ا ق ش پەن قىتاي تيكتوك بويىنشا الدىن الا كەلىسىمگە كەلدى
استانا. KAZINFORM - ا ق ش پەن قىتاي TikTok الەۋمەتتىك جەلىسىن ا ق ش باقىلاۋىنا بەرۋ جونىندە الدىن الا كەلىسىمگە كەلدى. بۇل تۋرالى Reuters حابارلادى.
رەسمي مالىمەتكە سايكەس، كەلىسىمدى جۇما كۇنى ا ق ش پرەزيدەنتى دونالد ترامپ پەن قىتاي حالىق رەسپۋبليكاسىنىڭ ءتوراعاسى شي جينپيڭ اراسىنداعى تەلەفون ارقىلى اڭگىمە بارىسىندا راستاۋ جوسپارلانىپ وتىر. بۇل تۋرالى ا ق ش قارجى ءمينيسترى مادريدتە قىتاي وكىلدەرىمەن وتكەن كەلىسسوزدەردەن كەيىن مالىمدەدى.
ءمينيستردىڭ ايتۋىنشا، TikTok تىڭ ا ق ش- تاعى جۇمىسىنا قاۋىپ توندىرگەن 17-قىركۇيەك مەرزىمى قىتايلىق دەلەگاتسيانى مامىلەگە كەلۋگە يتەرمەلەگەن. ول كەلىسىمدى اياقتاۋ ءۇشىن بۇل مەرزىمدى تاعى 90 كۇنگە ۇزارتۋعا بولاتىنىن اتاپ ءوتتى، ءبىراق باسقا اقپارات بەرۋدەن باس تارتتى.
- ولاردى قوسىمشانىڭ قىتايلىق ەرەكشەلىگى قىزىقتىرادى، ونى ولار «جۇمساق كۇشتىڭ» كورىنىسى دەپ ەسەپتەيدى. ءبىزدى قىتايلىق ەرەكشەلىك الاڭداتپايدى. ءبىزدى الاڭداتاتىنى - ۇلتتىق قاۋىپسىزدىك، - دەدى مينيستر بەسسەنت مادريدتەگى كەلىسسوزدەن كەيىن.
بۇل - بيىل تاراپتاردىڭ TikTok بويىنشا كەلىسىمگە جاقىنداعانى جونىندە ەكىنشى مارتە مالىمدەۋى. بۇعان دەيىن ناۋرىزدا وسىنداي حابارلانعانىمەن، ول ءۇمىتتى اقتاماعان بولاتىن.
ءساۋىر ايىنىڭ باسىندا TikTok اكتيۆتەرىن ا ق ش- تا بولۋگە قاتىستى كەلىسىم توقتاتىلعان ەدى. قىتاي بيلىگى ول كەزدە ا ق ش پرەزيدەنتى دونالد ترامپ ەنگىزگەن كەدەندىك باج سالىعىنا بايلانىستى كەلىسىمدى قابىلدامايتىنىن جاريالاعان.
ەسكە سالا كەتسەك، 2024 -جىلى ا ق ش- تىڭ 46-پرەزيدەنتى دجو بايدەن قىتايلىق ByteDance كومپانياسىن TikTok تى ساتۋ نەمەسە ەل اۋماعىنداعى قىزمەتىن توقتاتۋ جونىندەگى زاڭعا قول قويعان.
الايدا 2025 -جىلعى 20-قاڭتاردا يناۋگۋراتسيادان كەيىن دونالد ترامپ بۇل پلاتفورمانى ا ق ش- تا بۇعاتتاۋدى كەم دەگەندە 75 كۇنگە (5 - ساۋىرگە دەيىن) شەگەرەتىن جارلىققا قول قويدى. ول بۇعان دەيىن TikTok قا «جىلى قارايتىنىن» ايتقان، سەبەبى بۇل جەلىنىڭ جاس امەريكالىق پايدالانۋشىلارى ونىڭ 2024 -جىلعى قاراشاداعى سايلاۋداعى جەڭىسىنە ىقپال ەتكەن بولاتىن.
