ا ق ش پرەزيدەنتىنىڭ ارنايى وكىلى بار ۇشاق رەسەيگە قوندى
استانا. KAZINFORM - بۇگىن تاڭەرتەڭ ماسكەۋگە ا ق ش- تان كەلگەن ۇشاق قوندى، بولجام بويىنشا بورتىندا ا ق ش پرەزيدەنتىنىڭ ارنايى وكىلى ستيۆ ۋيتكوفف بار، دەپ حابارلايدى Kazinform ءتىلشىسى.
ۇشاق «س. ۋيتكوفف وسى اپتادا رەسەيگە بارادى» دەگەن حابار تاراپ جاتقان تۇستا رەسەيگە ۇشىپ كەلدى.
كەيىننەن رەسەيلىك ب ا ق- تا ا ق ش پرەزيدەنتىنىڭ ارنايى وكىلى ستيۆ ۋيتكوففتىڭ رەسەي استاناسىنا كەلۋى تۋرالى حابارلامالار اياسىندا ۇكىمەتتىك كورتەج ۆنۋكوۆو اۋەجايى اۋماعىنان شىعىپ كەتكەنى تۋرالى اقپارات تارادى.
بۇعان دەيىن Axios پورتالى امەريكالىق شەنەۋنىككە سىلتەمە جاساپ، پۋتين مەن ۋيتكوففتىڭ كەزدەسۋى 25-ساۋىردە ءوتۋى مۇمكىن ەكەنىن حابارلاعان بولاتىن. اق ءۇي ۋيتتكوففتىڭ وسى اپتادا ماسكەۋگە ساپارىن راستادى.
ءوز كەزەگىندە رەسەي پرەزيدەنتىنىڭ باسپا ءسوز حاتشىسى دميتري پەسكوۆ بۇل ساپارعا قاتىستى ناقتى مالىمەتتەر جوق ەكەنىن، ءبىراق وزگەرىستەر بولۋى مۇمكىن ەكەنىن، كرەمل بۇل تۋرالى حابارلايتىنىن ءتۇسىندىردى.
ايتا كەتەيىك، رەسەي پرەزيدەنتى ۆ. پۋتين مەن ا ق ش پرەزيدەنتىنىڭ ارنايى وكىلى س. ۋيتكوففتىڭ بۇعان دەيىنگى كەزدەسۋى 11-ساۋىردە سانكت-پەتەربۋرگتە وتكەن بولاتىن. كەزدەسۋ بەس ساعاتقا جۋىق ۋاقىتقا سوزىلدى.
رەسەي پرەزيدەنتىنىڭ كومەكشىسى يۋريي ۋشاكوۆ اڭگىمەنىڭ نەگىزگى اۋانى ۋكراينا توڭىرەگىندەگى جاعداي بولعانىن، ءبىراق باسقا دا ساياسي جانە ەكونوميكالىق ماسەلەلەر دە كوتەرىلگەنىن اتاپ ءوتتى.
وسىعان دەيىن ا ق ش پرەزيدەنتى دونالد ترامپ مامىر ايىنىڭ ورتاسىندا ترامپتىڭ ساۋد ارابياسى، قاتار جانە ب ا ءا ساپارىنان كەيىن رەسەي پرەزيدەنتى ۆلاديمير پۋتينمەن كەزدەسۋى مۇمكىن ەكەنىن ايتتى.
