ا ق ش شىعىس ەۋروپاداعى 6000 ساربازىن الماستىرادى

استانا. KAZINFORM - ا ق ش قورعانىس مينيسترلىگى شىعىس ەۋروپاداعى 6000 عا جۋىق امەريكالىق ساربازدىڭ جوسپارلى روتاتسياسى وسى جازدا وتەتىنىن مالىمدەدى. بۇل شەشىم Atlantic Resolve («اتلانتيكالىق تاباندىلىق») وپەراتسياسى اياسىندا جۇزەگە اسىرىلادى، دەپ جازادى DW.

پەنتاگون مالىمەتىنشە، ەۋروپاداعى ەكى تانك بريگاداسىن اۋىستىرۋ كوزدەلىپ وتىر. اتاپ ايتقاندا، 1- جاياۋ اسكەر ديۆيزياسىنىڭ ەكى بريگاداسى ليتۆا، پولشا جانە وزگە دە وڭىرلەردە قىزمەت ەتىپ جاتقان ارىپتەستەرىن الماستىرادى. جاڭا قۇرامدا شامامەن 3500 اسكەري قىزمەتكەر بار.

Atlantic Resolve وپەراتسياسى 2014 -جىلدان بەرى جالعاسىپ كەلەدى. ا ق ش پەن ناتو بۇل باستاما ارقىلى شىعىس ەۋروپاداعى وداقتاستارىن قولداپ، تۇراقتىلىقتى قامتاماسىز ەتۋدى كوزدەيدى.
دەگەنمەن، دونالد ترامپتىڭ اق ۇيگە قايتا ورالۋىنا بايلانىستى، ا ق ش- تىڭ ەۋروپاداعى اسكەري قاتىسۋى قىسقارۋى مۇمكىن دەگەن بولجامدار جيى ايتىلۋدا.

بۇعان دەيىن ا ق ش پولشاداعى ماڭىزدى اسكەري اەرودرومنان اسكەر شىعاراتىنىن حابارلاعان ەدى. الايدا رەسمي ۆارشاۆا ۆاشينگتون اسكەرىن ساقتاپ قالۋعا نيەتتى ەكەنىن مالىمدەپ وتىر.

قازىر ەۋروپادا 78 مىڭعا جۋىق امەريكالىق سارباز بار، ونىڭ 37 مىڭى گەرمانيادا، 10 مىڭى پولشادا ورنالاسقان.