ا ق ش-قىتاي ساۋدا كەلىسسوزىنىڭ العاشقى كۇنى قالاي ءوتتى

استانا. KAZINFORM - ا ق ش-قىتاي ساۋدا كەلىسسوزى اياسىنداعى العاشقى كەزدەسۋ 10-مامىر كۇنى جەنيەۆادا ءوتتى. كەلىسسوز جەكسەنبى كۇنى جالعاسادى دەپ جوسپارلانعان. بۇل تۋرالى Lianhe Zaobao باسىلىمى حابارلادى.

بەلگىلى بولعانداي، ا ق ش قارجى ءمينيسترى سكوتت بەسسەنت پەن ساۋدا وكىلى دجەيميسون گرير سەنبى كۇنى جەنيەۆا قالاسىندا قىتاي مەملەكەتتىك كەڭەسىنىڭ ۆيتسە-پرەمەرى حە ليفەنمەن جابىق ەسىك جاعدايىندا كەزدەسۋ وتكىزدى. كەلىسسوز رەسمي ۆاشينگتوننىڭ قىتاي تاۋارلارىنا اسا جوعارى باج سالىعىن ەنگىزۋىنەن تۋىنداعان شيەلەنىستى باسەڭدەتۋگە باعىتتالعان. وسىلايشا، تاراپتار اراسىندا تاريف ماسەلەسى بويىنشا رەسمي ديالوگ قايتا باستالدى.

كەلىسسوز جەنيەۆاداعى بۇۇ بولىمشەسىنىڭ جانىنداعى شۆەيتساريا وكىلدىگىنىڭ رەزيدەنتسياسىندا، ناقتىراق ايتقاندا، جەنيەۆا كولىنىڭ سول جاعالاۋىندا ورنالاسقان قاراپايىم ۆيللادا ءوتتى. تاراپتار كەزدەسۋدىڭ ەگجەي-تەگجەيى جايلى ەشقانداي مالىمەت بەرمەدى.

Reuters اگەنتتىگىنىڭ حابارلاۋىنشا، ا ق ش پرەزيدەنتى دونالد ترامپ سەنبى كۇنى Truth Social الەۋمەتتىك جەلىسىندە «بۇل - تولىقتاي قايتا باستالعان كەلىسسوز. كەلىسسوز دوستىق رايدا ءارى مازمۇندى ءوتتى… بۇگىن قىتايمەن شۆەيتساريادا وتە جاقسى كەزدەسۋ وتكىزدىك. كوپتەگەن ماسەلە تالقىلاندى، ءبىرقاتار ورتاق پىكىرگە قول جەتكىزدىك»، دەپ جازعان.

Lianhe Zaobao-نىڭ جازۋىنشا، جىل باسىنان بەرى ا ق ش پرەزيدەنتى دونالد ترامپ ءبىرقاتار تاريفتىك شارالار ەنگىزىپ، قىتايعا قارسى باج سالىعىنىڭ جالپى مولشەرىن %145 عا دەيىن جەتكىزدى. كەيبىر ونىمدەرگە قاتىستى جالپى تاريف مولشەرى ءتىپتى %245 دان اسىپ كەتتى. بۇعان جاۋاپ رەتىندە قىتاي ا ق ش تاۋارلارىنا %125 عا دەيىن قارىمتا تاريفتەر ەنگىزدى، ناتيجەسىندە ەكىجاقتى ساۋدا توقىراپ قالدى.

10-مامىردا ترامپ الەۋمەتتىك جەلى ارقىلى «قىتايعا %80 مولشەرىندە باج سالىعىن ەنگىزۋ ورىندى بولار ەدى» دەپ مالىمدەپ، تاريف مولشەرىن تومەندەتۋدى قاراستىرۋى مۇمكىن ەكەنىن مەڭزەدى. ىزىنشە ا ق ش ساۋدا ءمينيسترى لۋتنيك ب ا ق وكىلدەرىنە ترامپتىڭ «قىتايمەن شەشىمگە كەلۋدى» جانە «شيەلەنىستى باسەڭدەتۋدى» قالايتىنىن ايتتى.

الايدا اق ءۇيدىڭ باسپا ءسوز حاتشىسى ليەۆيتت ا ق ش-تىڭ تاريفتەردى ءبىرجاقتى تومەندەتپەيتىنىن، قىتايدىڭ ءدا تيىستى قادامدار جاساۋى قاجەت ەكەنىن ەسكەرتتى.

ساراپشىلاردىڭ پىكىرىنشە، كەدەندىك سالىق %80 عا دەيىن تومەندەتىلگەننىڭ وزىندە، بۇل كاسىپورىنداردىڭ كوپشىلىگى ءۇشىن «وتە جوعارى» بولىپ قالا بەرەدى، سوندىقتان تاريفتەردى تومەندەتۋ سيمۆوليكالىق قادام رەتىندە قاراستىرىلۋى مۇمكىن.

ستراتەگيالىق جانە حالىقارالىق زەرتتەۋلەر ورتالىعىنىڭ (CSIS) اعا كەڭەسشىسى بيلل رەينش قازىرگى ۋاقىتتا قىتاي مەن ا ق ش اراسىنداعى قارىم- قاتىناستىڭ شيرىعىپ تۇرعانىن ايتادى.

- ءبىزدىڭ ءبىر-بىرىمىزگە ەنگىزگەن تاريفتەرىمىز ءوزارا ساۋدانى توقتاتىپ تاستايتىنداي دەڭگەيگە جەتتى، ەكىجاقتى قاتىناس ناشارلاپ بارادى. ال وسىندايدا كەلىسسوزگە ورالۋ - جاقسىلىقتىڭ بەلگىسى، - دەدى ول.

قىتاي-ەۋروپا حالىقارالىق بيزنەس ينستيتۋتىنىڭ پروفەسسورى سيۋي بين كەلىسسوزدىڭ باستى ءمانى قوس تاراپتىڭ ءوزارا بايلانىستى ساقتاۋعا پەيىلدى ەكەنىن كورسەتۋىندە دەيدى. ونىڭ ايتۋىنشا، «قىتاي - ترامپتىڭ تاريف ساياساتىنا تەڭ دەڭگەيدە قارىمتا قايتارعان جالعىز ەل».

بەسسەنت بۇعان دەيىن كەلىسسوزدىڭ باستى ماقساتى «جان-جاقتى ساۋدا كەلىسىمىنە» قول جەتكىزۋ ەمەس، «جاعدايدى باسەڭدەتۋ» ەكەنىن مالىمدەگەن. ال قىتاي تاراپى ا ق ش- تان تاريفتەردى الدىمەن الىپ تاستاۋدى تالاپ ەتىپ، ۇلتتىق مۇددەنى قورعاۋعا تاس-ءتۇيىن دايىن ەكەنىن مالىمدەگەن بولاتىن.

بۇعان دەيىن تاراپتاردىڭ «ساۋدا سوعىسىن» باسەڭدەتۋ جونىندە كەلىسسوزدى باستاعانىن حابارلاعان بولاتىنبىز.