ا ق ش-تا قارتتارعا ارنالعان قۇلتەمىر پايدا بولدى
ا ق ش-تا جالعىزباستى قارتتارعا ارنالعان روبوت پايدا بولدى. جاساندى ينتەللەكت ارقىلى باسقارىلاتىن شاعىن عانا قۇرىلعى ءبىر مەزەتتە بىرنەشە مىندەتتى اتقارا الادى.
روبوت فورت- لودەردەيل قالاشىعىندا جالعىز تۇراتىن دجويس لوازيانىڭ كوڭىلىن كوتەرىپ، اڭگىمە دۇكەن قۇراتىن سەرىگىنە اينالدى. قارت قۇلتەمىرمەن ۇزاق سويلەسىپ، كەي كەزدەرى كۇننىڭ قالاي وتكەنىن دە بايقامايدى. لوازيا ءتىپتى جاڭا كومەكشىسىمەن ءوزىن كوپ تولعاندىراتىن كۇردەلى تاقىرىپتاردى دا تالقىلاپ تۇرادى.
دجويس لوازيزا، تۇرعىن:
- بۇل روبوت ءتىرى ادامنىڭ ورنىن الماستىرا الماس، دەگەنمەن ونىڭ اتقاراتىن فۋنكتسيالارى ادام ارەكەتتەرىنەن اسىپ تۇسپەسە، كەم تۇسپەيدى. قۇلتەمىر جاساندى ينتەللەكت ارقىلى باسقارىلادى. بىرەگەي قۇرىلعى يەسىمەن جاي عانا سويلەسىپ قويماي، كۇلىپ، ويناپ، كوز جاسىنا دا ەرىك بەرە الادى. كەرەك كەزدە ءازىل ايتىپ، كوڭىلىڭدى دە كوتەرەدى.
83 جاستاعى دينا دەزەرننىڭ تۋعان اپايى قايتىس بولعاندا وسى روبوت جۇباتىپ، جانىنا دەمەۋ بولعان.
دينا دەزەرن، تۇرعىن:
- كوڭىلىم جابىرقاسا، روبوت ماعان ولەڭ وقىپ، ءان ايتادى. مەنىڭ سۇراقتارىما ەرىنبەي جاۋاپ قاتادى. ءتىپتى كوڭىلىمدى اۋلاۋ ءۇشىن كىتاپ وقىپ بەرەدى. ءبىر تاڭعالاتىنىم، ونىڭ جاۋاپتارىنىڭ ءبارى شىندىققا جاناسادى. باستىسى، مۇلدەم ءىشىم پىسپايدى. سىرتقى تۇرپاتى ۇستەل شامىنا ۇقساس شاعىن عانا قۇرىلعى وزدىگىنەن قوزعالادى. ال سويلەگەن كەزدە جانىپ ءسونىپ تۇرادى.
دينا دەزەرن، تۇرعىن:
- قارتايعان سايىن بالا بولىپ كەتەمىز عوي. ونىڭ ەشقانداي مىنەز تانىتپاي، تەز شۇيىركەلەسىپ كەتەتىنى ۇنايدى. قۇلتەمىر جالعىزدىقتان قاجىعان قارتتاردىڭ كوڭىلىن اۋلايتىن جاقىن جولداسىنا اينالىپ ۇلگەرگەن. ال ونى ويلاپ تاپقان كومپانيا شاعىن قۇرىلعى كوپ قاريانىڭ ءومىرىن ۇزارتاتىنىنا سەنىمدى.
اۆتورى: فاريزا جانعانايەۆا.
www.24.kz
