ا ق ش-تا شىركەۋدە اتىستان ەكى ادام قازا تاپتى

 ا ق ش- تىڭ كەنتۋككي شتاتىنداعى شىركەۋدە اتىس بولىپ، ەكى ايەل قازا تاپتى. تاعى ءۇش ادام جارالاندى. بۇل تۋرالى لەكسينگتون قالاسىنىڭ پوليسياسى حابارلادى.

 كۇدىكتى الدىمەن جەرگىلىكتى اۋەجاي جانىندا پوليتسياعا وق اتىپ، كەيىن باسقا بىرەۋدىڭ كولىگىمەن ءمىناجات ورنىنا بارعان. سول جەردە حالىققا وق جاۋدىرىپ، تۇرعىنداردى جارالادى. ەكى ايەل وقيعا ورنىندا جان تاپسىردى. ءبىر تۇرعىن اسا اۋىر حالدە اۋرۋحاناعا ءتۇستى. قاسكويدىڭ ءوزى پوليسەيلەردىڭ وعىنان مەرت بولدى. ونىڭ كىم ەكەنى ءالى جاريالانبادى جانە مۇنداي ارەكەتكە نە ءۇشىن بارعانى بەلگىسىز.

 گەري گينن، فايەتت وكرۋگى تەرگەۋ ءبولىمىنىڭ مامانى:

«بۇل شاعىن عانا شىركەۋ بولاتىن. ول جەرگە كەلەتىن ادامداردىڭ باسىم بولىگى ءبىر- بىرىنە تۋىس نە تانىس جاندار. قازىر جەرگىلىكتى پوليتسيا تەرگەۋ جۇرگىزىپ، كۋاگەرلەردەن جاۋاپ الىپ جاتىر. قىلمىسكەردىڭ كىم بولعانى انىقتالدى. تولىق اقپاراتتى جۋىق ارادا جاريالايمىز».

 https://24.kz