ا ق ش- تا جوعارى تاريفتەر ساقتالسا 2025-جىلى رەتسەسسيا بولادى دەگەن بولجام جاسالدى
استانا. قازاقپارات - Apollo Global Management باس ەكونوميسى تورستەن سلوك ەگەر تاريفتەر قازىرگى دەڭگەيدە ساقتالسا، ا ق ش بيىل رەتسەسسياعا ۇشىرايتىنىنا سەنىمدى، دەپ حابارلايدى NBC News.
- بارلىعى تاريفتەردىڭ وسى دەڭگەيدە قالۋىنا بايلانىستى، ەگەر ولار وسى دەڭگەيدە قالاتىن بولسا، بىزدە 2025-جىلى رەتسەسسيا بولاتىنى ءسوزسىز، - دەپ مالىمدەدى تورستەن سلوك.
ەگەر وسى ايدىڭ باسىندا ەنگىزىلگەن جوعارى تاريفتەر ءوز كۇشىندە قالاتىن بولسا، ەكونوميكالىق ءوندىرىستىڭ ەكى توقسان ىشىندە قىسقارۋ ىقتيمالدىعى 90 پايىزدى قۇرايدى، ال جالپى ىشكى ءونىم 4 پايىزدىق تارماققا تومەندەيدى.
سلوكتىڭ رەتسەسسيا بولجامىندا ورتالىق ورىندى قىتايلىق تاريفتەر الىپ وتىر.
ونىڭ پىكىرىنشە، ولار يمپورتتالاتىن تاۋارلارعا جوعارى سالىق تولەۋگە قولما-قول اقشاسى جوق ا ق ش- تىڭ شاعىن بيزنەسى ءۇشىن وتە زيان.
- ولاردىڭ قوسىمشا 145 پايىز تولەۋگە اقشاسى مەن قولما-قول اقشاسى جوق. سوندىقتان، ەگەر مۇنى جالعاستىرۋعا جول بەرىلسە، ءبىزدى ريتەيلەردىڭ اۋقىمدى كولەمدەگى بانكروتتىعىن كورەمىز، - تورستەن سلوك.
ساراپشىنىڭ ايتۋىنشا، بولشەك ساۋداداعى كەز كەلگەن قۇلدىراۋ سايىپ كەلگەندە ەڭبەك نارىعىنا جانە تۇتىنۋشىلاردىڭ كوڭىل- كۇيىنە نۇقسان كەلتىرەدى، ويتكەنى 500 دەن از قىزمەتكەرى بار شاعىن بيزنەس جالپى جۇمىسپەن قامتۋدىڭ 80 پايىزىن قۇرايدى.
وسى ايدىڭ باسىندا JPMorgan Asset Management وكىلى دەۆيد كەللي 2-ساۋىردە جاڭا تاريفتەر جاريالانعاننان كەيىن بىردەن جوعارى تاريفتەردىڭ ساقتالۋىنا بايلانىستى رەتسەسسيانىڭ 60 پايىز ىقتيمالدىعى بار ەكەنىن ايتتى.
قازىرگى ۋاقىتتا ا ق ش اكسيالارى قۇلدىراپ جاتىر. SP يندەكسى 2,4 پايىزعا، ال Nasdaq تەحنولوگيالىق يندەكسى جانە Dow Jones ونەركاسىپتىك يندەكسى 2,5 پايىزدان استام تومەندەدى. ترامپ 2-ساۋىردە «بوستاندىق كۇنى» قۇرمەتىنە باج سالىعى تۋرالى جاريالاعاننان كەيىن بارلىق ءۇش يندەكس 9 پايىزدان استام تومەندەدى.
وسىعان دەيىن التىن باعاسى رەكوردتىق دەڭگەيگە كوتەرىلگەنى تۋرالى جازدىق.
