ا ق ش پەن ۋكراينا پايدالى قازبالار جونىندەگى كەلىسىمگە قول قويدى
استانا. KAZINFORM - ا ق ش- تىڭ قارجى مينيسترلىگى كيەۆ پەن ۆاشينگتون پايدالى قازبالاردى بىرلەسىپ ءوندىرۋ جانە ۋكراينانى قالپىنا كەلتىرۋ ءۇشىن ينۆەستيتسيالىق قور قۇرۋ تۋرالى كەلىسىمگە قول قويعانىن مالىمدەدى، دەپ جازادى BBC.
ا ق ش قارجى مينيسترلىگىنىڭ سايتىندا جاريالانعان باسپا ءسوز مالىمدەمەسىندە كەلىسىم «امەريكا حالقىنىڭ ۋكراينانى قورعاۋعا كورسەتكەن ەلەۋلى قارجىلىق جانە ماتەريالدىق قولداۋىن مويىنداۋ ءۇشىن» جاسالعانى ايتىلعان.
- بۇل ەكونوميكالىق ىنتىماقتاستىق ۋكراينانىڭ ەكونوميكاسىن قالپىنا كەلتىرۋدى جەدەلدەتۋ ءۇشىن بىرگە جۇمىس ىستەۋگە مۇمكىندىك بەرەدى، - دەدى ا ق ش قارجى مينيسترلىگى.
بۇل رەتتە قارجى مينيسترلىگى تاراپتار «باعدارلامانىڭ قالاي باسقارىلاتىنىن تۇپكىلىكتى بەكىتۋ جانە وسى ماڭىزدى سەرىكتەستىكتى دامىتۋ» بويىنشا جۇمىس ىستەيتىنىن تۇسىندىرەدى.
بۇعان دەيىن ۋكراينانىڭ تەك قانا نەگىزدىك كەلىسىمگە قول قويۋعا دايىن ەكەندىگى، ال ا ق ش تەحنيكالىق مالىمەتتەردى قامتيتىن تاعى ەكى قوسىمشانى جاساۋدى تالاپ ەتكەنى حابارلانعان بولاتىن.
- بۇل كەلىسىم رەسەيگە ترامپ اكىمشىلىگىنىڭ ۋكراينانىڭ ۇزاق مەرزىمدى پەرسپەكتيۆادا ەركىن ءارى ەگەمەن ەل رەتىندە گۇلدەنۋىن جاقتايتىنى تۋرالى ناقتى سيگنال بەرەدى، - دەدى ا ق ش قارجى ءمينيسترى سكوتت بەسسەنت.
ايتا كەتەيىك، 24-ناۋرىزدا ا ق ش پرەزيدەنتى دونالد ترامپ امەريكا اكىمشىلىگى مەن ۋكراينا بيلىگى سيرەك جەر ەلەمەنتتەرى جونىندەگى كەلىسىم بويىنشا جۇمىستى اياقتاۋعا جاقىن ەكەنىن جانە جاقىن ارادا وعان قول قوياتىنىن حابارلاعان بولاتىن.
كييەۆ اتوم ەلەكتر ستانساسىنا ا ق ش- تىڭ باقىلاۋىنسىز جەر قويناۋى تۋرالى كەلىسىمگە قول قويۋعا دايىن ەكەنىن مالىمدەدى.
