ا ق ش-تان ءوز ەركىمەن قايتاتىن قازاقستاندىقتار 1000 ا ق ش دوللارىن قالاي الادى
استانا. KAZINFORM - امەريكا قۇراما شتاتتارىنداعى قازاقستان رەسپۋبليكاسىنىڭ ەلشىلىگى ا ق ش-تا زاڭسىز جۇرگەن قازاقستاندىقتارعا ۇندەۋ جولدادى.
- ا ق ش ىشكى قاۋىپسىزدىك مينيسترلىگى ەلدە زاڭسىز جۇرگەن ازاماتتار ءۇشىن ءوز ەركىمەن قايتۋعا مۇمكىندىك بەرەتىن جاڭا باعدارلاما قابىلداعانىنا نازار اۋدارامىز. اتالعان باعدارلاما اياسىندا ءوز ەركىمەن قايتام دەۋشىلەرگە قايتۋ بيلەتى تولىق تولەنىپ، ەلگە جەتكەن سوڭ 1000 ا ق ش دوللارى كولەمىندە قارجى ءبولۋ قاراستىرىلعان، - دەپ ءتۇسىندىردى ەلشىلىك.
ۆەدومستۆو ءمالىم ەتكەندەي، ول ءۇشىن CBP Home موبيلدى قوسىمشاسى ارقىلى ءوتىنىش بەرۋ قاجەت.
ا ق ش ىشكى قاۋىپسىزدىك ءمينيسترى كريستي نوەم بۇل باعدارلاماعا قاتىستى: «قاماۋعا الىنۋدان جانە باسقا دا قارجىلىق سالدارلاردان اۋلاق بولۋدىڭ ەڭ قاۋىپسىز، رەتتەلگەن ءارى ۇنەمدى جولى» دەگەن پىكىر ءبىلدىردى.
- ەلشىلىك ا ق ش-تا ءار-ءتۇرلى سەبەپتەرمەن مارتەبەسىز، زاڭسىز قالىپ قويعان ق ر ازاماتتارىنا وسى مۇمكىندىكتى مۇقيات قاراستىرۋعا شاقىرادى. سول ارقىلى زاڭسىز ميگرانتتارعا قولدانىلاتىن شارالاردىڭ الدىن الۋعا، ماسەلەنى زاڭدى تۇردە شەشۋگە جانە بولاشاقتا ەلگە ورالۋ قۇقىعىن ساقتاۋ ءۇشىن ماڭىزدى قادام بولماق، - دەپ اتاپ ءوتتى ا ق ش-تاعى قازاقستان ەلشىلىگى.
وسىعان دەيىن ا ق ش وزدىگىنەن دەپورتاتسيالاناتىن زاڭسىز شەتەلدىكتەرگە 1000 دوللار تولەيدى دەگەن اقپارات تاراعان بولاتىن.
