ا ە س قۇرىلىسىنا قاتىستى رەفەرەندۋمدا ءبىرىنشى بولىپ سەۋلدەگى قازاقستاندىق داۋىس بەردى
استانا. KAZINFORM - قازاقستان رەسپۋبليكاسىنىڭ ازاماتتارى رەفەرەندۋمدا وزدەرىنىڭ كونستيتۋتسيالىق قۇقىقتارىن العاشقىلاردىڭ ءبىرى بولىپ كورەيا رەسپۋبليكاسىندا جۇزەگە اسىردى.
بۇل تۋرالى سىرتقى ىستەر مينيسترلىگىنىڭ باسپا ءسوز قىزمەتى حابارلادى.
سەۋلدەگى رەفەرەندۋمدا ءبىرىنشى قازاقستاندىق بولىپ حالىقارالىق ۇيىم قىزمەتكەرى كاميلا ماۋتوۆا داۋىس بەردى.
«بۇل شەشىمنىڭ ەلىمىزدىڭ بولاشاعى ءۇشىن ماڭىزى زور، ال رەفەرەندۋم - قوعامنىڭ بارلىق كوزقاراسىن ەسكەرۋ، شەشىم قابىلداۋدا اشىقتىقتى قامتاماسىز ەتۋ مۇمكىندىگى. ۇكىمەت اركىمنىڭ پىكىرىن تىڭداۋعا تىرىسادى جانە ءبىز، ازاماتتار ءۇشىن بۇل ۇدەرىسكە بەلسەندى قاتىسۋ وتە ماڭىزدى»، - دەدى ك. ماۋتوۆا.
ول سونداي-اق شەتەلدە تۇراتىن كوپتەگەن قازاقستاندىق ءبىزدىڭ ديپلوماتيالىق وكىلدىكتەردىڭ كۇش- جىگەرىنىڭ ارقاسىندا رەفەرەندۋمعا قاتىسۋ مۇمكىندىگىنە يە بولعانىن ايتتى.
«بۇل ءبىزدىڭ ەلىمىزدىڭ بولاشاعى ءۇشىن ماڭىزدى شەشىم قابىلداۋدىڭ ۇجىمدىق مۇمكىندىگى جانە بۇل رەفەرەندۋم ەكونوميكالىق دامۋ ءۇشىن جاڭا مۇمكىندىكتەر اشادى دەپ ويلايمىن»، - دەدى داۋىس بەرۋشى.
ق ر سىرتقى ىستەر مينيسترلىگىنىڭ مالىمەتىنشە، شەتەلدەگى بارلىق رەفەرەندۋم ۋچاسكەلەرى قازاقستاننىڭ ديپلوماتيالىق وكىلدىكتەرىنىڭ اۋماقتارىندا ۇيىمداستىرىلعان.
ەڭ ءبىرىنشى بولىپ قازاقستاندىقتار كورەيا مەن جاپونيادا داۋىس بەرۋگە مۇمكىندىگى بار.
سەۋلدە #390 جانە توكيودا #393 سايلاۋ ۋچاسكەلەرى جەرگىلىكتى ۋاقىت بويىنشا ساعات 07.00 دە داۋىس بەرۋ ءۇشىن ءبىرىنشى بولىپ اشىلدى.
ايتا كەتەيىك، قازاقستان حالقى بۇگىن ا ە س قۇرىلىسىنا قاتىستى تاڭداۋ جاسايدى.
