ا ق ش- قا زاڭسىز بارعان ميگرانتتار كەپىلدىكپەن بوساتىلۋ مۇمكىندىگىن پايدالانا المايدى
استانا. KAZINFORM - ا ق ش- تا زاڭسىز جۇرگەن ميگرانتتار ولاردى دەپورتاتسيالاۋ ماسەلەسى شەشىلمەيىنشە، كەپىلدىكپەن بوساتىلۋ مۇمكىندىگىن پايدالانا المايدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى News.am-گە سىلتەمە جاساپ.
ميگراتسيا جانە كەدەن پوليسياسى باسشىلارىنىڭ ءوز ۆەدومستۆولارىنا جولداعان جاڭا ەرەجەسى ا ق ش- تىڭ ادىلەت مينيسترلىگى مەن ىشكى قاۋىپسىزدىك مينيسترلىگىنىڭ زاڭسىز ميگرانتتاردى كەپىلدىكپەن بوساتۋعا قاتىستى ساياساتىنىڭ وزگەرگەنىن كورسەتەدى.
قولدانىستاعى زاڭنامادا زاڭسىز كەلگەن ميگرانتاردى دەپورتاتسيالاۋ ماسەلەسى شەشىلگەنشە، ارنايى ورتالىقتاردا ۇستاۋ ماسەلەسى قاراستىرىلعان. الايدا تاجىريبەدە ول وسى كۇنگە دەيىن تەك ا ق ش- قا كەلگەننەن كەيىن زاڭ بۇزعان ادامدارعا قاتىستى عانا قولدانىلىپ كەلگەن.
اۋىر قىلمىس جاساعان ميگرانتتارعا دا كەپىلدىكپەن بوساتىلۋعا تىيىم سالىنعان.
ەندى وسى زاڭ ا ق ش- تا بولۋ مەرزىمىنە قاراماستان بارلىق ميگرانتتارعا قاتىستى قولدانىلاتىن بولادى. كەي جاعدايدا ەشقايدا كەتپەۋ تۋرالى قولحاتپەن جىبەرىلۋى مۇمكىن، ءبىراق بۇل ماسەلە بويىنشا شەشىمدى سوت ەمەس يمميگراتسيا وفيتسەرى قابىلدايدى. دەپورتاتسيالاۋ ىسىنە، اپپپەلياتسيانى قوسقاندا بىرنەشە كۇن كەتۋى مۇمكىن.
قۇقىق قورعاۋشىلار سوتتاردىڭ ەل كولەمىندە كەپىلدىكپەن بوساتۋ بويىنشا تىڭداۋلاردان باس تارتىپ جاتقانىن راستادى. ميگراتسيا جانە كەدەن پوليسياسى ا ق ش- تا بارلىعى 200 دەن استام ميگرانتتاردى ۇستاۋ ورتالىقتارىن باسقارادى.
وسىعان دەيىن ترامپتىڭ زاڭسىز ميگرانتتاردى «ءوز ەركىمەن ەلدەن شىعارۋ» باعدارلاماسىن ىسكە قوسقانى تۋرالى جازدىق.
