اباي وبلىسىندا 10-سىنىپ وقۋشىسى ءبىر اپتادا ەرەكشە موبيلدى ويىن جاساپ شىعاردى
سەمەي. KAZINFORM - اباي وبلىسىنىڭ وقۋشىسى رەسپۋبليكالىق ويىن جاساۋ بايقاۋىندا جەڭىمپاز اتانىپ، 1 ميلليون تەڭگە جەڭىپ الدى.
اباي وبلىسىنداعى «ءبىلىم- يننوۆاتسيا» ليسەيىنىڭ 10-سىنىپ وقۋشىسى جالعاس تۋكەن رەسپۋبليكالىق GDC GameJam بايقاۋىندا توپ جاردى. بۇل بايقاۋدى Astana Hub پەن Grand Mobile ۇيىمداستىرعان. وندا ەلدىڭ ءار وڭىرىنەن كەلگەن 25 كوماندا قاتىستى.
ويىن شارتى بويىنشا ءبىر اپتا ىشىندە ءوز ويىنىن جاساپ شىعۋلارى كەرەك. جالعاس وسى سايىستا «Bombergirl» موبيلدى ويىنىن ۇسىنىپ، باس جۇلدەنى جەڭىپ الدى.
- ويىننىڭ مازمۇنى بويىنشا، باس كەيىپكەر حوللي تۋعان قالاسىن ۆيرۋس پەن تەحنيكالىق اقاۋلاردان قۇتقارۋى ءتيىس. ويىن بارىسىندا ءتۇرلى تاپسىرما ورىنداپ، سيۋجەت بويىنشا جاڭا مالىمەت اشىلادى. قالانىڭ تۇرعىندارىنا كومەكتەسۋ ءۇشىن ءارتۇرلى كەدەرگىلەردەن ءوتۋ قاجەت. «Bombergirl» ويىنى Unity پلاتفورماسىندا جاسالىپ، C# باعدارلامالاۋ تىلىندە جازىلعان. 2D فورماتتا ازىرلەنگەن جوبا وزىنە ءتان كوركەمدىك ءستيلى، جارىق پەن دىبىس ەففەكتىلەرىمەن ەرەكشەلەنەدى. ويىن كارتاسى ءار جولى جاڭا الگوريتممەن اۆتوماتتى تۇردە جاسالادى. سوندىقتان ءار ويناعاندا جاڭا ورتا پايدا بولادى، - دەپ حابارلادى وبلىستىق ءبىلىم باسقارماسىنىڭ باسپا ءسوز قىزمەتىنەن.
قازىر ويىن Play Market كە شىعۋعا دايىندالىپ جاتىر. الداعى ۋاقىتتا iOS جۇيەسىنە دە بەيىمدەلمەك. ويىن تەك اعىلشىن تىلىندە، ءبىراق بولاشاقتا قازاق، ورىس جانە باسقا تىلدەردى قوسۋ جوسپاردا بار.
- جالعاس بولاشاقتا بۇل ويىندى دامىتىپ، جاڭا دەڭگەيلەر قوسۋ، مونەتيزاتسيا ەنگىزۋ جانە كاسىبي ستۋديالارمەن بىرلەسىپ جۇمىس ىستەۋدى جوسپارلاپ وتىر. جۇلدەدەن تۇسكەن قارجىعا ول كاسىبي سۋرەتشى جالداپ، تەحنيكالىق قۇرال- جابدىقتارىن جاڭارتپاق، - دەلىنگەن اقپاراتتا.
ەسكە سالساق، وسىعان دەيىن الماتىلىق وقۋشىلار NASA بايقاۋىندا جەڭىسكە جەتكەنى حابارلانعان.
