ا ق ش B-52 بومبالاۋشىلارىن ءۇندى مۇحيتىنداعى بازاعا ورنالاستىردى
استانا. قازاقپارات - B-52 بومبالاۋشى ۇشاقتارى ءۇندى مۇحيتىندا بولەك ورنالاسقان ديەگو-گارسيا ارالىنا ۇشىپ كەلىپ، سول جەردە B-2 بومبالاۋشىلارىمەن بىرىكتى. بۇل تۋرالى Kazinform اگەنتتىگىنىڭ مەنشىكتى ءتىلشىسى Air Space Forces Magazine باسىلىمىنا سىلتەمە جاساپ حابارلايدى.
ا ق ش اۋە كۇشتەرىنىڭ عالامدىق سوققى بەرۋ قولباسشىلىعى ۇشاقتاردىڭ ورنالاسقان جەرىنە قاتىستى تۇسىنىكتەمە بەرگەن جوق.
«ا ق ش جاۋىنگەرلىك قولباسشىلىقتارىمەن جانە ءتيىستى مەملەكەتتىك اگەنتتىكتەرىمەن ۇيلەسىمدە جاھاندىق وپەراتسيالاردى تۇراقتى جۇرگىزىپ وتىرادى. بۇل ارەكەتتەر ا ق ش پەن ونىڭ وداقتاستارىنا قارسى ستراتەگيالىق شابۋىلداردىڭ الدىن الۋ، ولاردى انىقتاۋ جانە قاجەت بولعان جاعدايدا تويتارۋ ماقساتىندا ىسكە اسىرىلادى. وپەراتسيالىق قاۋىپسىزدىكتى ساقتاۋ ءۇشىن وقۋ- جاتتىعۋ نەمەسە وپەراتسيالار تۋرالى ەگجەي-تەگجەيلى اقپارات بەرىلمەيدى»، - دەلىنگەن قولباسشىلىق تاراتقان مالىمدەمەدە.
ديەگو-گارسيادا ورنالاسقان بومبالاۋشىلار يەمەندەگى حۋسيت كوتەرىلىسشىلەرىنە قارسى اۋە شابۋىلدارىنا قاتىسقان. الايدا اتالعان وپەراتسيا 6-مامىردا اياقتالدى، سەبەبى ا ق ش پرەزيدەنتى دونالد ترامپ حۋسيتتەر يەمەن جاعالاۋىنداعى كوممەرتسيالىق كەمە قاتىناسىنا شابۋىلدى توقتاتۋعا كەلىسكەننەن كەيىن، ا ق ش ولارعا قارسى اۋە سوققىلارىن توقتاتاتىنىن مالىمدەدى.
باقىلاۋشىلار حۋسيتتەردىڭ شابۋىلدى توقتاتاتىنىنا كۇمانمەن قارايدى. سوندىقتان ا ق ش بۇل ايماقتا كەلىسىمدى قامتاماسىز ەتۋ ءۇشىن سوققى بەرۋگە قارۋلى كۇشتەرىن قالدىرۋى مۇمكىن.
بومبالاۋشى جەدەل توپتى ورنالاستىرۋ مىندەتتى تۇردە شابۋىل وپەراتسيالارى بولاتىنىن بىلدىرمەيدى. كوبىنە ونداي ۇشقىشتار مەن ۇشاقتار وقۋ-جاتتىعۋلارعا، وداقتاستارمەن بىرلەسكەن جاتتىعۋلارعا قاتىسادى جانە ا ق ش اۆياتسياسىنىڭ مۇمكىندىگىن كورسەتەدى.
بۇعان دەيىن حابارلاعانىمىزداي ا ق ش- تا ۇشاق قىزىل تەڭىزدە ورنالاسقان اۋە تاسىمالداعىشىنا قونۋعا ارەكەتتەنگەن كەزدە قۇلاپ كەتكەن، ۇشقىشتار جەڭىل جاراقات الدى. بۇل تۋرالى The New York Times جازعان ەدى.
ەسكە سالساق، 4-مامىردا حۋسيتتەر تەل-اۆيۆتەگى بەن گۋريون اۋەجايىنا شابۋىل جاسادى.
