ا ق ش ەلشىسى الپاۋىت ينۆەستورلاردىڭ ءونىم ءبولىسۋ كەلىسىمىن جاريا ەتۋ ۇسىنىسىنا پىكىر ءبىلدىردى
استانا. KAZINFORM - ا ق ش- تىڭ قازاقستانداعى توتەنشە جانە وكىلەتتى ەلشىسى دەنيەل روزەنبليۋم تاۋ-كەن سالاسىنا ينۆەستيتسيانى نىعايتۋ ماسەلەسىنە ارنالعان فورۋمدا الپاۋىت ينۆەستورلاردىڭ ءونىم ءبولىسۋ كەلىسىمىن جاريا ەتۋ ۇسىنىسىنا پىكىر ءبىلدىردى.
«قازاقستان حالقىنىڭ ءبىر بولىگى توقسانىنشى جىلدارى ءىرى ينۆەستورلار مەن قازاقستان ۇكىمەتىنىڭ اراسىندا جاسالعان ءونىم ءبولىسۋ كەلىسىمدەرىن جالپىعا جاريا ەتۋدى تالاپ ەتىپ ءجۇر. ونداي كەلىسىمدەر ا ق ش ينۆەستورلارىمەن دە بەكىتىلگەن. ءسىز ديپلومات رەتىندە باستاماشىل توپتاردىڭ وسى ۇسىنىسىنا قانداي پىكىر بىلدىرەسىز؟ كەلىسىمدەردى جاريا ەتۋ تالابى ورىندى دەپ ويلايسىز با؟» - دەپ سۇرادى جۋرناليست فورۋمنان كەيىن.
ەلشىنىڭ ويىنشا، اتالعان كەلىسىمدەر ەكى تاراپقا دا ءتيىمدى ەتىپ جاسالعان.
«بۇل ناقتى مۇنايعا بايلانىستى. اتالعان كەلىسىمدەر قازاقستان ۇكىمەتى مەن جەكە كومپانيالار اراسىندا بەكىتىلگەن. ولاردىڭ كەيبىرى ا ق ش- تىڭ كومپانيالارى، كەيبىرى حالىقارالىق كومپانيالار بولعان. مەنىڭ قولىمدا ول كەلىسىمدەر جوق جانە ماعان ولاردىڭ مونيتورينگىنە جاۋاپكەرشىلىك جۇكتەلمەگەن. ءبىراق ونىڭ سەبەبى بار، كوممەرتسيالىق كەلىسىمدەر بەلگىلى ءبىر ۇلگىمەن قۇرىلىمدالۋى كەرەك. سول ارقىلى ينۆەستورلاردىڭ قۇقىقتارىن قورعاۋ كوزدەلگەن. ءبىراق ول سەبەپ ينۆەستيتسيا تارتۋشى ەلدىڭ مۇددەسىنە دە ساي. ناقتى بۇل جاعدايدا قازاقستان مۇددەسىنە ساي. توقسانىنشى جىلعى كەلىسىمدەردىڭ قازىرگى كەلىسىمدەردەن ايىرماشىلىعى بار دەپ ويلاۋىما ەش سەبەپ جوق. مەن ول كەلىسىمدەر كوممەرتسيالىق تۇرعىدان ءتيىمدى تاسىلمەن بەكىتىلدى دەپ ويلايمىن. ول قۇجاتتار جالپىعا جاريا بولۋ كەرەك پە، جوق پا دەگەن ماسەلە تۋرالى پىكىرىم جوق. ءبىز بۇل كەلىسىمدەر ينۆەستيتسيا سالۋشى كومپانيالاردىڭ، سونداي-اق ۇكىمەتتىڭ دە مۇددەسىنە ساي جۇمىس ىستەپ كەلدى دەپ ەسەپتەيمىز»، - دەدى ديپلومات.
اۆتور
ەسىمجان ناقتىباي
