ا ق ش ەلشىسى: تاۋ-كەن سالاسىن جەكەشەلەندىرۋ ينۆەستور تارتۋعا جول اشار ەدى

استانا. KAZINFORM - ا ق ش- تىڭ قازاقستانداعى توتەنشە جانە وكىلەتتى ەلشىسى دەنيەل روزەنبليۋم تاۋ-كەن سالاسىنا ينۆەستيتسيانى نىعايتۋ ماسەلەسىنە ارنالعان فورۋمدا امەريكالىق ينۆەستورلاردىڭ تالاپ-تىلەكتەرىن جەتكىزدى.

«مەنىڭ ءوزىم اريزونا شتاتىنان شىققانمىن. بۇل ا ق ش- تاعى تاۋ-كەن ءوندىرىسى دامىعان وڭىرلەردىڭ ءبىرى. مەن سونداعى ءبىرقاتار كومپانيالاردان قازاقستاننىڭ تاۋ-كەن سەكتورىنا قىزىعۋشىلىق تانىتقانىن ەستىدىم. ءبىراق بۇل جەردە ماسەلە وتە كوپ. مەن ولارعا مىنانى ايتتىم. قازاقستاندا مينەرالدى رەسۋرستاردىڭ تاماشا قورى بار ەكەنىن جەتكىزدىم. ول رەسۋرستار جاسىل ەكونوميكاعا كوشۋدە تاپتىرماس ترانزيت بولا الادى. قازاقستان سيفرلاندىرۋدا دا العا جىلجىپ كەلە جاتقانىن ايتتىم. وسىنىڭ ءبارى ينۆەستورلاردى قازاقستانعا تارتادى»، - دەپ باستادى ءسوزىن ديپلومات.

سونداي- اق، ول سالاعا ەنگىزىلىپ جاتقان اشىقتىق قاعيداتى جالعاسا بەرۋ كەرەك دەگەن پايىمىن جەتكىزدى.

«قازاقستاننىڭ ەكونوميكالىق وسىمىنە سەنەتىن دوسى رەتىندە تاۋ-كەن سالاسىنداعى الەۋەتتەرىڭىزدى قالاي بارىنشا اشۋعا بولاتىنىن ايتقىم كەلەدى.

ءبىرىنشى كەزەكتە، اشىقتىق قامتاماسىز ەتىلۋى كەرەك. ينۆەستورلار بولجاپ بىلۋگە بولاتىن ساياساتتى، اشىقتىقتى، شەشىم قابىلداۋ، زاڭ بەكىتۋ، سالىق سالۋ پروتسەستەرىنىڭ كورىنەۋ جۇرگەنىن جاقسى كورەدى. جەكە سەكتورداعى ارىپتەستەرىمىزدەن زاڭداردىڭ بارىنە بىردەي ادال قولدانىلعانىن، بارىنشا اشىقتىق بولعانىن قالايتىنىن ءجيى ەستيمىز. بۇل وتە ماڭىزدى. ا ق ش ينۆەستورلارى ءادىل نارىق كورگىسى كەلەدى، سوتتاردىڭ زاڭگەرلىك وتىرىستارىنان، تورەلىكتەردەن قورعالعانىن سەزىنگىسى كەلەدى.

ا ق ش ينۆەستورلارى تاۋ-كەن ىسىندە جەكە سەكتوردىڭ كوبىرەك بولعانىن، جەكە مەنشىكتىڭ باسىم ۇلەس العانىن قالايدى. بۇل سالادا يننوۆاتسيالاردىڭ ەتەك جايىپ، كرەاتيۆتى شەشىمدەر پايدا بولۋىنا جاعداي تۋعىزادى.

سونداي-اق، اكسيونەرلەر مەن مەنەدجەرلەردەن ەسەپتىلىك تالاپ ەتىپ، تيىمدىلىكتى ارتتىرۋ وتە ماڭىزدى. ۇكىمەت بۇل باعىتتا، سالاداعى ءوزىنىڭ ۇلەسىن ازايتۋعا ناقتى قادامدار جاساپ وتىر. تاۋ-كەن سەكتورىندا جەكەشەلەندىرۋ كوپ بولسا، سالانىڭ تارتىمدىلىعى ارتا تۇسەر ەدى. ءبىز قازاقستاننىڭ سەكتورعا حالىقارالىق ينۆەستيتسيا تارتۋ باعىتىنداعى قازىرگى باعدارىنا وڭ كوزبەن قارايمىز»، - دەدى دەنيەل روزەنبليۋم.

اۆتور

ەسىمجان ناقتىباي