ا ە س-تىڭ بالقاش كولىنە قانداي اسەرى بولادى -ساراپشىلار جاۋاپ بەردى

الماتى. KAZINFORM – ا ە س قۇرىلىسىنا بايلانىستى الماتىدا وتكەن قوعامدىق تالقىلاۋ كەزىندە «قازاقستاندىق اتوم ەلەكتر ستانتسيالارى» ا ق باس ديرەكتورى تيمۋر جانتيكين بايانداما جاسادى. ول ەلىمىزدە اتوم ەنەرگەتيكاسىن دامىتۋدىڭ جوسپارلارىن تانىستىردى.

- قازاقستاندا اتوم ستانتسياسىن سالۋ مۇمكىندىگىن زەرتتەۋ ءۇشىن ارنايى «قازاقستاندىق اتوم ەلەكتر ستانتسيالارى» كومپانياسى قۇرىلدى، مەن ونىڭ ديرەكتورىمىن. ۇكىمەتتىڭ تاپسىرماسى بويىنشا اەس سالۋعا ەكى اۋدان قاراستىرىلدى. ونىڭ ءبىرى - بۇگىنگى اباي وبلىسىنداعى كۋرچاتوۆ قالاسىنىڭ ماڭى، ەكىنشىسى - الماتى وبلىسىنداعى ۇلتەن اۋىلى. وسى ەكى اۋداندا اەجحا- نىڭ (اتوم ەنەرگياسى جونىندەگى حالىقارالىق اگەنتتىك) ۇسىنىستارى بويىنشا زەرتتەۋلەر جۇرگىزىلدى جانە ەكەۋى دە اتوم ەلەكتر ستانتسياسىن ورنالاستىرۋعا جارامدى ەكەنى انىقتالدى. سودان كەيىن 2019 -جىلى جاپون كونسورتسيۋمى تاۋەلسىز ساراپتاما جۇرگىزدى. ولار ءبىزدىڭ بارلىق قۇجاتتارىمىزدى، ادىستەمەلەرىمىزدى زەرتتەپ، العاشقى اتوم ستانتسياسى ءۇشىن الماتى وبلىسىنداعى ۇلكەن اۋىلىنىڭ ماڭى جارامدى دەگەن قورىتىندى جاسادى، - دەدى سپيكەر.

سونداي- اق تيمۋر جانتيكين قازاقستاندا اتوم ەلەكتر ستانتسياسىن سالۋعا 13 ۇسىنىس تۇسكەنىن، الايدا ونىڭ تەك تورتەۋى ىرىكتەلىپ الىنعانىن اتاپ ءوتتى.

- 2019 -جىلى ءبىز ءوزىن ەڭ قاۋىپسىز تەحنولوگيا رەتىندە تانىتقان +3 بۋىنىنىڭ رەاكتورلارىن قاراستىرىپ، ۇسىنىستاردى قابىلدادىق. ءارتۇرلى جوبالار بويىنشا 13 ۇسىنىس ءتۇستى، ءبىز ەكەۋىن الىپ تاستادىق. ەنەرگەتيكا مينيسترلىگىمەن بىرگە كريتەرييلەر جۇيەسىن ازىرلەپ، وعان سايكەس جوبالاردى باعالادىق. وسىلايشا، بارلىعىنىڭ ىشىنە قىتاي، رەسەي، وڭتۇستىك كورەيا جانە فرانسيا ۇسىناعان 4 جوبا ىرىكتەلىپ الىندى، - دەدى ول.

تيمۋر جانتيكين «ا ە س-تىڭ بالقاش كولىنە قانداي اسەرى بولادى» دەگەن سۇراققا جاۋاپ بەردى. ونىڭ ايتۋىنشا، اتوم ەلەكتر ستانتسياسىنىڭ كەسىرىنەن بالقاش كولى تارتىلىپ كەتەدى دەۋ - ەشقانداي نەگىزى جوق الىپ قاشپا ءسوز.

- اتوم ستانتسياسى كوپ سۋ قولدانعاندىقتان، بالقاش كولىندە ەكولوگيالىق ماسەلە تۋىنداۋى مۇمكىن دەگەن الىپ قاشپا ءسوز بار. سۋ نەگىزىندە جۇمىس ىستەيتىن سالقىنداتۋ مۇنارالارىن پايدالاعان جاعدايدا جوبا بويىنشا جىلىنا 61 ميلليون تەكشە مەتر سۋ قولدانىلادى. ال شىن مانىندە 30-40 ميلليون تەكشە مەتردەن اسپايدى. 61 ميلليون تەكشە مەتر سۋ دەگەن نە، بۇل كول بەتىندەگى تابيعي سۋ بۋلانۋىنىڭ %0,3 ىنا تەڭ. ياعني، مۇنداي ستانتسيا كولگە ەشقانداي اسەر ەتپەيدى، - دەدى مامان.

تيمۋر جانتيكين ءسوز سوڭىندا اتوم ەلەكتر ستانتسياسى سالىنعان جاعدايدا قۇرىلىس، ماشينا جاساۋ، ەنەرگەتيكا، عىلىم جانە ءبىلىم بەرۋ سالالارىندا 8000 عا جۋىق جوعارى بىلىكتى جۇمىس ورىندارى قۇرىلاتىنىن اتاپ ءوتتى.