ا ق ش قىتايمەن ساۋدا بويىنشا كەلىسىمگە كەلدى

استانا. KAZINFORM - ا ق ش پرەزيدەنتى دونالد ترامپ بەيسەنبى كۇنى قىتايمەن ساۋدا كەلىسىمىنە قول قويعانىن مالىمدەدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى Newsweekكە سىلتەمە جاساپ.

- ءبىز كەشە عانا قىتايمەن كەلىسىمگە قول قويدىق، - دەدى دونالد ترامپ اق ۇيدە رەسپۋبليكالىقتاردىڭ شىعىستارىنا قاتىستى وتكەن جيىندا.

ترامپ كەلىسىمنىڭ ءمان-جايى تۋرالى ەشتەڭە ايتپادى، ءبىراق ول قىتايعا جول اشاتىنىن جەتكىزدى.

پرەزيدەنت سونداي-اق ۇندىستانمەن جاڭا ءىرى كەلىسىم تۋرالى ىمدادى.

- ءبىز ۇندىستانمەن ءىرى كەلىسىم جاساعالى وتىرمىز، ول بىزگە ءۇندىستاننىڭ ەسىگىن اشادى، - دەپ قوستى دونالد ترامپ.

ترامپ باج سالىعى ەنگىزىلگەن 9 -شىلدەگە دەيىن 90 كۇندە 90 كەلىسىم جاساۋعا ۋادە بەردى.

ا ق ش پەن قىتاي اراسىنداعى شيەلەنىسكەن ساۋدا سوعىسىنان كەيىن ا ق ش پەن قىتاي اراسىندا ساۋدا جوسپارى بەكىتىلگەن. ترامپتىڭ سوزىنشە، وعان قول قويىلدى.

بەيسەنبى كۇنى ترامپ ب ا ق وكىلدەرىنىڭ ۋاقىتى كەلىپ قالعان باج سالىعىن ەنگىزۋ مەرزىمىنە تىم قاتتى نازار بولگەنىن سىنعا الدى.

ترامپ كەلىسىمدى بارلىعىمەن بىردەي جاساي بەرمەيتىنىن ايتتى. «كەيىبىرىنە تەك حات جولدايمىز دا، 25، 35، 45 پايىزدىق سالىق تولەيسىڭدەر دەپ ايتا سالامىز. بۇل - ەڭ وڭتايلى جول»، - دەدى ول.

قارجى ءمينيسترى بەسسەنت وسىعان دەيىن وسى ايدا اكىمشىلىكتىڭ 90 كۇندىك كىدىرىستى ۇزارتاتىنىن ايتتى.

قازىرگى تاڭدا اكىمشىلىك وداقتاسى بىرىككەن كورولدىكپەن ءبىر عانا كەلىسىم جاسالعان. بۇل رەتتە بىرىككەن كورولدىكتىڭ وداقتاس بولعانىمەن، ا ق ش- تىڭ مىقتى ساۋدا ارىپتەسى ەمەس ەكەنى ايتىلادى.