اۋە كومپانيانىڭ 12 جاسار قىزدى اۋەجايدا قالدىرىپ كەتۋى: كومپانيا جاۋاپقا تارتىلا ما

ورال. قازاقپارات - FlyArystan اۋە كومپانياسىنىڭ 12 جاسار قىزدى استاناداعى اۋەجايدا قالدىرىپ كەتۋىنە بايلانىستى قولدانىستاعى ەرەجەگە وزگەرىستەر ەنگىزىلۋى مۇمكىن.

ادۆوكات دانيلحان شاعاتايەۆتىڭ Instagram الەۋمەتتىك جەلىدەگى پاراقشاسىندا ءمالىم ەتكەنىندەي، وزدەرىنىڭ ارىزى بويىنشا ق ر كولىك مينيسترلىگى ازاماتتىق اۆياتسيا كوميتەتىنەن جاۋاپ العان.

«كوميتەت بيىلعى 21-شىلدەدە استانا - ورال باعىتى بويىنشا ك س7367 رەيسىنە بالانى وتكىزبەگەنى ءۇشىن FlyArystan اۋە كومپانياسىن اكىمشىلىك جاۋاپكەرشىلىككە تارتۋعا نيەتتى ەكەندىگىن حابارلادى. وسىعان بايلانىستى كوميتەت پەن «قازاقستان اۆياتسيا اكىمشىلىگى» ا ق مۇقيات تەكسەرۋ وتكىزبەكشى»، دەيدى د. شاعاتايەۆ.

سونىمەن قاتار بولاشاقتا مۇنداي جاعدايعا جول بەرمەۋ ماقساتىندا ق ر ينۆەستيتسيالار جانە دامۋ ءمينيسترىنىڭ 2015 -جىلعى 30-ساۋىردەگى №540-بۇيرىعىمەن بەكىتىلگەن جولاۋشىلاردى، باگاجدى جانە جۇكتەردى اۋە كولىگىمەن تاسىمالداۋ قاعيدالارىنا تۇزەتۋلەر ەنگىزۋ ماسەلەسى قارالادى.

«بۇدان بۇرىن جازيرا مۋسينامەن (قىزدىڭ اناسى) بىرگە FlyArystan كومپانياسىنا ساياساتتى وزگەرتىپ، بالالاردى تاسىمالداۋ ەرەجەسىنە وزگەرىستەر ەنگىزۋدى جازباشا تۇردە ۇسىندىق. اتالعان ۇسىنىس كولىك مينيسترلىگى وكىلىنىڭ قاتىسۋىمەن FlyArystan پرەزيدەنتىمەن وتكەن كەزدەسۋدە دە ايتىلدى»، دەيدى ادۆوكات.

ونىڭ ايتۋىنشا، بالانى اۋەجايدا قالدىرىپ كەتۋ وقيعاسى ءبىرىنشى رەت بولىپ وتىرعان جوق. ەگەر بۇل جولى اۋە كومپانياسى كەشىرىم سۇراۋمەن شەكتەلسە، بولاشاقتا مۇنداي جايعا مۇلدەم جول بەرمەۋ قاجەت.

«ءبىز كوميتەت قاعيداعا ءتيىستى وزگەرىستەر جوباسىن ازىرلەپ، بۇل جۋىق ارادا قابىلدانادى دەپ سەنەمىز. قولدانىستاعى ەرەجەگە وزگەرىستەر ەنگىزىلسە، ول قازاقستانداعى بارلىق اۋە كومپانيالارىنا ورتاق بولماق»، دەدى د. شاعاتايەۆ.

ەسكە سالا كەتەيىك، بۇدان بۇرىن FlyArystan اۋە كومپانياسىنىڭ اتا-اناسىز قالعان بالانى استانادا اۋەجايدا قالدىرىپ كەتكەنىن جازعان بولاتىنبىز.

سونداي-اق FlyArystan باسشىسى ورالدا ەگىزدەردىڭ اناسى جازيرا مۋسينامەن كەزدەستى.

اۆتور

عايساعالي سەيتاق