ا ق ش ۆيزاسى: ەلشىلىك قازاقستاندىقتارعا ماڭىزدى ەسكەرتۋ جاسادى

استانا. KAZINFORM – ا ق ش- تىڭ قازاقستانداعى ەلشىلىگى مەن كونسۋلدىعى قازاقستاندىقتار ءۇشىن ماڭىزدى حابارلاما جاريالادى.

ەسكەرتۋ يمميگراتسيالىق ەمەس ۆيزالارعا ءوتىنىش بەرۋشىلەرگە قاتىستى. 2025-جىلدىڭ 2-مامىرىنان باستاپ، ۆيزا الۋ ءۇشىن سۇحباتقا جازىلۋ ۋاقىتى بەلگىلەنگەن كۇننەن ءۇش جۇمىس كۇنى بۇرىن، ساعات 17:00 دە جابىلادى. بۇل DS-160 فورماسى تولىقتاي تولتىرىلىپ، سۇحباتتان كەمىندە ءۇش جۇمىس كۇنى بۇرىن، ساعات 17:00 گە دەيىن جىبەرىلۋى ءتيىس دەگەندى بىلدىرەدى. وزگەرىستەر استانا مەن الماتىداعى كونسۋلدىق بولىمدەردە وتەتىن بارلىق ۆيزالىق سۇحباتتارعا قاتىستى.

مىسالى: ەگەر ءسىزدىڭ سۇحباتىڭىز 2-مامىرعا جوسپارلانعان بولسا، DS-160 فورماسىن 28-ءساۋىر ساعات 17:00 گە دەيىن تولتىرىپ، جىبەرۋىڭىز قاجەت.

قانداي تالاپتاردى ساقتاۋ قاجەت

ا ق ش ەلشىلىگى كەلەسى تالاپتاردىڭ بۇزىلۋى سۇحباتتىڭ جويىلۋىنا جانە ءوتىنىش بەرۋشىنىڭ «كەلمەگەن» (no show) رەتىندە بەلگىلەنۋىنە اكەلەتىنىن ەسكەرتتى:

DS-160 فورماسىنىڭ شتريح-كود ءنومىرى (AA00 دەپ باستالادى) سۇحباتقا جازىلۋ جۇيەسىنە ەنگىزىلگەن نومىرمەن سايكەس كەلۋى كەرەك. ءجيى كەزدەسەتىن قاتە - «0» سانىن «O» ارپىمەن شاتاستىرۋ.

DS-160 فورماسىندا كورسەتىلگەن قالا سۇحبات وتەتىن قالاعا سايكەس بولۋى قاجەت. مىسالى، ەگەر فورمادا الماتى كورسەتىلسە، ال سۇحبات استانادا جوسپارلانعان بولسا - دۇرىس قالا كورسەتىلگەن جاڭا فورما تولتىرۋ قاجەت.

الدىڭعى سۇحباتقا كەلمەگەن جاعدايدا - جاڭا DS-160 فورماسىن تولتىرىپ، جاڭا شتريح-كود ءنومىرىن جۇيەدە جاڭارتۋ قاجەت.

فورما ۋاقىتىندا تولىق تولتىرىلىپ، جىبەرىلۋى ءتيىس. قۇجاتتاردى سوڭعى ساتتە جىبەرۋ ءجيى كەزدەسەتىن جاعداي، الايدا ەندى بۇل سۇحباتتىڭ جويىلۋىنا سەبەپ بولۋى مۇمكىن.

ەلشىلىك ەگەر ۆيزا راسىمدەۋ ۆيزالىق اگەنت نەمەسە ءۇشىنشى تۇلعا ارقىلى جۇرگىزىلسە دە ءوتىنىش بەرۋشىلەرگە دەرەكتەردىڭ دۇرىستىعىنا وزدەرى جاۋاپتى ەكەنىن ەسكەرتتى.

«ەگەر ءسىز ۆيزالىق سۇحباتتى اگەنت نەمەسە ءۇشىنشى تاراپ ارقىلى تاعايىنداساڭىز، DS-160 فورماسىنىڭ تالاپتارعا ساي ەكەنىنە كوز جەتكىزۋ ءۇشىن سول اگەنتپەن بايلانىس ورناتۋعا ءوزىڭىز جاۋاپتىسىز»، - دەلىنگەن حابارلامادا.

DS-160 فورماسىنداعى دەرەكتەردى قالاي تەكسەرىپ، جاڭارتۋعا بولادى:

https://ceac.state.gov/genniv/ سىلتەمەسى ارقىلى فورمانى تەكسەرىپ نەمەسە جاڭاسىن تولتىرىڭىز؛

شتريح-كود ءنومىرىن جاڭارتۋ ءۇشىن https://ais.usvisa-info.com/en-kz/niv سايتىنا كىرىپ، «ءوتىنىش بەرۋشىنىڭ دەرەكتەرى» بەتىندە «دوڭگەلەك» بەلگىشەسىن باسىپ، «وزگەرتۋ» بەلگىسىن تاڭداڭىز. جاڭا شتريح-كود ءنومىرىن ەنگىزىپ، وزگەرىستەردى ساقتاڭىز.

ەلشىلىك DS-160 فورماسىن تولتىرۋدى كەيىنگە قالدىرماۋعا كەڭەس بەرەدى - بۇل كەشىگۋلەر مەن سۇحبات كۇنىن قايتا بەلگىلەۋ قاجەتتىگىنەن ساقتايدى.