اباي وبلىسى قايتا قۇرىلعاننان بەرى ۇكىمەت رەزەرۆىنەن 44,3 ميلليارد تەڭگە العان

استانا. KAZINFORM - پرەمەر-مينيستر ولجاس بەكتەنوۆ ءماجىلىس دەپۋتاتتارىنىڭ ساۋالىنا جولداعان جاۋاپتا اباي وبلىسىن دامىتۋعا قانداي كوزدەردەن قاراجات ءبولىنىپ جاتقانىن ايتقان.

- اباي وبلىسى قۇرىلعان ساتتەن باستاپ ۇكىمەت رەزەرۆىنەن جالپى سوماسى 44,3 ميلليارد تەڭگە (2022 -جىلى - 6,6 ميلليارد تەڭگە؛ 2023 -جىلى - 28,8 ميلليارد تەڭگە؛ 2024 -جىلى - 8,9 ميلليارد تەڭگە)، سونىڭ ىشىندە سەمەي قالاسىنداعى 7 اكىمشىلىك عيماراتتى كۇردەلى جوندەۋگە (11 ميلليارد تەڭگە) قاراجات ءبولىندى.

وسىمەن قاتار رەسپۋبليكالىق بيۋدجەتتى كەزەكتى ناقتىلاۋ كەزىندە (شامامەن بيىلعى ماۋسىم ايىندا) جاڭاسەمەي جانە ماقانشى اۋداندارىندا اكىمشىلىك عيماراتتاردىڭ قۇرىلىسىنا قاراجات ءبولۋ ماسەلەسى قارالادى. بۇل رەتتە قازىرگى ۋاقىتتا اتالعان اۋدانداردىڭ بارلىق اكىمشىلىك ورگانى ۋاقىتشا جالعا الىنعان وفيستىك ءۇي-جايلاردا ورنالاسقانىن ايتا كەتكەن ءجون، - دەپ جازادى ولجاس بەكتەنوۆ.

سونداي-اق، پرەمەر-مينيستر جاۋابىندا بيىل وڭىردەگى وبلىستىق جانە اۋداندىق جولداردى جوندەۋگە رەسپۋبليكالىق بيۋدجەتتەن 9,9 ميلليارد تەڭگە ءبولۋ جوسپارلانعانى ايتىلعان.

- بۇگىنگى تاڭدا وبلىستىق ماڭىزى بار «اياگوز - قاراۋىل» اۆتوموبيل جولىنىڭ جالپى ۇزىندىعى 218 شاقىرىم بولادى. بيىل اۆتوموبيل جولىنىڭ 2 ۋچاسكەسىندە (84-99 ك م جانە 97-117 ك م) جالپى سوماسى 2,5 ميلليارد تەڭگەگە ورتاشا جوندەۋ جۇرگىزۋ جوسپارلانىپ وتىر، - دەلىنگەن جاۋاپتا.

رەسمي جاۋاپتان اباي وبلىسىنا تۇرعىن ءۇي قۇرىلىسىن دامىتۋ باعدارلاماسى اياسىندا بيىل 149 جالدامالى پاتەر ساتىپ الۋعا 2,1 ميلليارد تەڭگە قاراستىرىلعانىن ۇعۋعا بولادى.

- وبلىس اكىمدىگى بيىل كرەديتتىك تۇرعىن ءۇي اياسىندا 113 مىڭ شارشى مەتردى (1870 پاتەر) 2 سالۋعا جانە ساتىپ الۋعا 8,8 ميلليارد تەڭگەگە ءوتىنىم بەرگەن. بۇگىنگى كۇنى 2,8 ميلليارد تەڭگە ماقۇلداندى، - دەيدى ولجاس بەكتەنوۆ.

اۆتور

ەسىمجان ناقتىباي