ا ق ش پەن يزرايلدىڭ يرانعا قارسى وپەراتسياسى قانداي جاعدايدا اياقتالۋى مۇمكىن

استانا. KAZINFORM - امەريكا پرەزيدەنتى دونالد ترامپ ا ق ش پەن يزرايلدىڭ يرانعا قارسى اسكەري وپەراتسياسى العا قويعان ماقساتتارعا جەتكەنشە جالعاسادى دەپ مالىمدەدى. بۇل تۋرالى Report اگەنتتىگى جازدى.

- ءبىز جۇمىس اياقتالمايىنشا كەتپەيمىز. بۇل وتە جىلدام بولادى، - دەدى دونالد ترامپ.

ول سوڭعى 11 كۇندە ا ق ش كۇشتەرى «يراندى ءىس جۇزىندە جويدى» دەپ مالىمدەدى. سونداي-اق يراندا ەندى رادارلار مەن اۋە قورعانىسى جوق ەكەنىن ايتتى.

ترامپ تەگەران ۇشىرعان زىمىران مەن درونداردىڭ سانى قاقتىعىستىڭ العاشقى كۇندەرىمەن سالىستىرعاندا %85-90 عا قىسقارعانىن، ودان بولەك، يران اسكەري-تەڭىز كۇشتەرىنىڭ 58 كەمەسى جويىلعانىن مالىمدەدى.