«اباي اكادەمياسى» ەنسيكلوپەديالىق پورتالى اشىلدى
سەمەي. KAZINFORM - اباي وبلىسىندا ابايدىڭ 180جىلدىعىنا ارنالعان ونكۇندىك مەرەيتويلىق شارالار باستالدى. بۇگىن سەمەي قالاسىنداعى مۇحتار اۋەزوۆ اتىنداعى پەداگوگيكالىق كوللەدجدىڭ «ەس- ايماق» رۋحاني ورتالىعىندا «Abai akademiasy» اتتى ەنتسيكلوپەديالىق پورتالدىڭ تۇساۋكەسەرى ءوتتى.
اباي شىعارماشىلىعىنا ارنالعان تۇڭعىش ەنتسيكلوپەديالىق پورتالدىڭ تانىستىرىلىمىنا وبلىس اكىمى بەرىك ءۋالي، زيالى قاۋىم وكىلدەرى، ابايتانۋشى عالىمدار قاتىستى.
«Abai akademiasy» جوباسىنىڭ جەتەكشىسى ايجان تاباراك قىزى جينالعاندارعا پورتالدى تانىستىردى.
«Abai akademiyasy» پورتالى - اباي مۇراسىن وسكەلەڭ ۇرپاققا ناسيحاتتايتىن، اقىن تۋرالى تولىق مالىمەت ۇسىناتىن عىلىمي- تانىمدىق دەرەككوز. پلاتفورمادا اقىننىڭ ادەبي، عىلىمي، پۋبليتسيستيكالىق جانە ەپيستوليارلىق ەڭبەكتەرى تەكستولوگيالىق ساراپتامامەن، ءتۇرلى فورماتتا جيناقتالعان. ماتەريالدار اباي ينستيتۋتتارى، عىلىمي ورتالىقتار، ارحيۆتەر مەن مۇراجايلاردان الىنىپ، سيفرلى تۇردە ەنگىزىلگەن. سونداي-اق تەلە-راديو حابارلار مەن دەرەكتى فيلمدەر دە قامتىلعان.
ەنسيكلوپەديالىق پورتالدىڭ تۇساۋكەسەرىندە ءسوز سويلەگەن ايماق باسشىسى اباي تويى بيىل تۇڭعىش رەت 10 كۇندىك رەتىندە اتاپ وتىلەتىنىن ايتىپ، 1-10 -تامىز ارالىعىندا سەمەي قالاسى مەن اباي، وبلىستىڭ وزگە دە اۋداندارىندا ءتۇرلى مادەني-رۋحاني، تانىمدىق، ينتەللەكتۋالدىق ءىس-شارالاردىڭ جوسپارلانىپ وتىرعانىنا توقتالدى.
«اتاپ ءوتۋ كەرەك، اتالعان 10 كۇندىكتىڭ وتۋىنە قارجىنى تۇگەلدەي جاناشىر دەمەۋشىلەر كوتەرىپ وتىر. اباي تويىنىڭ وڭىرىمىزگە ەڭ باستى سىيلىعى - مەملەكەت باسشىسىنىڭ قولداۋىمەن باستالعان «ابايعا قۇرمەت» اكسياسى. حاكىمنىڭ تويىندا ەلىمىزدىڭ ءار ءوڭىرى جاڭادان قۇرىلعان وبلىسىمىزعا ءبىر نىساننان سالىپ بەرەتىن بولدى. ماڭعىستاۋ «دوستىق ءۇيىن»، شىمكەنت شىعارماشىلىق ورتالىق، تۇركىستان كورمە ورتالىعىن، استانا جايلى مەكتەپ، اقتوبە جەكپە جەك ورتالىعى، پاۆلودار وبلىسى ۇستەل تەننيس ورتالىعىن سالۋعا، شىعىس قازاقستان ەرتىس جاعالاۋىن جاساپ بەرەمىز دەپ وتىر. وزگە وڭىرلەر دە حابارلاسىپ، ىقىلاس-نيەتتەرىن ءبىلدىرىپ جاتىر» دەدى وبلىس اكىمى.
ەنسيكلوپەديالىق پورتالدىڭ اباي مۇراسىن زاماناۋي فورماتتا جەتكىزۋ تۇرعىسىندا ماڭىزدى ەكەنىن اتاپ ءوتتى.
- مەملەكەت باسشىسى قاسىم-جومارت كەمەل ۇلى توقايەۆ «اباي جانە 21 -عاسىرداعى قازاقستان» اتتى ماقالاسىندا «ابايدىڭ شىعارمالارىنا زەر سالساق، ونىڭ ۇنەمى ەلدىڭ العا جىلجۋىنا، ءوسىپ-وركەندەۋىنە شىن نيەتىمەن تىلەۋلەس بولعانىن، وسى يدەيانى بارىنشا دارىپتەگەنىن بايقايمىز. ال، ىلگەرىلەۋدىڭ نەگىزى ءبىلىم مەن عىلىمدا ەكەنىن انىق بىلەمىز. اباي قازاقتىڭ دامىلسىز وقىپ-ۇيرەنگەنىن بار جان-تانىمەن قالادى. «عىلىم تاپپاي ماقتانبا» دەپ، ءبىلىمدى يگەرمەيىنشە، بيىكتەردىڭ باعىنا قويمايتىنىن ايتتى» دەپ ابايدىڭ مۇراتىن، ماقساتى مەن ارمانىن جىلىكتەپ ايتىپ، بۇگىنگى قازاق بالاسىنا وي سالعان بولاتىن. دەمەك، بۇگىن كوپكە جول تارتاتىن ابايعا ارنالعان ەنتسيكلوپەديالىق پورتال، حاكىم مۇرالارىن وسكەلەڭ ۇرپاققا ناسيحاتتاۋ جولىندا نەگىزگى باعدارشام بولماق. سونداي-اق اباي تۋرالى اقپارات ىزدەگەن ادام «Abai akademiyasy» پورتالى ارقىلى تولىققاندى قول جەتكىزە الادى، - دەدى ايماق باسشىسى.
شارا بارىسىندا ابايتانۋشى اراپ ەسپەنبەتوۆ، «جيدەباي- ءبورىلى» مۋزەي- قورىعىنىڭ ديرەكتورى ۇلان ساعاديەۆ، ادەبيەتتانۋشى، PhD دوكتورى قارلىعاش اۋباكىر ەنسيكلوپەديالىق پورتال تۋرالى پىكىرلەرىن ايتتى.
- بۇگىن اشىلىپ وتىرعان «Abai akademiasy» ەنسيكلوپەديالىق پورتالى - عىلىمي، مادەني، اقپاراتتىق ورتاداعى بۇرىن-سوڭدى بولماعان ەرەكشە قۇبىلىس دەپ ايتۋعا تولىق نەگىز بار. ەلەكتروندىق پورتال بارىمىزگە ورتاق. ول جاس عالىمعا دا، ىزدەنۋشىگە دە، ستۋدەنتكە دە، وقۋشىعا دا، قاراپايىم جۇمىسشىعا دا ورتاق. ءوزىنىڭ دوسى سياقتى اڭگىمەلەسىپ، قاجەتتى دەرەكتەرىن قابىلداپ، ارى قاراي ءوزىنىڭ ۇلى اقىن تۋرالى ويلارى مەن قارىمدارىن دامىتاتىنى ءسوزسىز. ابايدى بىلەمىن، تانيمىن، ۇعامىن، تۇسىنەمىن دەيتىن جاننىڭ بارلىعىنا كومەك بەرەتىن، ەڭ ۇلكەن باستى قۇرال، ەنسيكلوپەديا، - دەدى اراپ ەسپەنبەتوۆ.
بۇگىن ونكۇندىك اياسىندا سەمەيدەگى بەيبىتشىلىك ارالىندا ەتنواۋىل قالاشىعى، بەلگىلى سۋرەتشى اڭساعان مۇستافانىڭ «كوڭىلگە ءتۇرلى وي سالار» اتتى كورمەسى اشىلادى. «ارەنا» مادەني- سپورت كەشەنىندە «ادامزاتتىڭ الىبى - حاكىم اباي» اتتى مەرەيتويلىق گالا-كونسەرت وتەدى.
