ا ق ش پەن يزرايل يرانعا جاۋاپ قايتارۋدى جوسپارلاپ وتىر

استانا. قازاقپارات- يراننىڭ شابۋىلىنان كەيىن ا ق ش پەن يزرايل قارىمتا سوققى جاساۋدى جوسپارلاۋعا كىرىستى. يزرايلدىڭ جەرگىلىكتى اقپارات كوزدەرى يراننىڭ يادرولىق نىساندارىنا دا شابۋىل جاسالۋى مۇمكىن دەگەندى ايتىپ جاتىر.

وسى ورايدا ا ق ش- تىڭ پوزيتسياسى قانداي جانە يرانعا جاسالعان شابۋىل الەمدىك مۇناي باعاسىنا قانشالىقتى اسەر ەتەدى؟ يران الىپ مۇناي ءوندىرۋشى مەملەكەت. ەگەر ا ق ش پەن يزرايل يرانعا شابۋىل جاساسا، مۇنايدىڭ باعاسى قانشالىقتى وزگەرەدى؟ مۇناي نىساندارىنا شابۋىلدان كەيىن يزرايلدەن نەنى كۇتۋگە بولادى؟

دجو بايدەن ۆاشينگتوننىڭ رەسمي ۇستانىمىن ناقتى ايتقان جوق. جۋرناليستەرمەن كەزدەسۋدە جۇرگىزىلىپ جاتقان كەلىسسوزدەر ا ق ش-تاعى رەسمي وكىلدەردىڭ اراسىندا بولىپ جاتقانى تۋرالى، الدە تىكەلەي يزرايلمەن سويلەسىپ جاتقانى تۋرالى ناقتى جاۋاپ بەرگەن جوق. ءتىپتى يزرايلدىڭ جاساماق شابۋىلىنا قاتىستى دا ءوز پىكىرىن اشىپ ايتقان جوق. بۇعان دەيىن ول يزرايلدىڭ يرانداعى يادرولىق نىساندارعا سوققى بەرۋىن قولدامايتىنىن مالىمدەسە دە، بۇگىن ا ق ش-تىڭ يزرايلمەن بىرگە يراننىڭ مۇناي ينفراقۇرىلىمىنا سوققى جاساۋى مۇمكىن دەگەندى ايتىپ قالدى. بۇل قاقتىعىستا ا ق ش- تىڭ ءرولى وتە ماڭىزدى. سەبەبى يزرايلدىڭ نەگىزگى دونورى، ءارى قولداۋشىسى - ا ق ش. وتكەن ايدىڭ وزىندە يزرايل وداقتاس ەلدەن 8.7 ميلليارد ا ق ش دوللارىن العانىن راستادى.

يران - الىپ مۇناي ءوندىرۋشى مەملەكەت. ەگەر ا ق ش پەن يزرايل يرانعا شابۋىل جاساسا، مۇنايدىڭ باعاسى قانشالىقتى وزگەرەدى؟ بايدەننىڭ بۇل سوزىنەن كەيىن Brent ماركالى مۇناي باعاسى بىردەن %5- عا ءوستى. ال سەيسەنبىدەگى شابۋىلدان كەيىن قارا التىن قۇنى %10- عا كوتەرىلدى. بۇل وتە ۇلكەن وزگەرىس.

جالپى، يران - وپەك مۇشەسى جانە تاۋلىگىنە شامامەن 3,2 ميلليون باررەل وندىرەدى. بۇل الەمدىك ءوندىرىستىڭ %3- ىن قۇرايدى. ەگەر يزرايل يراننىڭ مۇناي يندۋسترياسىنا سوققى بەرسە، ونىڭ باعاسى وزگەرەرى ءسوزسىز. ءبىراق سوڭعى جىلدارى يراننىڭ جاھاندىق مۇناي وندىرۋدەگى ءرولى بۇرىنعىداي ەمەس. سەبەبى سوڭعى 15-20 جىلدا ا ق ش، برازيليا جانە وزگە دە ەلدەر مۇناي ءوندىرىسىن ارتتىرىپ، ونى ءارتاراپتاندىردى. بۇرىنعىداي پارسى شىعاناعى ارقىلى وتەتىن شيكىزات تەگەرانعا تاۋەلدى ەمەس. ونى وپەك تە راستاپ وتىر.

يزرايلدىك ب ا ق جەرگىلىكتى شەنەۋنىكتەرگە سىلتەمە جاساي وتىرىپ، يزرايل الدىمەن يراننىڭ مۇناي نىساندارىنا سوققى بەرۋدى كوزدەپ وتىرعانىن ايتىپ جاتىر. ەگەر يران جاۋاپ قايتارسا، يزرايل ونىڭ يادرولىق نىساندارىنا سوققى بەرۋدى جوسپارلاپ وتىر دەدى. ال بۇل تۇتاس ايماق ءۇشىن ءتىپتى قاۋىپتى بولۋى مۇمكىن.

24.kz