ا ق ش-تا كىشكەنتاي بالالار اراسىندا نيكوتيننەن ۋلانۋ جاعدايى كۇرت ارتتى
ۆاشينگتون. KAZINFORM - ا ق ش-تا التى جاسقا دەيىنگى بالالار اراسىندا نيكوتيننەن ۋلانۋ جاعدايلارى كۇرت ءوستى. بۇل تۋرالى NBC News تەلەارناسى پەدياتريا جۋرنالىنا سىلتەمە جاساپ حابارلادى. جۋرنال ماتەريالىن ا ق ش پەدياتريا اكادەمياسى جاريالاعان، دەپ جازدى انادولى.
زەرتتەۋ دەرەكتەرىنە سايكەس، 2010 -جىلدان 2023 -جىلعا دەيىن ەلدەگى توكسيكولوگيالىق ورتالىقتار 134663 جاعدايدى تىركەگەن. ۋلانۋ جاعدايلارىنىڭ دەرلىك بارلىعى ءۇي جاعدايىندا بولعان.
نيكوتين پاكەتتەرى - باستى قاۋىپ كوزى
دارىگەرلەر Zyn سەكىلدى تانىمال برەندتەردىڭ قۇرامىندا تەمەكى جوق، ءبىراق 6 م گ-عا دەيىن نيكوتين بار نيكوتيندىك پاكەتتەرىنە الاڭداۋشىلىق ءبىلدىرىپ وتىر.
2020 -جىلى 100000 بالاعا شاققاندا مۇنداي ۋلانۋ 0,48 جاعداي بولسا، 2023 -جىلى بۇل كورسەتكىش 4,14 كە جەتكەن - ياعني %763 عا ءوسىم بايقالعان.
بۇل ونىمدەردىڭ كوپشىلىگى جەمىس نە جالبىز دامىمەن شىعارىلادى جانە بالالارعا قارسى قورعانىس قاپتاماسى جوق. ا ق ش-تىڭ ازىق-تۇلىك پەن ءدارى-دارمەكتى باقىلاۋ باسقارماسى (FDA) ولاردى تەمەكىدەن باس تارتۋ قۇرالى رەتىندە ماقۇلداماعان.
- مۇنداي ونىمدەردىڭ سابيلەردىڭ قولىنا ءتۇسۋى - ۋاقىت ەنشىسىندەگى ماسەلە ەدى. بۇل - وكىنىشتى، ءبىراق تاڭقالارلىق جاعداي ەمەس، - دەدى ميچيگان شتاتىنان پەدياتر جانە اقش پەدياتريا اكادەمياسىنىڭ وكىلى دوكتور موللي و’شي.
نيكوتين - كۇشتى ۋ: 2 بالا كوز جۇمعان
ماماندار نيكوتيننىڭ جوعارى ۋىتتىلىعىن ەسكەرتەدى. ول جۇرەك سوعىسىن جيىلەتىپ، قىسىمدى كوتەرىپ، لوقسۋ، قۇسۋ، ال اۋىر جاعدايلاردا كوما تۋدىرۋى مۇمكىن.
زەرتتەۋدە كوپ جاعدايدا بەلگىلەر جەڭىل بولعانىمەن، 39 بالانىڭ جاعدايى اۋىرلاپ، تىنىس الۋى قيىنداپ، تىرىسۋ سياقتى اسقىنۋلار تىركەلگەن.
سونىمەن قاتار، ءبىر جاسار ۇل بالا مەن شامامەن 1,5 جاستاعى تاعى ءبىر ءسابي ۆەيپكە ارنالعان نيكوتين سۇيىقتىعىن ءىشىپ، قايتىس بولعان.
- كوپتەگەن بالالاردىڭ اۋىر اسقىنۋسىز امان قالۋى - جاقسى. ءبىراق ەكى بالانىڭ ءولىمى - تىم كوپ، اسىرەسە ەگەر ولار الدىن الۋعا بولاتىن قايعىلى جاعدايلار بولسا، - دەدى زەرتتەۋ اۆتورى، وگايو ورتالىق ۋلانۋ ورتالىعىنىڭ ديرەكتورى ناتالي راين.
نيكوتين ونىمدەرىن بالالاردان الىستاتۋ قاجەت
ماماندار نيكوتين بار ونىمدەردى بالالار قولى جەتپەيتىن، جابىلاتىن جەردە ساقتاۋ قاجەتتىگىن باسا ايتتى.
- نيكوتين ونىمدەرىن جاي ۇستەلدە نە سومكەدە ەمەس، كوزدەن تاسا جانە قۇلىپتاۋلى جەرلەردە ساقتاۋ قاجەت، - دەلىنگەن زەرتتەۋدە.
سونداي-اق ناتالي راين جاسوسپىرىمدەر مۇنداي ونىمدەردى اتا-اناسىنىڭ رۇقساتىنسىز قولدانۋى مۇمكىن ەكەنىن ەسكەرتتى.
- بالامەن اشىق ءارى ايىپتاماي سويلەسۋ كەرەك. قاۋىپتىڭ الدىن الۋ ءۇشىن بۇل وتە ماڭىزدى، - دەدى ول.
سوڭىندا ول اتا-انالارعا ا ق ش ۇلتتىق ۋلانۋعا قارسى ورتالىعىنىڭ ءنومىرىن تەلەفونىنا ساقتاپ قويۋدى ۇسىندى، ويتكەنى دەر كەزىندە كومەككە جۇگىنۋ - بالانىڭ ءومىرىن ساقتاپ قالۋى مۇمكىن.
