ا ق ش- تاعى نارازىلىق كۇشەيىپ بارادى

استانا. قازاقپارات - ا ق ش- تاعى تارتىپسىزدىكتەردىڭ اۋماعى كەڭەيىپ بارادى. بۇلىك باسقا ايماقتاردا دا شىعا باستادى، دەپ حابارلايدى 24kz.

پەنتاگون لوس- اندجەلەسكە 700 تەڭىز جاياۋ اسكەرىن جىبەردى. ولاردىڭ نەگىزگى مىندەتى - كوشى-قون اگەنتتەرىن قورعاۋ.  تەحاس شتاتىنىڭ ورتالىعى وستين جانە داللاس قالالارىندا حالىق باس كوتەردى. پوليتسيا نارازى توپقا كوزدەن جاس اعىزاتىن گاز شاشىپ، تاراتۋعا تىرىسىپ جاتىر. كوشەگە شىققاندار بەيبىت ەرەۋىل وتكىزىپ جاتقانىن، الايدا پوليتسيا ولارعا كۇش قولدانىپ، شەرۋدىڭ شىرقىن بۇزعانىن ايتادى.

 بليتس: - ءبىز باسبۇزارلىق جاساعان جوقپىز. جاي عانا جينالىپ، بيلىكتىڭ ميگرانتتاردى قۋىپ جاتقان ساياساتىنا بەيبىت تۇردە نارازىلىعىمىزدى بىلدىردىك. الايدا پوليتسيا بىزگە وق اتىپ، بىرنەشە بەلسەندىنى قاماۋعا الدى. ولار بىزگە وزدەرى ءتيىسىپ جاتىر.

نيۋ-يوركتە دە ونداعان ادام كوشەگە شىقتى. Fox News تەلەارناسى Trump Tower عيماراتىنىڭ جانىندا ەرەۋىلدەتكەن 24 ادامدى قاماۋعا العانىن حابارلادى. ولارعا الدىمەن ول جەردەن كەتۋ تۋرالى بىرنەشە رەت اۋىزشا ەسكەرتۋ جاسالعان. قالادا قاۋىپسىزدىك شارالارى كۇشەيتىلىپ، قوسىمشا پوليتسيا جاساعى شىقتى.

لوس-اندجەلەستەگى الاساپىراندا پوليتسيا جۋرناليسكە وق اتتى. اۆستراليانىڭ 9News تەلەارناسىنىڭ ءتىلشىسى لورەن توماسي تىكەلەي ەفيردە رەپورتاج وتكىزىپ جاتقاندا ونىڭ شورشىپ تۇسكەنى كادرگە ءتۇسىپ قالعان. ابىروي بولعاندا، اتىلعان رەزەڭكە وق بولىپ شىقتى. اۆستراليانىڭ پرەمەر-ءمينيسترى ەنتوني البانيز وق تيگەن وتانداسىنا بىردەن قوڭىراۋ شالعان.

ەنتوني البانيز، اۆستراليا پرەمەر-ءمينيسترى:

 - بۇگىن تاڭەرتەڭ لورەنمەن سويلەستىم. حالى جاقسى ەكەن. ول مىقتى. ءبىراق وعان وق اتىلعان جاعداي وتە قورقىنىشتى. وعان نەگىزسىز وق اتىلدى. بۇل دۇرىس ەمەس. ءبىز ءوز الاڭداۋشىلىعىمىزدى ا ق ش اكىمشىلىگىنە جەتكىزدىك. جۋرناليستەرگە وق اتىلماۋ كەرەك، ولارعا قۇرمەت كورسەتىلۋى قاجەت.

 ا ق ش پرەزيدەنتىنىڭ مۇنى ويلايتىن ازىرگە ەش مۇرساتى جوق. ترامپ كاليفورنيا شتاتىنىڭ گۋبەرناتورىمەن ايقاسىپ جاتىر. اق ءۇي باسشىسى: «جەرگىلىكتى بيلىك لوس-اندجەلەس تۇرعىندارىنىڭ قاۋىپسىزدىگى ءۇشىن جەتكىلىكتى ارەكەتتى جاسامادى دەپ ايىپتاپ، ءتىپتى دارمەنسىزدىگى ءۇشىن گۋبەرناتوردى قاماۋعا الۋ كەرەك» دەدى.

دونالد ترامپ، ا ق ش پرەزيدەنتى:

 - لوس-اندجەلەستەگى احۋالدى وقىپ-ءبىلىپ جاتىرسىزدار. جاعدايدى تۇراقتاندىرۋ ءۇشىن ءبىز ۇلتتىق گۆارديانى جىبەردىك. اسكەريلەر شىنىمەن دە ونداعى كوپتەگەن ماسەلەنى شەشۋگە كومەكتەستى. جەرگىلىكتى بيلىك قول قۋسىرىپ قورقىپ وتىردى. اسكەرلەرىمىزگە العىسىم زور. ال گۋبەرناتوردىڭ جاساپ جاتقان ىسىنە قاراڭىزدارشى. ول ءبىزدىڭ ۇلى شتاتتارىمىزدىڭ ءبىرىن قۇردىمعا جىبەرىپ جاتىر. ەگەر مەن ارالاسپاعاندا، ەگەر ءبىز گۆارديانى جىبەرمەگەنىمىزدە، جاعداي ءتىپتى قيىن بولار ەدى. ويتكەنى ەلدە ءتارتىپ پەن قاۋىپسىزدىك بولۋى ءتيىس.

كاليفورنيا باسشىسى قاراپ وتىرعان جوق. گەۆين نيۋسوم ترامپتى بىردەن سوتقا بەردى. ول گۋبەرناتوردىڭ سۇراۋىنسىز ۇلتتىق ۇلان اسكەرى لوس-انجەلەستەگى بۇلىكتىى باسۋعا جىبەرۋ كونستيتۋتسياعا قايشى دەپ ەسەپتەيدى.

گەۆين نيۋسوم، كاليفورنيا شتاتى گۋبەرناتورى:

 - ترامپتىڭ لوس-اندجەلەسكە اسكەر جىبەرۋ ارەكەتى ءوزىن كۇشتى ەتىپ كورسەتكىسى كەلەتىن، اسا قاۋىپتى پرەزيدەنتتىڭ امبيتسياسىن قاناعاتتاندىرۋ ءۇشىن جاسالىپ وتىر. بۇل - جاۋاپسىز ءارى ماعىناسىز قادام. جانە مۇنى ءبىزدىڭ ساربازدارعا دەگەن قۇرمەتسىزدىك دەپ بىلەمىن. 

 پرەزيدەنت اكىمشىلىگىنىڭ توقتايتىن ءتۇرى جوق. پەنتاگون لوس-اندجەلەسكە تاعى 700 تەڭىز جاياۋ اسكەر جىبەردى.

اۆتورى: ەرنات راحمەتوللا