ا ق ش ەلشىلىگى قازاقستاندىقتار ءۇشىن ماڭىزدى حابارلاما جاريالادى
استانا. KAZINFORM - ا ق ش-تىڭ قازاقستانداعى ەلشىلىگى ۆيزالىق اڭگىمەلەسۋگە جازىلۋ تۋرالى حابارلاما جاريالادى.
2-مامىردان باستاپ، استانا جانە الماتى قالالارىنداعى كونسۋلدىق بولىمدەر ۆيزا سۇحباتىنا جازىلۋ ءراسىمىن سۇحبات كۇنىنە ءۇش جۇمىس كۇنى قالعاندا ساعات 17:00-دە جابادى.
ماسەلەن، ەگەر سۇحبات 2-مامىرعا بەلگىلەنسە، DS-160 وتىنىشىندەگى بارلىق مالىمەت 28-ءساۋىر ساعات 17:00 گە دەيىن تولىق تولتىرىلىپ، جىبەرىلۋى ءتيىس.
DS-160 ءوتىنىشى بويىنشا راستاما حاتىڭىزداعى شتريح-كود ءنومىرى (AA00 دەپ باستالادى) مەن سۇحباتقا جازىلۋ جۇيەسىنە ەنگىزىلگەن DS-160 شتريح-كود ءنومىرى بىردەي بولۋى كەرەك.
- سۇحباتقا جازىلۋ جۇيەسىندەگى شتريح- كود نومىرىندە قاتە جوقتىعىنا كوز جەتكىزىڭىز. ءجيى كەزدەسەتىن قاتەلەردىڭ ءبىرى - «0» سانىنىڭ ورنىنا «O» ءارپىن پايدالانۋ. دۇرىس شتريح- كودتار ءارقاشان AA00-دەن باستالادى جانە مۇنداعى 0 سان رەتىندە جازىلادى، - دەلىنگەن حابارلامادا.
DS-160 وتىنىشىڭىزدە كورسەتكەن سۇحبات ورنى (قالا) مەن سۇحباتتان ءوتۋ ءۇشىن تاڭداعان ورىن (قالا) بىردەي بولۋى كەرەك.
- ەگەر ءسىزدىڭ DS-160 فورماڭىزدا ء«وتىنىشىڭىزدى تاپسىراتىن ورىن» دەپ الماتى كورسەتىلسە، ءبىراق ءسىز سۇحباتقا استاناعا جازىلعان بولساڭىز، ءسىز جاڭا DS-160 ءوتىنىشىن تولتىرىپ، سۇحباتقا ءۇش جۇمىس كۇنى قالعانعا دەيىن شتريح-كود ءنومىرىن جۇيەدە جاڭارتۋىڭىز قاجەت، - دەلىنگەن ەلشىلىك حابارلاماسىندا.
ەگەر ءسىز جازىلىپ قويعان سۇحباتىڭىزعا كەلمەي قالعان بولساڭىز، ءسىزدى «كەلمەگەن (no show)» دەپ بەلگىلەيدى جانە ءسىز DS-160 ءوتىنىشىن جاڭادان تولتىرۋىڭىز كەرەك.
قايتادان تولتىرىلعان DS-160 ءوتىنىشىنىڭ شتريح-كود ءنومىرىن سۇحبات كۇنىنە كەم دەگەندە ءۇش جۇمىس كۇن بۇرىن جازىلۋ جۇيەسىندە جاڭارتۋىڭىز قاجەت.
ءسىزدىڭ DS-160 ءوتىنىشىڭىز تولتىرىلىپ، جىبەرىلگەن بولۋى ءتيىس.
ءوتىنىش بەرۋشىلەردىڭ كوبى DS-160 ءوتىنىشىن سۇحباتقا ءبىر كۇن قالعانعا دەيىن تولىق اياقتاماي، سوزىپ جۇرەدى. ەگەر ءسىز ءالى DS-160 ءوتىنىشىن تولتىرۋدى اياقتاماساڭىز، وندا سۇحباتقا كەمىندە ءۇش جۇمىس كۇنى قالعانعا دەيىن تەز ارادا تولتىرىپ شىعۋىڭىز كەرەك.
ەگەر ءسىزدىڭ DS-160 ءوتىنىشىڭىز وسى تالاپتارعا ساي كەلمەسە، ءسىز تىركەلىپ قويعان سۇحبات كۇنى مەن ۋاقىتى جويىلادى، ءسىزدى سۇحباتقا «كەلمەدى» دەپ بەلگىلەيدى جانە سۇحباتقا قايتادان جازىلۋىڭىز كەرەك بولادى.
