ا ق ش- تا سۋ تاسقىنىنان قازا تاپقاندار سانى 80 گە جەتتى

استانا. KAZINFORM - بيلىكتىڭ سوڭعى مالىمەتى بويىنشا، تەحاستاعى جويقىن سۋ تاسقىنىنان كەم دەگەندە 80 ادام، ونىڭ ىشىندە 28 بالا قازا تاپتى، دەپ حابارلايدى BBC.

تەحاس شتاتى كەرن وكرۋگىنىڭ شەريفى لارري ليتا جەكسەنبى كۇنى كەشكە جۋرناليستەرگە وكرۋگتە راستالعان ءولىم سانى 68 گە جەتكەنىن (40 ەرەسەك پەن 28 بالا) ايتتى.

CNN جەرگىلىكتى بيلىككە سىلتەمە جاساي وتىرىپ، باسقا بەس وكرۋگتە تاعى 12 ادام قازا تاپقانىن مالىمدەدى.

تەحاستىڭ بىرنەشە وكرۋگىندە توتەنشە جاعداي جاريالاندى: كوپتەگەن جول قيرادى، تەلەفون جەلىلەرى جۇمىس ىستەمەيدى. تاعى 41 ادام، ونىڭ ىشىندە 10 قىز ءىز- ءتۇسسىز جوعالىپ كەتتى.

قايتىس بولعان جانە ءىز- ءتۇزسىز جوعالعان بالالار گۋادالۋپە وزەنىنىڭ جاعاسىندا، كەررۆيلل ماڭىنداعى قىزدارعا ارنالعان حريستياندىق جازعى Camp Mystic لاگەرىندە دەمالىپ جاتقان. ولار نوسەردەن كەيىن جاعادان شىققان.

ا ق ش پرەزيدەنتى دونالد ترامپ ونىڭ اكىمشىلىگى شتات بيلىگىمەن تىعىز جۇمىس ىستەپ جاتقانىن، ونىڭ تاپسىرماسى بويىنشا تەحاسقا ا ق ش ۇلتتىق قاۋىپسىزدىك ءمينيسترى كريستي نوەم بارعانىن ايتتى.

تەحاستا بولعان نوەم باسپا ءسوز ءماسليحاتىندا پرەزيدەنتتىڭ سۋ تاسقىنى كەزىندەگى ادامداردىڭ قازاسىنا «قاتتى ەسەڭگىرەپ قالعانىن» ايتتى جانە ودان شتات تۇرعىندارىنا مەلانيا ەكەۋى قاتتى قايعىرىپ جاتقانىن جانە ىزدەۋ جۇمىستارىن جەڭىلدەتۋ ءۇشىن فەدەرالدى ۇكىمەتتىڭ بارلىق رەسۋرسىن بەرۋگە دايىن ەكەنىن جەتكىزۋىن سۇرادى.

كريستين نوەم توتەنشە جاعدايلاردى باسقارۋ فەدەرالدى اگەنتتىگىنىڭ (FEMA) «جوعارى دايىندىقتا» ەكەنىن جانە قۇتقارۋ جۇمىستارىنا، سونىڭ ىشىندە كوبىرەك ۇشاقتار مەن تىكۇشاقتارمەن ۋاقىتىلى جانە جەدەل كومەك كورسەتۋدى جالعاستىراتىنىن اتاپ ءوتتى.

ەلدە تاۋەلسىزدىك كۇنىنە ارنالعان مەرەكەلىك ءىس-شارا توقتاتىلدى.

ا ق ش پرەزيدەنتى دونالد ترامپ تەحاستاعى وقيعانى «جان تۇرشىگەرلىك» جانە «قورقىنىشتى» دەپ اتادى، ال اق ءۇي شتاتقا قوسىمشا كومەك كورسەتۋگە ۋادە بەردى.

ايتا كەتەيىك، ترامپ تەحاستا توتەنشە جاعداي رەجيمىن ەنگىزدى.