ا ق ش- تىڭ كولىك ءمينيسترى NASA- نى ۋاقىتشا باسقاراتىن بولدى
ۆاشينگتون. KAZINFORM – ا ق ش پرەزيدەنتى دونالد ترامپ كولىك ءمينيسترى شون داففيدى ۇلتتىق اەروناۆتيكا جانە عارىش كەڭىستىگىن زەرتتەۋ باسقارماسى (NASA) اكىمشىسىنىڭ مىندەتىن ۋاقىتشا اتقارۋشى ەتىپ تاعايىندادى.
بۇل تۋرالى امەريكالىق كوشباسشى سارسەنبى كۇنى Truth Social جەلىسىندە جازدى، دەپ حابارلايدى ت ا س س.
- ءبىزدىڭ كولىك ءمينيسترىمىز شون داففيدى NASA اكىمشىسىنىڭ مىندەتىن ۋاقىتشا اتقارۋشى ەتىپ تاعايىنداعانىمدى حابارلاۋعا قۋانىشتىمىن، - دەدى ترامپ.
ونىڭ پىكىرىنشە، داففي «قىسقا مەرزىمگە بولسا دا، ماڭىزى ارتىپ كەلە جاتقان عارىش اگەنتتىگىنە تاماشا باسشى بولادى».
ماۋسىم ايىنىڭ باسىندا ترامپ NASA باسشىسى قىزمەتىنە ۇسىنىلعان ميللياردەر ءارى عارىش تۋريستى دجارەد ايزەكماننىڭ كانديداتۋراسىن قايتارىپ العان بولاتىن. بۇعان دەيىن، ءساۋىر ايىنىڭ سوڭىندا ا ق ش سەناتىنىڭ كوممەرتسيا، عىلىم جانە كولىك جونىندەگى كوميتەتى ايزەكماندى اتالعان ۆەدومستۆو باسشىسى قىزمەتىنە ۇسىنۋعا كەڭەس بەرگەن ەدى.
6-شىلدەدە ترامپ كاسىپكەر يلون ماسك ودان عارىش اگەنتتىگىنە ءوزىنىڭ جاقىن دوسىن باسشى ەتىپ تاعايىنداۋدى سۇراعانىن، ءبىراق ونىڭ ناقتى كىم ەكەنىن ايتپاعانىن جەتكىزگەن. ا ق ش- تىڭ ءبىرقاتار ب ا ق- تارى ايزەكماندى ماسكتىڭ قولداۋشىسى رەتىندە اتاعان.
بۇعان دەيىن پرەزيدەنت دونالد ترامپ ا ق ش- قا يمپورتتالاتىن مىسقا 50 پايىزدىق باج سالىعىن سالۋ جوسپارى بار ەكەنىن مالىمدەگەنىن جازدىق.
