ا ق ش-تا الەمدەگى ەڭ ۇزىن نايزاعاي رەكوردىنا تۇزەتۋ ەنگىزىلدى

استانا. Kazinform - بىرىككەن ۇلتتار ۇيىمىنىڭ دۇنيەجۇزىلىك مەتەورولوگيالىق ۇيىمىنىڭ (د م ۇ) مالىمدەمەسىنە سايكەس، 2017 -جىلدىڭ قازان ايىندا ا ق ش- تىڭ تەحاس پەن كانزاس شتاتتارى اراسىندا بايقالعان ۇزىندىعى 829 شاقىرىمدى قۇرايتىن نايزاعاي ەڭ ۇزىن نايزاعاي بويىنشا جاڭا الەمدىك رەكورد رەتىندە تىركەلدى، دەپ حابارلادى د م ۇ 31 -شىلدە كۇنى.

- دۇنيەجۇزىلىك مەتەورولوگيالىق ۇيىم ەڭ ۇزىن نايزاعاي بويىنشا جاڭا الەمدىك رەكوردتى تىركەدى. قۇراما شتاتتارداعى تانىمال داۋىل ايماعىندا 829 شاقىرىمعا جەتكەن (515 ميل) تاڭعاجايىپ نايزاعاي ويناۋى بايقالدى. بۇل ۇلكەن نايزاعاي 2017 -جىلدىڭ قازان ايىندا تەحاستىڭ شىعىسىنان كانزاس-سيتيگە دەيىنگى اۋماقتى قامتىدى. قاشىقتىق ەۋروپاداعى پاريج بەن ۆەنەتسيا اراسىنداعى قاشىقتىقپەن بىردەي. وسىنداي قاشىقتىقتى ءجۇرىپ ءوتۋ ءۇشىن كولىكتە شامامەن سەگىز- توعىز ساعات، ال كوممەرتسيالىق ۇشاقتا كەمىندە 90 مينۋت كەتەدى، - دەلىنگەن قۇجاتتا.

جاھاندىق توتەنشە وقيعالار تۋرالى رەسمي دەرەكتەردى ساقتايتىن د م ۇ- نىڭ اۋا- رايى جانە كليماتتىق توتەنشە جاعدايلار جونىندەگى كوميتەتى دە سوڭعى جاساندى جەر سەرىگى تەحنولوگياسىن پايدالانا وتىرىپ، بۇل جاڭا رەكوردتى راستادى.

-بۇل جاڭا رەكورد تابيعي اپاتتاردىڭ كەرەمەت كۇشىن ايقىن كورسەتەدى. سونىمەن قاتار، د م ۇ- نىڭ وسى رەكوردتىق دەڭگەيدەگى توتەنشە ەكولوگيالىق وقيعالاردى باعالاۋى مۇنداي وقيعالاردى باقىلاۋ، قۇجاتتاۋ جانە باعالاۋداعى ەلەۋلى عىلىمي جەتىستىكتەردى كورسەتەدى. بۇل جەردە نەعۇرلىم اۋىر ەكسترەمالدى وقيعالار بولۋى مۇمكىن جانە ۋاقىت وتە كەلە نايزاعايدىڭ جوعارى ساپالى ولشەمدەرى جيناقتالعاندىقتان، ءبىز ولاردى باقىلاي الامىز، - دەدى د م ۇ اۋا-رايى جانە ەكسترەمالدى كليماتتىق وقيعالار جونىندەگى بايانداماشىسى رەندالل چەرۆەنيا.

ەسكە سالا كەتەيىك، ءۇندىستاننىڭ شىعىسىندا نايزاعاي سوعۋىنان 33 ادام قازا تاپتى.

اۆتور

بەگابات ۇزاقوۆ