىبىنا ارنالعان ۇكىمەت ساعاتىندا ق ر ەكولوگيا جانە تابيعي رەسۋرستار ءمينيسترى ەرلان نىسانبايەۆ ايتتى.

« اباي وبلىسىنىڭ اۋماعىندا ورمان ورتىنەن كەيىنگى زارداپتى جويۋ بويىنشا مينيسترلىك قابىلداعان شارالارعا توقتالىپ وتپەكپىن. بىرىنشىدەن، 2023 -جىلعى قازان ايىندا مينيسترلىك جەدەل شتاب قۇردى. ونىڭ قۇرامىنا ورمان شارۋاشىلىعى جانە جانۋارلار دۇنيەسى اۋماقتىق ينسپەكتسيانىڭ وكىلدەرى، «سەمەي ورمانى» رەزەرۆاتىنىڭ ماماندارى، اباي وبلىسىنىڭ اكىمدىگى مەن قۇقىق قورعاۋ ورگاندارىنىڭ وكىلدەرى كىردى. ەكىنشىدەن، ءتيىستى جول كارتاسى بەكىتىلدى. ءورت شالعان ەكپەلەرگە قاتىستى ورمان ماماندارى جۇرگىزگەن زەرتتەۋلەردىڭ ناتيجەلەرى بويىنشا اعاش زيانكەستەرى مەن اۋرۋلارى بايقالعان. وسىعان بايلانىستى ورمان زيانكەستەرىنىڭ تارالۋىنا جول بەرمەۋ جانە اعاشتى ساقتاۋ ماقساتىندا بۇلىنگەن سۇرەكتى جيناپ الۋدى بارىنشا قىسقا مەرزىمدە جۇزەگە اسىرۋ قاجەت»، - دەدى ە. نىسانبايەۆ.

ونىڭ ايتۋىنشا، الدىن الا دەرەكتەر بويىنشا ورتەنگەن اعاشتىڭ كولەمى شامامەن 6 ميلليون تەكشە مەتردى قۇرادى. رەزەرۆاتتا بار تەحنيكا مەن جابدىقتار، سونداي-اق ادام رەسۋرستارى ورمان شارۋاشىلىعى جۇمىستارىنىڭ وسىنداي كولەمىن ورىنداۋعا ەسەپتەلمەگەن. وسىعان بايلانىستى ارنايى تەحنيكا مەن جابدىقتارىن ساتىپ الۋ قاجەت.

« ورتەنگەن ورمان اعاشتارىنىڭ جالپى كولەمىنىڭ شامامەن 80 پايىزى وتىندىق اعاش. سوندىقتان بۇل ايماقتا اعاشتى تەرەڭدەتىپ وڭدەۋ زاۋىتىن سالۋ كەرەك. بۇل رەتتە، مينيسترلىك اباي وبلىسىنىڭ اكىمدىگىمەن بىرلەسىپ، ورمان ورتىنەن بۇلىنگەن سۇرەكتى تەرەڭدەتىپ وڭدەۋ زاۋىتىن سالۋ ءۇشىن ينۆەستورلاردى تارتۋ ماسەلەسىن پىسىقتاپ جاتىر. قازىر 4 كومپانيا وسىعان مۇددەلى ەكەنىن ءبىلدىردى»، - دەدى مينيستر.

سونىمەن قاتار ول قوستاناي وبلىسىندا ورتەنگەن ورمان اعاشتارىنىڭ كولەمىن ەسكەرە وتىرىپ، جالپى رەسپۋبليكا بويىنشا اعاش وڭدەۋ ونەركاسىبىن دامىتۋ ماسەلەسى بار ەكەنىن ايتتى.

«اتاپ ايتقاندا، «سەمەي ورمانى» رەزەرۆاتىندا ورتەنگەن ورمان اعاشتارىن تازارتۋ جۇمىستارى بيىلعى 15-قاڭتاردان باستالدى. بۇل جۇمىستى رەزەرۆات ءوز كۇشىمەن ىسكە اسىرىلىپ جاتىر. قازىر 415 تەكشە مەترى دايىندالدى. جۇمىستىڭ اۋقىمدىلىعىن (6 ميلليون تەكشە مەتر) ەسكەرە وتىرىپ، وسى جۇمىستارعا ورمان شارۋاشىلىعى جانە جانۋارلار دۇنيەسى كوميتەتىنىڭ رەزەرۆاتقا جاقىن ورنالاسقان تابيعات قورعاۋ مەكەمەلەرىن جۇمىلدىرۋ جوسپارلانعان»، - دەدى ەرلان نىسانبايەۆ.

اۆتور

رۋسلان عابباسوۆ