ا ق ش- تا دەموكراتتاردىڭ دەمەۋشىلەرى بايدەندى ءالى دە وتستاۆكاعا كەتۋگە شاقىرۋدا
استانا. KAZINFORM – ا ق ش پرەزيدەنتى دجو بايدەننىڭ پىكىرسايىستاردا كوپشىلىك الدىندا سويلەگەنى جانە ABC News ارناسىنا بەرگەن سۇحباتى دەموكراتيالىق پارتيانىڭ ءىرى دەمەۋشىلەرىنىڭ قورقىنىشىن سەيىلتە المادى، دەپ حابارلايدى ABC News.
پىكىرتالاستاردان كەيىن دجو بايدەندى وتستاۆكاعا كەتۋگە شاقىرعان Netflix نەگىزىن قالاۋشى جانە ءتوراعاسى ريد حاستينگس ءوز ۇندەۋىن كۇشەيتتى.
«وكىنىشكە قاراي، بايدەن ءوزىنىڭ پسيحيكالىق جاعدايىن مويىنداماي وتىر. ول دەموكراتتاردىڭ جىگەرلى كوشباسشىسىنىڭ ترامپتى جەڭۋىنە مۇمكىندىك بەرۋ ءۇشىن كەتۋى كەرەك»، - دەدى ريد حاستينگس.
Paypal-دىڭ بۇرىنعى باس ديرەكتورى بيلل حارريستىڭ اتاپ وتۋىنشە، دجو بايدەننىڭ ABC News-كە بەرگەن سۇحباتىندا قارتايىپ بارا جاتقانى بايقالىپ تۇرعان. بۇل جاعداي بايدەنگە ۋاقىت وتكەن سايىنا كۇماندانا باستاعان دەموكرات- سايلاۋشىلاردىڭ كۇمانىن ۇدەتە ءتۇسۋى مۇمكىن.
ب. حارريستىڭ پىكىرىنشە، سۇحبات پەن پىكىرتالاس قورىتىندىلارى بايدەننىڭ وتستاۆكاعا كەتۋدەن باسقا جولى جوق. 2020 -جىلى ب. حارريس بايدەننىڭ جەڭىس قورىنا 620 مىڭ اۋداردى.
ب. حاريس ءوزى نەگىزىن قالاعان «دەموكراتتار بولاشاق بۋىن ءۇشىن» اتتى ساياسي ءىس- قيمىل كوميتەتنىڭ دجو بايدەن وتستاۆكاعا كەتە قالعان جاعدايدا پرەزيدەنتىككە كانديدات رەتىندە دەموكراتيالىق پارتيا اتىنان شىعاتىن ازاماتتاردىڭ دەباتتارىنا 2 ميلليون دوللار كولەمىندە قارجى بولەتىنىن مالىمدەگەن بولاتىن.
وسى جىلدار ىشىندە دەموكراتتارعا جىلىنا 100 مىڭ دوللاردان استام قايىرىمدىلىق جاساعان ينۆەستور ۋيتني تيلسون دا دجو بايدەن كەتۋى ءتيىس دەگەن پىكىردە.
«ا ق ش حالقى تۋرالى مەنىڭ كوزقاراسىم تۇرعىسىنان قارايتىن بولساق وتە مىقتى بەرىلگەن سۇحباتتىڭ ءوزى بايدەننىڭ ترامپتى قاراشا ايىندا جەڭۋى قيىن دەگەن پىكىرىمدى وزگەرتە المايدى. ول وراسان زور تاجىريبەسى بار تاماشا ادام جانە كەرەمەت پرەزيدەنت بولسا دا، تاعى ءتورت جىل پرەزيدەنت بولۋدىڭ قيىندىعىن كوتەرە المايدى»، - دەدى ۋ. تيلسون.
ميللياردەر جانە لوس- اندجەلەستەگى جىلجىمايتىن مۇلىك ماگناتى ريك كارۋزو دا جوعارىداعى ۇندەۋلەرگە قوسىلىپ، «X» الەۋمەتتىك جەلىسىندەگى پاراقشاسىندا: «وسى ماڭىزدى كەزەڭدە، وسى ماڭىزدى سايلاۋدا پرەزيدەنت بايدەن ءۇشىن وتستاۆكاعا كەتۋ دۇرىس جانە قۇرمەتتى نارسە» دەپ حابارلاما جاريالادى.
كەيبىر دونور دەموكراتتار پرەزيدەنتتى وتستاۆكاعا كەتۋگە شاقىرىپ قانا قويماي، وزدەرىنىڭ تالاپتارى ورىندالمايىنشا ءبىر تيىن دە بەرمەيمىز دەپ وتىر.
بۇعان دەيىن The Walt Disney Company باسشىسى ەبيگەيل ديسنەي مەن The Moriah Fund جەكەمەنشىك قورىنىڭ پرەزيدەنتى گيدەون ستەين دەموكراتيالىق پارتياعا قايىرىمدىلىق جاساۋدان باس تارتقان.
سەنبىدە دجو بايدەن ءوز قولداۋشىلارىنا اقشا جيناۋ ۇندەۋىندە ونى پرەزيدەنتتىك جارىستان باس تارتۋعا شاقىرۋدى «ساندىراق» دەدى.
