ا ق ش پەن قىتاي «ساۋدا سوعىسىن» باسەڭدەتۋ جونىندە كەلىسسوزدەردى باستادى

استانا. KAZINFORM – ا ق ش پەن قىتاي دەلەگاتسيالارى جەنيەۆادا الەمدەگى ەڭ ءىرى ەكونوميكالار اراسىنداعى ساۋدا سوعىسىن باسەڭدەتۋگە باعىتتالعان جوعارى دەڭگەيدەگى كەلىسسوزدەردى باستادى، Euronews.

امەريكالىق دەلەگاتسيانى قارجى ءمينيسترى سكوتت بەسسەنت، ال قىتايلىق دەلەگاتسيانى حە ليفەن باسقارىپ وتىر.

كەزدەسۋ ورنى ناقتى جاريالانباعان، ال ەكى ەلدىڭ رەسمي وكىلدەرى جۋرناليستەرمەن تەك انونيم تۇردە پىكىر الماسىپ جاتىر.

ساراپشىلار كەلىسسوزدەردەن ۇلكەن ناتيجە كۇتپەيدى، دەگەنمەن كەدەندىك باجدار بويىنشا ءوزارا بەلگىلى ءبىر ىمىراعا كەلىپ، بۇل جاھاندىق ساۋداعا كەلتىرىلەتىن زالالدى ازايتىپ، قارجى نارىقتارىنا ءبىراز سەنىم ۇيالاتادى دەپ ۇمىتتەنۋدە.

ءساۋىر ايىندا اقش پرەزيدەنتى دونالد ترامپ قىتايدان كەلەتىن يمپورتقا سالىناتىن باج سالىعىن 145 پايىزعا دەيىن كوتەرگەن، ال قىتاي جاۋاپ رەتىندە ا ق ش تاۋارلارىنا %125 باج ەنگىزگەن. بۇل ەكىجاقتى ساۋدانىڭ ءىس جۇزىندە توقتاۋىنا اكەلىپ وتىر. وتكەن جىلى بۇل ساۋدانىڭ جالپى كولەمى 660 ميلليارد دوللاردان اسقان.

كەلىسسوزدەر باستالماي تۇرىپ-اق ترامپ Truth الەۋمەتتىك جەلىسىندە باج سالىعىن %80 عا دەيىن تومەندەتۋگە دايىن ەكەنىن مەڭزەگەن.

دونالد ترامپ «تاريفتىك سوعىستى» ءوزىنىڭ العاشقى پرەزيدەنتتىك مەرزىمىندە باستادى. ول كەزدە قىتايدى ادىلەتسىز باسەكەلەستىككە - كونترافاكت ونىمدەردى قولدانۋ، باتىس كومپانيالارىن تەحنولوگيالارىن بەرۋگە ماجبۇرلەۋ جانە دەمپينگكە ارنالعان مەملەكەتتىك سۋبسيديالاردى كەڭ قولدانۋ - ايىپتاعان.

بەيجىڭ بۇل ايىپتاۋلاردى نەگىزسىز دەپ سانايدى جانە ترامپتىڭ جوعارى باجدارىن تەك قىتايعا عانا ەمەس، باسقا ەلدەرگە دە ەنگىزگەنىن ەسكە سالادى.

وتكەن جىلى ا ق ش- تىڭ قىتايمەن ساۋدا بالانسىنىڭ تاپشىلىعى 263 ميلليارد دوللار بولدى.

بۇعان دەيىن ترامپ ەنگىزگەن تاريفتەردىڭ وراما ونىمدەر نارىعىنا قالاي اسەر ەتكەنى تۋرالى حابارلانعان بولاتىن.

ايتا كەتەلىك ءساۋىر ايىندا قىتايدا ەكسپورت 8 پايىزعا وسكەن.