ا ق ش 6000 نان استام حالىقارالىق ستۋدەنتتىك ۆيزانىڭ كۇشىن جويدى
استانا. KAZINFORM – ا ق ش مەملەكەتتىك دەپارتامەنتى 6 مىڭنان استام حالىقارالىق ستۋدەنتتىك ۆيزانىڭ كۇشىن جويدى. بۇل ەلدە زاڭ بۇزۋ مەن مەرزىمى بىتكەن سوڭ دا قالۋ جاعدايلارىنىڭ كوبەيۋىمەن ءتۇسىندىرىلدى، دەپ حابارلادى BBC.
ۆەدومستۆونىڭ مالىمەتىنشە، ۆيزالاردىڭ باسىم بولىگى زورلىق-زومبىلىق، ماس كۇيىندە كولىك جۇرگىزۋ، ۇرلىق جانە لاڭكەستىككە كومەكتەسۋ سياقتى زاڭ بۇزعانى ءۇشىن جويىلدى.
بۇل شەشىم ا ق ش پرەزيدەنتى دونالد ترامپتىڭ اكىمشىلىگى يمميگراتسيا مەن حالىقارالىق ستۋدەنتتەرگە باقىلاۋدى كۇشەيتىپ جاتقان كەزدە قابىلداندى. شەنەۋنىكتەر تەرروريزمگە كومەكتەسۋ دەگەندى تۇسىندىرمەدى، ءبىراق ۇكىمەت پالەستينانى قولداپ دەمونستراتسياعا شىققان كەيبىر ستۋدەنتتەردى دە نىساناعا الىپ، ولاردىڭ ارەكەتتەرىن انتيسەميتيزم دەپ سيپاتتادى.
جويىلعان 6000 نان استام ۆيزانىڭ 4000 عا جۋىعى زاڭ بۇزۋعا بايلانىستى. INA- نىڭ 3ۆ ءبولىمى (ادام ومىرىنە قاۋىپ توندىرەتىن نەمەسە ا ق ش زاڭدارىن بۇزاتىن لاڭكەستىك ارەكەتتەرگە قاتىسۋ) بويىنشا تاعى 200-300 ۆيزانىڭ كۇشى جويىلدى.
ترامپ اكىمشىلىگى بۇعان دەيىن دۇنيە جۇزىندەگى ا ق ش ەلشىلىكتەرىندەگى حالىقارالىق ستۋدەنتتەرگە ۆيزا تاعايىنداۋدى ۋاقىتشا توقتاتقان بولاتىن. ماۋسىم ايىندا پروتسەسس قايتا باستالعان كەزدە، ۇمىتكەرلەردەن الەۋمەتتىك جەلىلەردەگى اككاۋنتتارىن جاريا ەتۋ تالاپ ەتىلدى. شەنەۋنىكتەر بۇل پروتسەسس ا ق ش ازاماتتارىنا، مادەنيەتىنە، ۇكىمەتىنە نەمەسە پرينتسيپتەرىنە قارسى كەز كەلگەن دۇشپاندىق بەلگىلەرىن انىقتاۋ ءۇشىن جاسالعانىن ايتتى. سونداي-اق مەملەكەتتىك دەپارتامەنت قىزمەتكەرلەرىنە شەتەلدىك لاڭكەستىك توپتارعا قولداۋ كورسەتەتىن نەمەسە ا ق ش- تىڭ ۇلتتىق قاۋىپسىزدىگىنە قاۋىپ توندىرەتىن ادامداردى انىقتاۋ تاپسىرىلدى.
مەملەكەتتىك حاتشى ماركو رۋبيو مامىردا مىڭداعان ستۋدەنتتىك ۆيزالاردىڭ كۇشىن جويعانىن ايتتى. ول پروتسەستىڭ جالعاساتىنىن مالىمدەدى. دەموكراتتار ترامپ اكىمشىلىگىنىڭ شارالارىن ستۋدەنتتەردىڭ قۇقىقتارىن بۇزۋ دەپ سىنادى.
Open Doors مالىمەتتەرى بويىنشا 2023/2024 وقۋ جىلىندا ا ق ش- تىڭ جوعارى وقۋ ورىندارىندا 210 نان استام ەلدەن 1,1 ميلليوننان استام حالىقارالىق ستۋدەنت وقىدى. بۇل ستۋدەنتتەردىڭ جالپى سانىنىڭ شامامەن 6 پايىزىن قۇرايدى.
ەسكە سالا كەتەيىك، ا ق ش گازادان كەلگەن ازاماتتارعا ۆيزا بەرۋدى ۋاقىتشا توقتاتتى.
