ا ق ش-تىڭ يرانداعى يادرولىق نىسانداردى بومبالاۋى ايماق ءۇشىن «قاۋىپتى بۇرىلىستى» بىلدىرەدى - ب ۇ ۇ

استانا. KAZINFORM - جەكسەنبى كۇنى ب ۇ ۇ قاۋىپسىزدىك كەڭەسى يراننىڭ سۇرانىسى بويىنشا بۇل ەلدىڭ يادرولىق نىساندارىنا جاسالعان سوڭعى سوققىلارعا بايلانىستى شۇعىل وتىرىس وتكىزدى، دەپ حابارلايدى Kazinform.

جيىندا ءسوز سويلەگەن ب ۇ ۇ باس حاتشىسى انتونيۋ گۋتەرريش قۇراما شتاتتاردىڭ يراننىڭ يادرولىق نىساندارىن بومبالاۋى ايماق ءۇشىن «قاۋىپتى بۇرىلىستى» بىلدىرەتىنىن مالىمدەدى.

- الەم دە وسى قاۋىپتى قاقتىعىستىڭ سالدارىنان قۇتىلا المايدى، - دەپ قوستى باس حاتشىنىڭ ساياسي ماسەلەلەر جونىندەگى كومەكشىسى ميروسلاۆ ەنچا.

«ديپلوماتيا جەڭۋى كەرەك»

گۋتەرريش تاياۋ شىعىستاعى كەز كەلگەن اسكەري شيەلەنىستى تاعى دا ايىپتاپ، «جاۋاپ سوققىلار تىزبەگىنە ۇلاسۋ قاۋپى» بار ەكەنىن ەسكەرتتى.

- مۇنىڭ الدىن الۋ ءۇشىن ديپلوماتيا باسىم بولۋى كەرەك، - دەدى باس حاتشى.

ەنچا يران پارلامەنتىنىڭ جاھاندىق ەنەرگيا ءترانزيتىنىڭ ەڭ ماڭىزدى تەڭىز باعىتى - ورمۋز بۇعازىن جابۋ شارالارىن ءبىراۋىزدان قولداعانىن اتاپ ءوتتى. بۇل ماسەلە بويىنشا سوڭعى شەشىمدى يراننىڭ ۇلتتىق قاۋىپسىزدىك جوعارى كەڭەسى قابىلداۋى كەرەك.

- مەن تەڭىزدە جۇزۋگە قاتىستى حالىقارالىق قۇقىق بويىنشا بارلىق مەملەكەتتەردىڭ قۇقىقتارى مەن مىندەتتەرىن ەسكە سالامىن، - دەدى باس حاتشىنىڭ كومەكشىسى.

ب ۇ ۇ باسشىسى تەڭىزدە ءقاۋىپسىز كەمە قاتىناسى قامتاماسىز ەتىلۋى كەرەك ەكەنىن اتاپ ءوتتى.

گۋتەرريش سوعىس قيمىلدارىن دەرەۋ توقتاتىپ، يراننىڭ يادرولىق باعدارلاماسى بويىنشا كەلىسسوزدى قايتا باستاۋعا شاقىردى. ونىڭ مالىمدەۋىنشە، يران يادرولىق قارۋدى تاراتپاۋ تۋرالى كەلىسىمدى ورىنداۋى جانە ب ۇ ۇ- عا مۇشە بارلىق ەل جارعى مەن حالىقارالىق قۇقىق، سونىڭ ىشىندە حالىقارالىق گۋمانيتارلىق قۇقىق نورمالارى اياسىنداعى ءوز مىندەتتەمەلەرىنە سايكەس ارەكەت ەتۋى كەرەك.

- بىزگە سەنىمگە يە بولاتىن، جان- جاقتى جانە تەكسەرىلەتىن - ماگاتە ينسپەكتورلارىنىڭ تولىق قولجەتىمدىلىگىن قوسا العاندا سەنىمدى قالپىنا كەلتىرەتىن شەشىم كەرەك. قازىر ءبىز كۇردەلى تاڭداۋدىڭ الدىندا تۇرمىز. ءبىر جول - اۋقىمدى سوعىسقا اپارادى… ەكىنشىسى - جاعدايدى باسەڭدەتۋگە، ديپلوماتيا مەن ديالوگقا باستايدى. ءبىز قاي جولدىڭ دۇرىس ەكەنىن بىلەمىز، - دەپ قورىتىندىلادى ول.

ەسكە سالا كەتسەك، ا ق ش پرەزيدەنتى دونالد ترامپ يراننىڭ يادرولىق ينفراقۇرىلىمىنا قارسى جۇرگىزىلگەن «وتە ءساتتى» اسكەري وپەراتسيا تۋرالى مالىمدەدى.

ب ۇ ۇ قاۋىپسىزدىك كەڭەسى ا ق ش- تىڭ يرانعا سوققى جاساۋىنا بايلانىستى شۇعىل جينالىس وتكىزدى.