ا ق ش پەن ەۋروپادا قوعامدىق كولىكتە قانداي جەڭىلدىك بەرىلگەن؟

استانا. قازاقپارات - كانادادا ستۋدەنتتىك بيلەتى بار ازاماتتار ءبىر ماۋسىمدا قوعامدىق كولىك ءۇشىن 46 جەرگىلىكتى دوللار تولەيدى. ول ءبىزدىڭ اقشامەن 16 مىڭ تەڭگەدەن اسادى.

بۇل وتە ءتيىمدى. ويتكەنى سالىستىرۋ ءۇشىن ايتساق، تورونتودا قوعامدىق كولىكتە ءبىر ايلىق جول ءجۇرۋ قۇنىنىڭ ءوزى 43 مىڭ تەڭگەگە جۋىقتايدى. ءبىراق ءبىر ايتا كەتەرلىگى، ءبىر قالانىڭ ستۋدەنتتىك بيلەتى باسقا جەرگە جارامايدى.

امەريكاندىق ستۋدەنتتەر اۆتوبۋستا جەڭىلدىكپەن جۇرە الادى

ا ق ش- تا ستۋدەنتتەر Student Advantage Card سەكىلدى باعدارلامالاردىڭ ارقاسىندا بەلگىلى ءبىر تاسىمالداۋشىلاردىڭ اۆتوبۋستارىمەن قاتىناۋ ءۇشىن 15 پايىزدىق جەڭىلدىك الا الادى. ونىڭ جىلدىق جارناسى نەبارى 30 دوللار. ياعني 15 مىڭ تەڭگە. بۇدان بولەك قۇجات پويىزبەن جول ءجۇرۋ اقىسى مەن كەيبىر تاۋارلارعا جەڭىلدىك الۋعا مۇمكىندىك بەرەدى. ال زيپ كار قوسىمشاسىنا جازىلۋ ارقىلى جۇرگىزۋشى كۋالىگى بار جاسى 21-دەن اسقان ازاماتتار كولىكتى 60 پايىزدىق جەڭىلدىكپەن جالعا الادى.

ەۋروپانىڭ 50 قالاسىندا قوعامدىق كولىكپەن تەگىن قاتىناۋعا بولادى

نيدەرلاندتا وۋ ۆي چيپ كارت جۇيەسى ەنگىزىلگەن. سوعان سايكەس ستۋدەنتتەر دەمالىس نە مەرەكە كۇندەرى قوعامدىق كولىكپەن تەگىن قاتىنايدى. قاربالاس كەزدە 40 پايىزدىق جەڭىلدىك بەرىلەدى. ول ءۇشىن جوعارى وقۋ ورنىندا ءبىلىم الۋ كەرەك جانە جاسى 30-دان اسپاۋى شارت.

گەرمانيادا ستۋدەنتتەر 49 ەۋرو تۇراتىن سەمەسترلىك بيلەتتى پايدالانادى. بۇل تەڭگەمەن 26 مىڭ شاماسىندا. ستۋدەنتتەر قۇجاتپەن بۇكىل ەل بويىنشا اۆتوبۋس جانە پويىزبەن جۇرە بەرەدى.

ال ليۋكسەمبۋرگتە ستۋدەنتتەر عانا ەمەس، بارلىق تۇرعىن قوعامدىق كولىكتە تەگىن جۇرەدى. ءتيىستى ەرەجە بۇكىل ەل اۋماعىنا تارايدى. ەستونيا استاناسى تالليندە دە وسىنداي مۇمكىندىك بار. جالپى بۇگىندە ەۋروپانىڭ 50 قالاسىندا قوعامدىق كولىكپەن تەگىن جۇرۋگە بولادى. بۇل قورشاعان ورتانى قورعاۋ ماقساتىندا قابىلدانعان شەشىم. ونىڭ ۇستىنە باستاما الەۋمەتتىك تەڭسىزدىكتى جويۋعا باعىتتالعان.

24.kz